فوتو: سۋ رەسۋرستارى جانە يرريگاتسيا مينيسترلىگى
جاڭا موتوتسيكلدەر كاسىپورىننىڭ 12 فيليالى اراسىندا ءبولىندى. اتاپ ايتقاندا, اقمولا فيليالىنا – 1, اقتوبە, قاراعاندى, قوستاناي جانە جەتىسۋ فيليالدارىنا – ارقايسىسىنا 5-تەن, باتىس قازاقستان مەن پاۆلودار فيليالدارىنا – 6-دان تەحنيكا بەرىلدى. سونىمەن قاتار شىعىس قازاقستانعا – 11, اباي وبلىسىنا – 12, «د. قوناەۆ اتىنداعى ۇلكەن الماتى كانالى» فيليالىنا – 20, تۇركىستانعا – 25, ال جامبىل فيليالىنا 29 موتوتسيكل تابىستالدى.
مينيسترلىكتىڭ مالىمەتىنشە, جاڭا تەحنيكا سۋ رەتتەۋشىلەردىڭ ۋچاسكەلەر اراسىندا جىلدام قوزعالۋىنا مۇمكىندىك بەرەدى. بۇل ءوز كەزەگىندە سۋدى ءبولۋ جۇمىستارىن ءتيىمدى جۇرگىزۋگە, گيدروتەحنيكالىق نىسانداردىڭ تۇراقتى جۇمىسىن باقىلاۋعا جانە جەدەل ارەكەت ەتۋگە جاعداي جاسايدى.
جاڭا تەحنيكا العان مامانداردىڭ ءبىرى – «قازسۋشار» رمك جامبىل فيليالى جيەنبەت وندىرىستىك بولىمشەسىنىڭ جاس قىزمەتكەرى ايدىن جولداس. ونىڭ ايتۋىنشا, بۇرىن كۇن سايىن بىرنەشە كانال ارالاپ, ونداعان شاقىرىمدى جاياۋ ەڭسەرۋگە تۋرا كەلگەن.
«نەگىزگى مىندەتىم – شارۋا قوجالىقتارىنا سۋ جەتكىزۋ. كۇنىنە 5-6 كانال ارالاپ, 60-70 شاقىرىم جول جۇرەتىنبىز. كەيدە تۇندە دە جۇمىس ىستەيمىز. بۇرىن كولىك ىزدەۋگە نەمەسە ۆەلوسيپەدپەن بارۋعا ءماجبۇر بولدىق. ەندى جاڭا موتوتسيكلدەر جۇمىسىمىزدى الدەقايدا جەڭىلدەتتى», دەدى ول.
GIZ قازاقستاننىڭ سۋ رەسۋرستارى جانە يرريگاتسيا مينيسترلىگىنە 240 جاڭا تەحنيكا بەرەدى
سونىمەن قاتار جاڭا تەحنيكامەن قامتاماسىز ەتىلگەن مامانداردىڭ ءبىر بولىگى بۇرىن ماۋسىمدىق جۇمىس اتقارىپ كەلگەن. قازىرگى تاڭدا ولار تۇراقتى قىزمەتكە اۋىسىپ, الەۋمەتتىك جاعدايلارى جاقسارعان.
«بۇرىن جىلىنا 6 اي عانا جۇمىس ىستەيتىنبىز. قازىر تۇراقتى جۇمىسقا ورنالاستىق, جالاقىمىز 2 ەسە ءوستى, جىل بويى ەڭبەك ەتىپ, دەمالىسقا شىعۋعا مۇمكىندىك الدىق», دەدى «قازسۋشار» رمك تۇركىستان فيليالىنىڭ سۋ رەتتەۋشىسى پەردەحان ابزاقۇلوۆ.
ايتا كەتەيىك, بىلتىر «قازسۋشار» رمك تەحنيكالىق پاركى 27% جاڭارتىلىپ, سونىڭ ناتيجەسىندە تەحنيكا جالداۋ شىعىندارى 85% قىسقارىپ, جوندەۋ شىعىندارى 2 ەسە ازايعان.
سۋ رەسۋرستارىن باسقارۋ سالاسىن تسيفرلاندىرۋ تەتىكتەرى قارالدى
