پرەزيدەنت تارتۋى «اۋىل كىتاپحانالارىنا – 100 كىتاپ» اكتسياسى اياسىندا تابىس ەتىلدى. ەسكە سالايىق, اتىراۋدا وتكەن ۇلتتىق قۇرىلتايدا مەملەكەت باسشىسى «كىتاپ وقيتىن ۇلت» قالىپتاستىرۋ قاجەتتىگىنە باسا نازار اۋدارعان بولاتىن. «شىن مانىندە, وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», دەدى قاسىم-جومارت توقاەۆ.
پرەزيدەنت باستاماسى وتاندىق جانە الەمدىك ادەبيەتتىڭ سوڭعى ۇلگىدەگى تۋىندىلارىن شالعايداعى اۋىل كىتاپحانالارىنا جەتكىزىپ, وسكەلەڭ ۇرپاقتىڭ كىتاپ وقۋعا دەگەن قىزىعۋشىلىعىن ارتتىرۋعا باعىتتالىپ وتىر. كىتاپتار مەملەكەت باسشىسىنىڭ اتىنان ەلىمىزدىڭ دامۋىنا ەلەۋلى ۇلەس قوسقان مەملەكەت جانە قوعام قايراتكەرلەرىنىڭ, سوعىس ارداگەرلەرىنىڭ, بەلگىلى قالامگەرلەر مەن مادەنيەت مايتالماندارىنىڭ, عالىمداردىڭ تۋىپ-وسكەن اۋىلدارىنا جولداندى.
اكتسيا اياسىندا حالىق قاھارمانى ساعادات نۇرماعامبەتوۆتىڭ, قازاقتىڭ قاھارمان قىزدارى ءاليا مولداعۇلوۆا, مانشۇك مامەتوۆا, حيۋاز دوسپانوۆانىڭ, رەجيسسەر شاكەن ايمانوۆتىڭ, جازۋشى گەرولد بەلگەردىڭ تۋىپ-وسكەن اۋىلدارىنداعى كىتاپحانا قورلارى تولىقتى. سونداي-اق ءبىرجان سال, ساكەن سەيفۋللين, ءىلياس جانسۇگىروۆ, تولەۋ كوبدىكوۆ, كەنەن ازىرباەۆ, ءابىلحان قاستەەۆ, قاسىم امانجولوۆ, كەمەل اقىشەۆ, ءشامشى قالداياقوۆ, ءابىش كەكىلباي ۇلى, فاريزا وڭعارسىنوۆا سەكىلدى بەلگىلى تۇلعالاردىڭ اۋىلدارىنا, باسقا دا بىرقاتار اۋىلدارعا كىتاپتار توپتاماسى جولداندى.
اۋىل كىتاپحانالارىنا بەرىلگەن كىتاپتار اراسىندا الەم جانە قازاق ادەبيەتىنىڭ ۇزدىك شىعارمالارى, بالالار ادەبيەتىنىڭ جاۋھارلارى, كوميكستەر, قازىرگى زامانعى پروزا مەن پوەزيا, تاريحي, تانىمدىق-اعارتۋشىلىق ادەبيەتتەر بار.
مەملەكەت باسشىسىنىڭ اتىنان بارلىعى 100 اۋىلعا 10 مىڭ كىتاپ سىيعا بەرىلدى. ايتا كەتەيىك, «اۋىل كىتاپحانالارىنا – 100 كىتاپ» اكتسياسىنا پارلامەنت سەناتىنىڭ توراعاسى ماۋلەن اشىمباەۆ, پرەزيدەنت اكىمشىلىگىنىڭ باسشىسى ايبەك دادەباي, مينيسترلەر, ءتۇرلى ۇيىمداردىڭ باسشىلارى مەن بەلسەندى ازاماتتار قولداۋ كورسەتىپ جاتىر. اتالعان اكتسيا ءالى جالعاسادى.
ايتا كەتەيىك, كوكتەمدە مادەنيەت جانە اقپارات ءمينيسترى ايدا بالاەۆا «اۋىل كىتاپحانالارىنا – 100 كىتاپ» اكتسياسىن باستاپ, ءۇش وڭىرگە كىتاپتار جولداعان ەدى.
«مەن ءوزىم اباي قۇنانباي ۇلىنىڭ اۋىلى قاراۋىلعا, قانىش ساتباەۆتىڭ اۋىلى باياناۋىلعا, ءوز تۋعان اۋىلىما الەم جانە قازاق ادەبيەتىنىڭ ۇزدىك شىعارمالارىن, تانىمدىق-اعارتۋشىلىق ادەبيەتتەردى تارتۋ ەتتىم. بۇل اكتسيانى وزگە دە ارىپتەستەرىم, مينيسترلەر قولداپ, قازىردىڭ وزىندە بىرنەشە اۋىلعا كىتاپ جەتكىزىپ ۇلگەردى», دەپ جازعان سالا باسشىسى.
سونداي-اق مينيسترلىك جانىنان قۇرىلعان «Alqa» ادەبي كلۋبى دا اكتسيا اياسىندا ماعجان اقىن تۋعان اۋىلعا 100 كىتاپ تارتۋ ەتكەن. ءجۇز كىتاپتىڭ ىشىندە ءتۇرلى جانرداعى كوركەم تۋىندىلار, اتاپ ايتقاندا, استانالىق 30 قالامگەردىڭ كىتابىنان باستاپ, تانىمدىق-تاريحي شىعارمالار, زاماناۋي قازاق ادەبيەتى سەرياسىمەن شىققان كىتاپتار جانە كلۋب مۇشەلەرىنىڭ ءتول تۋىندىلارى بار.
اتالعان باستاما شالعايداعى اۋىل كىتاپحانالارىنا سوڭعى شىققان جاڭا تۋىندىلاردى جەتكىزىپ, وسكەلەڭ ۇرپاقتىڭ كىتاپ وقۋعا دەگەن قىزىعۋشىلىعىن ارتتىرۋعا سەپ بولارى ءسوزسىز.
