مەملەكەت باسشىسىنىڭ تاپسىرمالارىن ورىنداۋ ماقساتىندا ىسكە اسىرىلىپ جاتقان بۇل جوبا ازاماتتاردىڭ تابىسىن ارتتىرۋعا سەپتەسۋدى, كەشەندى كومەك كورسەتۋدى كوزدەيدى. جوبانىڭ باستاماشىلارى – استانا قالاسىنىڭ اكىمدىگى مەن «جاڭا مۇمكىندىك» قوعامدىق قورى.
وسىدان تۋرا ءبىر جىل بۇرىن تۇرعىندار كوپ جينالاتىن جەرلەردە «بارشاعا مۇمكىندىك» مودۋلدىك پۋنكتتەرى اشىلا باستادى. بۇل ورىنداردىڭ ماقساتى – ەسەپكە الىنباعان جۇمىسسىزدىقتى انىقتاۋ ءارى مەملەكەتتىك قولداۋ شارالارى, جۇمىسقا ورنالاسۋ مۇمكىندىكتەرى, قىسقامەرزىمدى وقىتۋ جونىندە ءتيىمدى كەڭەس بەرۋ. قاجەت بولعان جاعدايدا تۇرعىندارعا ەتسق قايتا شىعارۋ, تۇرعىن ۇيگە كەزەككە تۇرۋ, ااك الۋ, kezekte.kz, enbek.kz, indigo.kz, باسقا دا رەسۋرستارعا تىركەۋ ۇسىنىلادى. وسىلايشا, ءبىر جىل ىشىندە سەنىمى بەكىگەن 20 مىڭنان اسا ەلوردالىق جوباعا قاتىستى. 4,5 مىڭنان اسا تۇرعىن مودۋلدىك پۋنكتتەر ارقىلى اكىمدىك باسقارمالارىنا مەملەكەتتىك قولداۋ شارالارى اياسىندا بيزنەس اشۋ, ءۇي الۋ, جۇمىسقا ورنالاسۋ, بالالارعا ءبىلىم بەرۋ جانە بوس ۋاقىتتى ءتيىمدى پايدالانۋ ماسەلەلەرى بويىنشا وتىنىمدەر جولدادى.
«Joltap» جوباسىنىڭ ەكىنشى كەزەڭىندە 15 جۇمىسشى ماماندىعى مەن تسيفرلىق داعدىلار بويىنشا پراكتيكاعا ارنالعان وقۋ سىنىپتارى مەن تسەحتار ىسكە قوسىلىپ جاتىر. اتاپ ايتساق, باريستا, ساتۋشى-كاسسير, تىگىنشى, مودەلەر-كونسترۋكتور, بۋحگالتەرلىك ەسەپ نەگىزدەرى, اياقكيىم جوندەۋ, ەلەكتر-گاز مامانى, كورپۋستىق جيھاز جاساۋشى سياقتى ماماندىقتارعا جانە سايت ازىرلەۋشى, موبيلوگراف, تارگەتولوگ, ۆيدەومونتاج, گرافيكالىق ديزاينەر, SMM مامانى دەگەندەي تسيفرلىق داعدىلارعا باۋلۋ قولعا الىندى.
جوبانىڭ ارالىق قورىتىندىسىن شىعارۋ جونىندەگى كەزدەسۋدە استانا اكىمى جەڭىس قاسىمبەك ماماندىقتار ءتىزىمى قالانىڭ ەكونوميكالىق ەرەكشەلىگىن ەسكەرە وتىرىپ, ساۋدا, سەرۆيس, فريلانس جانە ءوندىرىس سالالارى بويىنشا جاسالعانىن اتاپ ءوتتى.
ء«ومىر ساپاسى كوپ جاعدايدا العان كاسىبى مەن جۇمىسىنا بايلانىستى. وكىنىشتىسى, تۇرعىنداردىڭ ءبارى بىردەي ءبىر كاسىپتىڭ قۇلاعىنان ۇستاي العان جوق. ءبىزدىڭ مىندەتىمىز – قازىرگى نارىقتا قاجەتتى داعدىلاردى مەڭگەرۋگە, جۇمىسقا ورنالاسۋعا كومەكتەسۋ. مەملەكەت ادامداردى قولداۋ جانە جۇمىسقا ورنالاستىرۋ بويىنشا ءتۇرلى الەۋمەتتىك باعدارلامانى ىسكە اسىرىپ جاتىر. وتكەن جىلى قالادا «Joltap» الەۋمەتتىك جوباسىن ىسكە قوستىق. بۇل باعدارلامانىڭ ايىرماشىلىعى – ادامدارعا جاڭا ماماندىق بويىنشا ءبىلىم الۋعا مۇمكىندىك بەرىلەدى. كورسەتكىشكە قاراساق, جوبانىڭ ءساتتى جۇزەگە اسىپ جاتقانىن بايقايمىز», دەدى اكىم.
جوبانىڭ كەلەسى كەزەڭى – جۇمىس بەرۋشىلەرمەن تىكەلەي جۇمىس ىستەۋ, «Jumystap.kz» سەرۆيستىك پلاتفورماسىن ىسكە قوسۋ. بۇل جوبامەن «Magnum», «سپورتماستەر», «GLB», «Danmard» تىگىن فابريكاسى, «يۋتاريا», «YDA» زاۋىتى جانە باسقا دا قالانىڭ جەلىلىك ءارى ءىرى جۇمىس بەرۋشىلەرى قامتىلدى.
بۇگىندە «Jumystap» پلاتفورماسى جۇمىس ىستەپ تۇر. مۇندا قاراپايىم ينتەرفەيستىڭ كومەگىمەن ۇمىتكەرلەرگە قويىلاتىن تالاپتاردى ەگجەي-تەگجەي سيپاتتاۋعا بولادى. بيزنەس وكىلدەرى مەن جەكە تۇلعالار تۇراقتى جۇمىس ورنىنا قىزمەتكەردى عانا ەمەس, سونىمەن قاتار كولەمدى تاپسىرىستاردى ورىنداۋشىلاردى دا تابا الادى.
ەلىمىزدىڭ باسقا ايماقتارىنىڭ تۇرعىندارى دا اتالعان جوبانىڭ يگىلىگىن سەزىنگىسى كەلەدى. بۇل ۇكىمەتتىڭ دە نازارىنا ءىلىنىپ, جوبانىڭ اۋقىمىن 4 ايماققا – الماتى, شىمكەنت, اقتوبە, قاراعاندى قالالارىنا كەڭەيتۋ تۋرالى شەشىم قابىلداندى.
