ينفوگرافيكانى جاساعان – امانگەلدى قياس, «ەQ»
بىزگە ساپا ماڭىزدى
ۇكىمەت وتىرىسى پرەزيدەنت جارلىعىمەن تاعايىندالعان تۋريزم جانە سپورت ءمينيسترى ەربول مىرزابوسىنوۆتىڭ انت قابىلداۋىمەن باستالدى. پرەمەر-مينيستر جاۋاپتى قىزمەتتە جاڭا مينيسترگە تابىس تىلەپ, بۇرىنعى مينيستر ەرمەك مارجىقپاەۆقا اتقارعان جۇمىسى ءۇشىن العىسىن ءبىلدىردى.
وتىرىستىڭ كۇن تارتىبىندەگى نەگىزگى ماسەلەنى قاراۋ بارىسىندا ۇكىمەت باسشىسى پرەزيدەنتتىڭ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى جولداۋى ءاربىر جولى قازىرگى زاماننىڭ شىنايى تالاپتارى مەن سىن-قاتەرلەرىنە جاۋاپ بەرەتىن ماڭىزدى ءارى دەر كەزىندە جاريالانعان قۇجات ەكەنىن اتاپ ءوتتى.
«پرەزيدەنتتىڭ جولداۋىن ساپالى ىسكە اسىرۋ – ءبىزدىڭ باستى مىندەتىمىز. مەملەكەت باسشىسى اتاپ وتكەندەي, بۇل ماقساتقا ەكونوميكانىڭ قۇرىلىمىن وزگەرتۋ ارقىلى قول جەتكىزە الامىز. سالالارداعى مۇنداي وزگەرىستەر قازىردىڭ وزىندە تاۋ-كەن سەكتورىنىڭ ۇلەسىن ازايتىپ, وڭدەۋ ونەركاسىبىنىڭ ءوسۋ قارقىنىن ارتتىرۋعا مۇمكىندىك بەردى. سونداي-اق ءبىز جوعارى دەڭگەيدە وڭدەلگەن ءونىم شىعارۋعا باسىمدىق بەرەتىن بولامىز. بۇل سالانىڭ الەۋەتى ۇلكەن. مەملەكەت باسشىسى ۇكىمەت پەن اكىمدىكتەر بارىنشا كوڭىل بولۋگە ءتيىس پروبلەمالاردى ناقتى بەلگىلەپ بەردى. بارلىق مەملەكەتتىك ورگاندار پرەزيدەنت ايتقان تاپسىرمالاردى جان-جاقتى پىسىقتاپ, قويىلعان مىندەتتەردى شەشۋدىڭ ناقتى جولدارىن ايقىنداۋى قاجەت», دەدى ولجاس بەكتەنوۆ.
ۇكىمەت باسشىسى بيۋدجەت قاراجاتىن وڭتايلى جۇمساۋدىڭ ماڭىزدىلىعىنا توقتالدى. سونداي-اق رەسپۋبليكالىق بيۋدجەتتىڭ كىرىس بولىگىن قامتاماسىز ەتۋ باعىتىندا جۇمىستى ەداۋىر كۇشەيتۋ قاجەت ەكەنىن ايتتى.
ستراتەگيالىق باعدار جولىندا
پرەمەر-مينيستر مەملەكەت باسشىسىنىڭ جولداۋى ۇكىمەت پەن قوعام ءۇشىن ستراتەگيالىق باعدار ەكەنىن اتاپ كورسەتتى.
«جولداۋ بىزگە تاياۋ مەرزىمگە ارنالعان ماقسات-مىندەتتەرمەن قاتار نىسانالى كورسەتكىشتەرى جانە ينديكاتورلارى بەلگىلەنگەن ناقتى ءىس-قيمىل الگوريتمىن ايقىنداپ بەردى. ءاربىر تارماقتىڭ ورىندالۋى قاتاڭ باقىلاۋدا بولادى. بۇل رەتتە قورىتىندى ناتيجەگە, ونىڭ ەكونوميكاعا تيىمدىلىگىنە باسا نازار اۋدارىلادى. ازاماتتاردىڭ تابىس دەڭگەيىن ارتتىرۋ – ۇكىمەت جۇمىسىنىڭ وزگەرمەيتىن باستى ماقساتى. كاسىپكەرلىكتى دامىتۋ, حالىقتى جۇمىسپەن قامتۋ ءۇشىن قولايلى جاعدايلار جاساۋ جانە مەملەكەتتىك بيۋدجەتتى ۇتىمدى ءبولۋ ايتارلىقتاي ەكونوميكالىق ورلەۋگە قول جەتكىزۋگە مۇمكىندىك بەرەدى. بۇل رەتتە مەملەكەت باسشىسى اتاپ وتكەندەي, «ەكونوميكا وسكەن سايىن الەۋمەتتىك تەڭسىزدىك ازايىپ, ورتا تاپ كۇشەيە ءتۇسۋى كەرەك. مەملەكەت باسشىسى تەرەڭ وڭدەۋ كلاستەرلەرىن قۇرۋ جونىندەگى ءاربىر ءىرى جوبا بويىنشا ءوز شيكىزاتىمىز بەن قۇرال-جابدىقتارىمىزدى بارىنشا پايدالانۋ ماڭىزدى ەكەنىن اتاپ ايتتى. وسىعان بايلانىستى ۇلتتىق ەكونوميكا مينيسترلىگى سالالىق مەملەكەتتىك ورگاندارمەن بىرلەسىپ, وتاندىق وندىرۋشىلەردى قولداۋ ماسەلەلەرىن نەعۇرلىم بەلسەندى ىلگەرىلەتۋدى جانە ساباقتاس وندىرىستەردى قۇرا وتىرىپ, كلاستەرلىك جۇيەنى دامىتۋدى ەسكەرىپ, ءاربىر جوبانى ىسكە اسىرۋدىڭ ناقتى جوسپارىن جاڭارتۋى قاجەت. اۆتوموبيل ونەركاسىبى بويىنشا ونەركاسىپ مينيسترلىگىنە وندىرىستەردى لوكاليزاتسيالاۋ دەڭگەيىن بەلسەندى ارتتىرۋدى تاپسىرامىن», دەدى ۇكىمەت باسشىسى.
ۇكىمەت باسشىسى گازبەن قامتۋ ماسەلەسىنە دە نازار اۋدارىپ, سالاعا تالداۋ جۇرگىزۋ جانە قانداي ەنەرگيا وبەكتىلەرى گازعا اۋىستىرىلاتىنىن ايقىنداۋ قاجەت ەكەنىنە ءمان بەردى. جاڭا گاز وڭدەۋ قۋاتتارىن سالۋ ءۇشىن ەنەرگەتيكا مينيسترلىگىنە ينۆەستيتسيالىق شەشىمدەر قابىلداۋدى جەدەلدەتۋ تاپسىرىلدى. ەلدىڭ ەنەرگەتيكالىق قاۋىپسىزدىگىن قامتاماسىز ەتۋ جونىندەگى مىندەتتەردى ورىنداۋ ءۇشىن قارجىلىق دامۋ ينستيتۋتتارىمەن بىرلەسىپ 1 قاراشاعا دەيىن جاڭا گەنەراتسيا نىساندارىنىڭ قۇرىلىسىنا ۇزاقمەرزىمدى كرەديت بەرۋ تەتىكتەرىن ازىرلەۋ قاجەت. سونداي-اق ەنەرگەتيكا مينيسترلىگى مۇددەلى مەملەكەتتىك ورگاندارمەن بىرلەسىپ 6 قازاندا رەسپۋبليكالىق رەفەرەندۋمدى ۇيىمداستىرۋ جانە ساپالى وتكىزۋ جونىندە شارالار قابىلداۋعا ءتيىس.
ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن بىرلەسىپ بيىلعى 1 قاراشاعا دەيىن ۇكىمەتكە ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋ جونىندەگى ۇلتتىق جوبانى بەكىتۋ جونىندەگى قاۋلى جوباسىن ەنگىزۋ جۇكتەلدى.
«مەملەكەت باسشىسى كەلەسى جىلدان باستاپ ناقتى تۇتىنۋ نورمالارىن ەنگىزۋ قاجەتتىگىن اتاپ ءوتتى. سوندىقتان ادامداردى رەسۋرستاردى ۇتىمدى پايدالانۋعا ىنتالاندىرۋ كەرەك. ۇلتتىق ەكونوميكا مينيسترلىگى جىل سوڭىنا دەيىن تابيعي مونوپوليالار سالاسىندا رەتتەلىپ كورسەتىلەتىن كوممۋنالدىق قىزمەتتەردى تۇتىنۋ مولشەرىنە قاراي تۇتىنۋ نورمالارىن ەنگىزسىن», دەپ تاپسىرما بەردى ولجاس بەكتەنوۆ.
پرەمەر-مينيستر كولىك-لوگيستيكا سەكتورىنىڭ ماسەلەلەرىنە نازار اۋدارىپ, كولىك ينفراقۇرىلىمىن قولداۋ مەن دامىتۋ ۇلكەن ينۆەستيتسيالاردى تارتۋدى تالاپ ەتەتىنىن ەسكەرتتى. وسىنداي شارالاردىڭ ءبىرى – «قازاقستان تەمىر جولى» ۇك كورسەتەتىن قىزمەتتەردىڭ تاريفتەرىن قايتا قاراۋ. سوعان وراي «سامۇرىق-قازىنا» قورى كولىك مينيسترلىگىمەن بىرگە جۇكتەردى تەمىرجول كولىگىمەن تاسىمالداۋدىڭ جاڭا تاريفتىك ساياساتىن ازىرلەۋى قاجەت.
وبلىسارالىق جانە اۋدانارالىق باعىتتارداعى جولداردى ورتاشا جوندەۋدى قامتۋدى ۇلعايتۋ ءۇشىن كولىك مينيسترلىگىنە وسى جىلدىڭ 1 جەلتوقسانىنا دەيىن ناقتى جوبالاردى, كورسەتكىشتەردى جانە قارجىلاندىرۋ كوزدەرىن ايقىنداي وتىرىپ, ەگجەي-تەگجەي جوسپار ازىرلەۋ تاپسىرىلدى. قاراجاتتىڭ ماقساتقا ساي جۇمسالۋىن باقىلاۋدىڭ ءبارى جانە وسى جۇمىستاردىڭ مونيتورينگى بىرىڭعاي تسيفرلىق پلاتفورما ارقىلى جۇرگىزىلۋگە ءتيىس.
كولىك مينيسترلىگىنە ونەركاسىپ مينيسترلىگىمەن جانە «بايتەرەك» حولدينگىمەن بىرلەسىپ شاعىن اۋە كەمەلەرىن ساتىپ الۋ تەتىكتەرىن پىسىقتاۋ جونىندە تاپسىرما بەرىلدى.
تسيفرلاندىرۋ جانە ەكولوگيا مادەنيەتى
مەملەكەت باسشىسىنىڭ جولداۋىندا بەرگەن تاپسىرمالارىن ىسكە اسىرۋ شەڭبەرىندە پرەمەر-مينيستر شارۋالاردى قارجىلاندىرۋ جۇيەسىن قايتا قاراۋ جونىندەگى نەگىزگى مىندەتتەردى بەلگىلەدى. اۋىل شارۋاشىلىعى مينيسترلىگىنە قارجى-ەكونوميكالىق بلوكپەن جانە «بايتەرەك» حولدينگىمەن بىرگە تىكەلەي سۋبسيديا بەرۋدەن تومەندەتىلگەن مولشەرلەمەلەر بويىنشا قولجەتىمدى نەسيە بەرۋگە بىرتىندەپ كوشۋ تەتىگىن ازىرلەۋدى تاپسىردى. بۇل جۇمىسقا ەكىنشى دەڭگەيدەگى بانكتەردى تارتۋ كەرەك.
مال شارۋاشىلىعى مەن وسىمدىك شارۋاشىلىعىنداعى دەرەكتەردى بۇرمالاۋ فاكتىلەرىنە قاتىستى سالانى تسيفرلاندىرۋ جونىندەگى جۇمىستى كۇشەيتۋ جانە دەرەكتەردى كەز كەلگەن بۇرمالاپ بەرۋدىڭ جولىن كەسۋ قاجەت. سونداي-اق باس پروكۋراتۋرامەن بىرلەسىپ, جەردى الىپ قويۋدىڭ وڭايلاتىلعان ءتارتىبىن ازىرلەپ, قابىلداۋدى جۇكتەدى.
«مەملەكەت باسشىسى ەلىمىزدىڭ ورمان القاپتارىن ۇلعايتۋدى, ونىڭ ىشىندە «سەمەي ورمانى» رەزەرۆاتىنىڭ تۇقىمدىق ماتەريال وسىرۋدەگى تاجىريبەسىن پايدالانۋدى تاپسىردى. ەكولوگيا مينيسترلىگى وسى جوبانى ورماندى وڭىرلەردىڭ بارىنە تاراتۋى كەرەك. ەكولوگيالىق مادەنيەتتى دامىتۋدىڭ 2029 جىلعا دەيىنگى تۇجىرىمداماسى قورشاعان ورتانى تازا كۇيىندە ساقتاۋدىڭ جانە «تازا قازاقستان» ەكولوگيالىق ناۋقانىنىڭ جالعاسىنا اينالۋعا ءتيىس. بۇل تۇجىرىمدامانى وسى ايدىڭ سوڭىنا دەيىن قابىلداۋ قاجەت», دەپ اتاپ ءوتتى ۇكىمەت باسشىسى.
