فوتو: استانا اكىمدىگى
2024 جىلدىڭ باستى سپورتتىق دوداسى سانالاتىن پاريج پاراليمپياداسىندا نىسانا كوزدەۋدەن قوس وتانداسىمىز جۇلدەگە تالاسىپ, ەركىن عابباسوۆ تاريحي كۇمىس مەدالدى يەلەنسە, ايەلدەر باسەكەسىندە استانالىق ارۋ سەۆدا اليەۆا 13-ورىنعا تۇراقتادى.
وسى ورايدا نىسانا كوزدەۋدەن ەل سپورتشىلارى تەك 2021 جىلعى توكيو پاراليمپياداسىنان باستاپ قانا قاتىسىپ جاتقانىن ايتا كەتۋ كەرەك.
«نىسانا كوزدەۋدەن نەبارى ءۇشىنشى حالىقارالىق جارىسىم. سوندىقتان پاريج پاراليمپياداسىنا قاتىسۋدىڭ ءوزى ۇلكەن تاجىريبە. ءىرى دودالار ارقىلى قاتەلىگىڭدى كورىپ, نەمەن جۇمىس ىستەۋ كەرەكتىگىڭدى اڭعاراسىڭ. ەندى كەلەسى پاراليمپيادادا جۇلدەمەن ورالۋعا ءتيىسپىن. ەلىمىزدىڭ كوك تۋىن اشىلۋ سالتاناتىندا ۇستاپ شىعۋ باقىتى بۇيىردى. تەك قانا قازاقستان عانا ەمەس, بۇكىل الەم كوز تىككەن پاريج پاراليمپياداسىنىڭ اتموسفەراسىن سوزبەن ايتىپ, جەتكىزۋ مۇمكىن ەمەس. بۇعان دەيىن وزدەرىڭىز بىلەتىندەي, 2023 جىلى بي سپورتىنداعى ەڭ بيىك جەتىستىك – الەم چەمپيونى اتاندىم. كوپشىلىكتىڭ الدىندا ءوزىن-ءوزى ۇستاۋ, قىسىلماۋ سەكىلدى ماڭىزدى قاسيەتتەر نىسانا كوزدەۋدە دە ءوز پايداسىن تيگىزدى دەپ ويلايمىن. ەندى ماقساتتارىمىز جوعارلاي بەرمەك», دەدى سەۆدا اليەۆا.
سونداي-اق ەرلەر اراسىندا كۇمىس جۇلدەگەر اتانعان ەركىن عابباسوۆ تا ءوز ويىن ءبولىستى.
«دايىندىق الماتى قالاسىندا ءوتتى. ارينە, ءبىرىنشى رەت كۇمىس مەدال الۋ – جوعارى جەتىستىك. چەمپيون اتانعان, رەكوردتى جاڭارتۋشى جين حو پاركقا (وڭتۇستىك كورەيا) ءسال عانا جەتپەي قالدىم. بۇل سپورتشى 2016 جىلدان بەرى تۇراقتى تۇردە قاتىسىپ, جۇلدە دە الىپ ۇلگەرگەن. تاجىريبەسى تولىسقان, قاي كەزدە قانداي تاكتيكانى قولدانۋدى بىلەدى. وسىمەن بيىلعا ارنالعان سپورتتىق كۇنتىزبە اياقتالدى. ەندى ءسال تىنىعىپ, قايتا جاتتىعۋعا كىرىسەتىن بولامىز», دەدى سپورتشى.
ايتا كەتەيىك, پاريج پاراليمپياداسىنا قازاقستان اتىنان 44 سپورتشى 9 سپورت تۇرىنەن جۇلدەگە تالاسىپ جاتىر.
