وبلىس اكىمى نۇرلىبەك نالىباەۆ «سىر انا» مونۋمەنتىندەگى «بىرلىك كەرۋەنى» ءىس-شاراسىنا قاتىسىپ, ويىنشىلارعا ساتتىلىك تىلەدى.
«مەملەكەت باسشىسى قاسىم-جومارت كەمەل ۇلى «قازاقستانداعى دۇنيەجۇزىلىك كوشپەلىلەر ويىندارى ءىرى وقيعا بولماق. ولار ۇلتتىق سپورت پەن سالاماتتى ءومىر سالتىن ناسيحاتتاۋ ءۇشىن دە, باۋىرلاس حالىقتار – ۇلى دالا كوشپەلى وركەنيەتىنىڭ مۇراگەرلەرى اراسىنداعى مادەني جانە گۋمانيتارلىق بايلانىستاردى كەڭەيتۋ ءۇشىن دە ماڭىزدى», دەپ اتاپ وتكەنىن بىلەسىزدەر. دۇنيەجۇزىلىك كوشپەلىلەر ويىندارى اياسىندا بۇگىنگە دەيىن ءتۇرلى دەڭگەيدەگى 80-نەن اسا ءىس-شارا ۇيىمداستىرىلدى. سۋ الۋ ءراسىمى كونەدەن كەرۋەن تارتقان, كوشپەلىلەر وركەنيەتىنىڭ تاريحىنان سىر شەرتەتىن قارت قاراتاۋدىڭ ەتەگىندەگى ساۋىسقاندىق شاتقالىندا وتكىزىلدى. باعزى بابالاردان قالعان ارحەولوگيالىق مۇرا – ساۋىسقاندىق پەتروگليفتەرى قادىم زامان كۋاگەرى. ءبىزدىڭ زامانىمىزعا دەيىنگى ءىى مىڭجىلدىق باسىندا ۇلى دالانىڭ بايراقتى ۇلدارى ءومىر تىرشىلىگىن تاسقا قاشاپ جازىپ, الەمدىك رۋحانيات پەن مادەني مۇراعا ولشەۋسىز ۇلەس قوسقان شاتقالدان باستالعان سۋ الۋ ءراسىمى بۇگىن قىزىلوردا قالاسىندا جالعاسىن تاۋىپ وتىر. سىر وڭىرىنەن استانا قالاسىنا اتتاناتىن كيەلى سۋدى جەتكىزەتىن باتىرلارىمىزدىڭ, سەنىم ارتقان ەلشىلەرىمىزدىڭ ساپارى ءساتتى بولسىن», دەدى ءوڭىر باسشىسى.
نۇرلىبەك نالىباەۆ كەرۋەن كوشباسشىسى, «قازاقستان بارىسى» ماقسات يساعابىلوۆقا تورسىققا قۇيىلعان سۋدى تابىستاپ, سايىستا ساتتىلىك تىلەدى.
«سىر انا» مونۋمەتىندە ۇيىمداستىرىلعان سالتاناتتى ءىس-شاراعا جيىلعاندار سىردان ەلورداعا اتتاناتىن باتىرلار مەن ەلشىلەر كەرۋەنىن قوشەمەتپەن شىعارىپ سالدى. ءسان-سالتاناتىمەن ساپارعا اتتانعان كەرۋەن بەيبارىس سۇلتان داڭعىلىمەن ءجۇرىپ ءوتىپ, جولعا ءتۇستى.
سانانى سەرپىلتىپ, تاريحي جادتى جاڭعىرتاتىن اۋقىمدى ءىس-شارادا سىر ءوڭىرىنىڭ اتىنان 3 سپورت تۇرىنەن 4 جەرلەسىمىز سايىسقا تۇسەدى. جالپى, 7 كۇنگە سوزىلاتىن جارىستارعا 100-دەن اسا ەلدەن 3 مىڭعا جۋىق قاتىسۋشى كەلەدى.
قىزىلوردا
