توقاەۆ جىلۋ-ەنەرگەتيكالىق ورتالىقتار مەن تۇتىنۋشىلاردى كومىردىڭ ورنىنا گاز جاعۋعا كوشىرۋ جۇمىستارىن بايىپپەن جۇرگىزۋ قاجەتتىگىن اتاپ ءوتتى. وسىعان بايلانىستى ۇكىمەتكە گاز وڭدەۋ زاۋىتتارىنىڭ قۇرىلىسىن جەدەلدەتۋدى تاپسىردى.
«ۇكىمەتكە جاڭاوزەندەگى, قاشاعانداعى جانە قاراشىعاناقتاعى گاز وڭدەۋ كاسىپورىندارىنىڭ قۇرىلىسىن تەزدەتۋدى تاپسىرامىن. بۇل – باستى مىندەت», دەدى پرەزيدەنت ق.توقاەۆ.
ول سونىمەن قاتار ورتالىق ازيا – ورتالىق گاز قۇبىرىنىڭ 800 شاقىرىمنان استامىن جاڭعىرتۋ جۇمىستارى قىسقا مەرزىمدە اياقتالعانىن اتاپ ءوتتى.
اەس-كە قاتىستى رەفەرەندۋم وتەدى
قازاقستان پرەزيدەنتى قاسىم-جومارت توقاەۆ حالىققا ارناعان جولداۋىندا 6 قازان كۇنى ەلدە اتوم ەلەكتر ستانساسىن سالۋ ماسەلەسىنە قاتىستى حالىقتىڭ شەشىمىن ناقتىلايتىن رەفەرەندۋم وتەتىنىن ايتتى.
پرەزيدەنت ق.توقاەۆ الەمدىك ەنەرگيا تاپشىلىعىنا نازار اۋدارا وتىرىپ, جاڭارتىلاتىن جانە ەكولوگيالىق تازا ەنەرگيا كوزدەرى قاجەت ەكەنىن اتاپ ءوتتى.
ء«بىز اتوم ەنەرگەتيكاسىن دامىتۋعا باسا ءمان بەرۋىمىز كەرەك دەپ ويلايمىن. سەبەبى ەكونوميكامىز كۇن وتكەن سايىن مول ەنەرگيانى قاجەت ەتىپ وتىر. مۇنداي سۇرانىستى اتوم ەنەرگەتيكاسى قامتاماسىز ەتە الادى. قازىر دامىعان جانە دامۋشى 30 مەملەكەتتە 200-گە جۋىق اتوم ەلەكتر ستانساسى جۇمىس ىستەپ تۇر.
ءبىز ەلىمىزدىڭ وزىنە ءتان ەرەكشەلىگىن جانە ۇزاق مەرزىمگە ارنالعان ۇلتتىق مۇددەلەرىمىزدى ەسكەرە وتىرىپ, تەك العا قاراي ءجۇرۋىمىز قاجەت. ءبىر سوزبەن ايتساق, بولاشاقتى ويلاۋىمىز كەرەك. سوندىقتان مەن اتوم ەلەكتر ستانساسىن سالۋعا قاتىستى بارىنشا بايىپتى شەشىم قابىلداۋ قاجەتتىگىن ۇدايى ايتىپ كەلەمىن», دەگەن ق.توقاەۆ مۇنداي ستراتەگيالىق جوسپاردى قوعامدا كەڭىنەن تالقىلاۋ قاجەت ەكەنىن العا تارتتى.
تىلگە بايلانىستى قىسىم جوق
«قازاقستاندا تىلىنە, دىنىنە, ۇلتىنا, الەۋمەتتىك جاعدايىنا جانە باسقا دا سەبەپتەرگە بايلانىستى ەشكىمگە ەشقانداي قىسىم جاسالمايدى, جاسالۋى دا مۇمكىن ەمەس», دەدى مەملەكەت باسشىسى قاسىم-جومارت توقاەۆ جىل سايىنعى حالىققا ارناعان جولداۋىندا.
پرەزيدەنتتىڭ ايتۋىنشا, مۇنداي جايتتار ارا-تۇرا كەزدەسەدى. بىراق كوبىنە جەكەلەگەن ادامداردىڭ ساۋاتسىزدىعى مەن جاۋاپسىزدىعىنان بولىپ جاتادى. توقاەۆ مۇنداي وقيعالاردىڭ جولىن قۇقىق قورعاۋ ورگاندارى ءاردايىم زاڭ ارقىلى كەسىپ وتىراتىنىن جەتكىزدى.
«بۇعان قوسا بىزگە بەلگىلى كەيبىر تەرىس پيعىلدى ادامدار, ونىڭ ىشىندە شەتەلدە جۇرگەندەر دە بار, ماسەلەنى ۋشىقتىرۋ ارقىلى قوعامدىق پىكىرگە ىقپال ەتكىسى كەلەدى, ەلىمىزگە ورىنسىز شۇيلىگەدى. قازاقستاننىڭ قوعامىندا دا, بيلىگىندە دە ەشقانداي «فوبيا» بۇعان دەيىن بولعان ەمەس, قازىر دە جوق, بولاشاقتا دا بولمايدى. سوندىقتان اقشا ءۇشىن ەل ىشىنە ىرىتكى سالۋدى كوزدەيتىن مۇنداي جىمىسقى ارەكەتتەردەن تۇك شىقپايتىنى انىق», دەدى قاسىم-جومارت توقاەۆ.
«ۇكىمەت پەن باس پروكۋراتۋرا بىرلەسە جۇمىس ىستەۋگە ءتيىس»
قازاقستاننىڭ الداعى كەزەڭدەگى ساياسي جانە الەۋمەتتىك-ەكونوميكالىق دامۋ بولاشاعىنا ارنالعان بيىلعى جولداۋىندا قاسىم-جومارت توقاەۆ اكتيۆتەردى مەملەكەتكە قايتارۋعا قاتىستى پىكىر ءبىلدىردى.
ياعني ء«تيىستى رەەسترگە ەنگىزىلگەن كاسىپكەرلەرمەن كەلىسىم جاساعان كەزدە مەملەكەتكە قايتارىلاتىن اكتيۆتەردى «زاڭسىز» دەپ تانىماۋ تۋرالى نورمانى بەكىتۋگە بولادى. بۇل – شىن مانىندە, ءىرى كاسىپ يەلەرىنىڭ مۇددەسىنە ساي كەلەتىن ماڭىزدى قادام», دەگەن قازاقستان پرەزيدەنتى كاسىپكەرلەر قارجىنى رەسپۋبليكالىق بيۋدجەتكە اۋدارۋ ماسەلەسىنە كەلگەندە ۇكىمەتپەن, باس پروكۋراتۋرامەن تىعىز بايلانىستا جۇمىس ىستەۋگە ءتيىس ەكەنىن ەسكەرتىپ, ءار تەڭگە ءۇشىن ساۋدالاسپاي, قاجەتتى شارانىڭ ءبارىن ءوز ەركىمەن جاساۋعا شاقىردى. سونداي-اق مەملەكەت باسشىسى قۇزىرلى ورگاندارعا زاڭسىز ماينينگپەن اينالىساتىندارمەن كۇرەسۋدى تاپسىردى.
«تسيفرلىق اكتيۆتەر مەن ماينينگتى زاڭمەن رەتتەپ, كريپتوبيرجالاردى ودان ءارى دامىتۋ ءىسىن جالعاستىرعان ءجون. ەلىمىزدە ەكونوميكاعا قاجەتتى ەلەكتر قۋاتىن ءوز كەرەگىنە شامادان تىس پايدالاناتىن, سويتە تۇرا سالىقتى از تولەيتىن كاسىپكەرلەر بار. مىنە, وسىندايلاردى جونگە سالۋ كەرەك», دەدى ق.توقاەۆ.
«تسيفرلىق جىبەك جولى» جوباسىنىڭ ءبىر بولىگى
توقاەۆ كاسپي تەڭىزى ارقىلى تالشىقتى-وپتيكالىق بايلانىس جەلىسىن تارتۋ جوباسىنىڭ 2025 جىلى اياقتالاتىنىن مالىمدەدى.
«ەلىمىز ءۇشىن بۇل جوبانىڭ ماڭىزى زور. سول ارقىلى مالىمەتتەردىڭ حالىقارالىق ارناسىمەن جانە ترانسشەكارالىق اعىنىمەن بايلانىستى تسيفرلىق ينفراقۇرىلىم قۇرا الامىز», دەدى قازاقستان پرەزيدەنتى حالىققا ارناعان جولداۋىندا.
جالپى, ق.توقاەۆ تەلەكوممۋنيكاتسيا جەلىلەرى مەن داتا-ورتالىقتارىن بارىنشا جەتىلدىرۋگە, كيبەر-قاۋىپسىزدىكتىڭ الەمدىك ستاندارتتارىن ەنگىزۋگە جانە مامانداردىڭ بىلىكتىلىگىن ارتتىرۋعا قاتىستى جۇمىستى جالعاستىرۋ كەرەكتىگىن باسا ايتتى. سونداي-اق ول اۋە حابتارىن دامىتۋ – وتە ماڭىزدى مىندەت ەكەنىن دە اتاپ ءوتتى. قازاقستاننىڭ اۋە كەڭىستىگى ارقىلى جىل سايىن 150 مىڭ تونناعا جۋىق جۇك تاسىمالدانادى.
