سۋرەتتى تۇسىرگەن – ن.بايبۋلين
«Senat Open» سايىسىنا 2000-نان استام اۋەسقوي شاحماتشى قاتىستى. ولاردىڭ قاتارىندا بارلىق دەڭگەيدەگى ءماسليحات دەپۋتاتتارى, وبلىستىق جانە قالالىق قوعامدىق كەڭەستىڭ مۇشەلەرى جانە باق وكىلدەرى بار.
ماۋلەن اشىمباەۆ ءوز سوزىندە مۇنداي تۋرنيرلەر ەلىمىزدە, ونىڭ ىشىندە وڭىرلەردە شاحماتتى دارىپتەپ, دامىتۋعا ايتارلىقتاي ىقپال ەتەتىنىن ايتتى. سونداي-اق ول بۇل باعىتقا مەملەكەت باسشىسى باسا ءمان بەرىپ وتىرعانىن تىلگە تيەك ەتتى.
«پرەزيدەنتىمىز قاسىم-جومارت كەمەل ۇلى توقاەۆ ەلىمىزدە شاحماتتى دامىتۋعا جانە دارىپتەۋگە ەرەكشە كوڭىل ءبولىپ كەلەدى. بۇگىندە بۇل باعىتتا اۋقىمدى جۇمىس اتقارىلىپ جاتىر. سونىڭ اياسىندا زياتكەرلىك ويىندى دارىپتەۋ ماقساتىمەن «Senat Open» ءتۋرنيرىن وتكىزۋدى قولعا الدىق. سايىسقا پارلامەنت پەن ءماسليحات دەپۋتاتتارى, اكىمدىكتەر جانىنداعى قوعامدىق كەڭەستەردىڭ مۇشەلەرى جانە باق وكىلدەرى قاتىستى. بۇگىن – 5 ايعا جالعاسقان ءتۋرنيردىڭ شەشۋشى كەزەڭى. فينالدىق كەزەڭگە وبلىستىق, سونداي-اق استانا, الماتى جانە شىمكەنت ءماسليحاتتارىنىڭ توراعالارى باستاعان بارلىق ءوڭىردىڭ دەلەگاتسيالارى قاتىسىپ جاتىر», دەدى پالاتا سپيكەرى.
سونىمەن قاتار سەنات توراعاسى بىلتىر ەلىمىزدە شاحماتتى دامىتۋعا ارنالعان 2027 جىلعا دەيىنگى كەشەندى جوسپار قابىلدانعانىن اتاپ ءوتتى. بۇل قۇجات شاحماتتى بالالار مەن ەرەسەكتەر اراسىندا كەڭىنەن ناسيحاتتاۋدى, وتاندىق شاحماتشىلاردىڭ الەمدىك ارەناداعى دەڭگەيىن ارتتىرۋدى كوزدەيدى. سونداي-اق قازىرگى تاڭدا مەكتەپتەردە شاحماتتى ۇيرەتۋ «دەنەشىنىقتىرۋ» ءپانىنىڭ ۇلگىلىك وقۋ جوسپارىنا ەنگىزىلگەنىن ايتا كەتكەن ابزال. سونىڭ ناتيجەسىندە جۇزدەگەن مەكتەپتە شاحمات سپورتى بويىنشا فاكۋلتاتيۆتەر جۇمىس ىستەيدى.
ايتا كەتەيىك, «Senat Open» ءتۋرنيرى پارلامەنت سەناتىنىڭ قولداۋىمەن جانە قازاقستان شاحمات فەدەراتسياسىنىڭ (KazChess) ۇيىمداستىرۋىمەن العاش رەت وتكىزىلىپ وتىر. ىرىكتەۋ كەزەڭى 21 ساۋىردە باستالدى. جارىس ەلىمىزدىڭ بارلىق وڭىرىندە, ناقتى ايتقاندا, 15 وبلىستا جانە رەسپۋبليكالىق ماڭىزى بار ءۇش قالادا ۇيىمداستىرىلدى. ءار وڭىردەن ۇزدىك 25 ويىنشى سولتۇستىك, وڭتۇستىك, باتىس, شىعىس جانە ورتالىق بولىپ ايماقتىق قاعيدات بويىنشا قۇرىلعان جارتىلاي فينالدىڭ بىرىندە ويناۋ مۇمكىندىگىنە يە بولدى. سولاردىڭ اراسىنان استانادا وتكەن فينالدىق كەزەڭگە 120-دان استام شاحماتشى جولداما الدى.
«Senat Open» ءتۋرنيرى ءماسليحات دەپۋتاتتارىن, قوعام قايراتكەرلەرىن جانە باق وكىلدەرىن ورتاق ماقساتقا ۇيىستىرعان شاحمات مارافونىنا اينالدى. سونداي-اق قازاقستان شاحمات فەدەراتسياسى مەن جەرگىلىكتى اتقارۋشى ورگاندار اراسىندا ءوزارا ءىس-قيمىلدى نىعايتۋعا سەپتىگىن تيگىزدى. وسىنداي ىنتىماقتاستىق شاحماتتى حالىق اراسىندا كەڭىنەن دارىپتەۋدى, مەكتەپ باعدارلامالارىنا شاحماتتى ەنگىزۋدى جانە زياتكەر ۇلت قالىپتاستىرۋدى كوزدەيتىن جوبالاردى ىسكە اسىرۋعا مۇمكىندىك بەرەدى. بۇل ءبىزدىڭ ۇلتتىق مۇددە جولىنداعى باسىم باعىتتارىمىزدىڭ ءبىرى. بيىل العاش رەت وتكىزىلگەن سەنات كۋبوگى ءداستۇرلى جارىسقا اينالادى دەپ سەنەمىن», دەدى KazChess پرەزيدەنتى تيمۋر تۋرلوۆ.
ايتا كەتەيىك, فينالدىق كەزەڭنىڭ جەڭىمپازدارى 9 تۋردان تۇراتىن راپيد سايىسىنىڭ قورىتىندىسى بويىنشا انىقتالدى.
