فوتو: اقوردا
باسقوسۋدا ەرلان قارين مەملەكەت باسشىسى ۇلتتىق قۇرىلتايدىڭ قىزمەتى اياسىندا كوتەرگەن ماڭىزدى باستامالاردىڭ جۇزەگە اسىرىلۋىنا توقتالدى. سونىڭ ىشىندە ايەلدەر مەن بالالاردىڭ قۇقىقتارىن قورعاۋعا, ۆەيپتەرگە تىيىم سالۋعا, لۋدومانياعا, ۆانداليزمگە قارسى كۇرەسكە قاتىستى بىرقاتار زاڭنىڭ قابىلدانۋىن جانە باسقا دا ماسەلەلەردى اتاپ وتۋگە بولادى.
سونىمەن قاتار مەملەكەتتىك كەڭەسشى پرەزيدەنت قاسىم-جومارت توقاەۆتىڭ تاپسىرماسىمەن ءبىرتۇتاس تاربيە باعدارلاماسى ازىرلەنىپ, مەكتەپتەرگە جاپپاي ەنگىزىلەتىنىن اتاپ ءوتتى.
سونداي-اق ەرلان قارين ازاماتتىق ينستيتۋتتاردى, اسىرەسە, وڭىرلەردەگى ازاماتتىق سەكتوردى دامىتۋدىڭ ماڭىزدى ەكەنىنە نازار اۋداردى. بۇل رەتتە قوعامدىق كەڭەستەر ايرىقشا ءرول اتقارادى.
ءوز كەزەگىندە ۇلتتىق قۇرىلتايدىڭ ايماقتاردان كەلگەن مۇشەلەرى وڭىرلەردى وركەندەتۋگە قاتىستى وزەكتى ماسەلەلەرگە توقتالدى. سونىمەن قاتار جەرگىلىكتى حالىقپەن جانە قوعامداعى توپتارمەن ءوزارا قارىم-قاتىناس ورناتۋدىڭ ءادىس-تاسىلدەرى تۋرالى وي-پىكىرلەرىن جەتكىزدى.
بۇدان بولەك ۇلتتىق قۇرىلتايدىڭ مۇشەلەرى پىكىر الماسۋ بارىسىندا مەملەكەت باسشىسىنىڭ قازاقستان حالقىنا ارناعان جولداۋىندا ايتىلعان باستامالارعا قولداۋ ءبىلدىردى.
جيىن سوڭىندا مەملەكەتتىك كەڭەسشى الداعى ۋاقىتتا ۇلتتىق قۇرىلتاي مۇشەلەرىمەن تاعى دا بىرقاتار كەزدەسۋ وتەتىنىن ايتتى.
