فوتو: baq.kz
قاسىم-جومارت توقاەۆ اۋىل تۇرعىندارىنىڭ ءال-اۋحاتىن كوتەرۋ ىسىنە جەردەن پايدا كورىپ وتىرعان مەنشىك يەلەرىن بەلسەندى اتسالىسۋعا ۇندەدى.
«كوپتەگەن مەنشىك يەسى وزدەرى پايداسىن كورىپ وتىرعان جەردەن مىڭداعان شاقىرىم الىستا تۇرادى, ونداعى اۋىل تۇرعىندارىنا قامقورلىق جاساۋ ويىنا كىرىپ تە شىقپايدى. بىزگە مۇنداي جەر يەلەرىنىڭ قاجەتى جوق. ۇكىمەت پەن باس پروكۋراتۋرا ولارعا قاتىستى ماسەلەنى مىقتاپ قولعا الۋعا ءتيىس.
ازاماتتار, اسىرەسە, اۋىل تۇرعىندارى زاڭدى تۇردە تابىستى جۇمىس ىستەپ, بولاشاعىنىڭ قامىن ءوزى ويلاۋى كەرەك. ولاردى وسىعان ىنتالاندىرۋ – مەملەكەتتىڭ باستى مىندەتىنىڭ ءبىرى», دەدى مەملەكەت باسشىسى.
پرەزيدەنت بىلتىر باستالعان «اۋىل اماناتى» جوباسى اياسىندا اتقارىلىپ جاتقان جۇمىستاردىڭ ناتيجەسى جامان ەمەس ەكەنىن اتاپ ءوتتى.
«ەندى وسى جوبا اياسىندا تاعى ءبىر جاڭا ءتاسىلدى, ياعني «تاۋار نەسيەسىن» بەرۋ ماسەلەسىن قاراستىرۋ قاجەت. ءار اۋداندا ازاماتتارعا ءتۇرلى اۋىل شارۋاشىلىعى داقىلدارىن ءوسىرۋدى ۇيرەتەتىن ورتالىق اشۋ قاجەت. وسىنداي جوبا «Amanat» پارتياسىنىڭ باستاماسىمەن جامبىل وبلىسى مەركى اۋدانىندا جۇزەگە اسىرىلدى. ۇكىمەت پەن اكىمدەر بۇل تاجىريبەنى باسقا دا ايماقتارعا تاراتۋدى ويلاستىرۋى كەرەك.
جالپى وتاندىق بيزنەسكە جانە شەتەل ينۆەستورلارىنا جول اشۋ – ۇكىمەت پەن بارلىق مەملەكەتتىك ورگاننىڭ مىندەتى. ال ولاردىڭ, ياعني بيزنەستىڭ جانە ينۆەستورلاردىڭ زاڭدى قىزمەتىنە كەدەرگى جاساۋ اسا اۋىر قۇقىق بۇزۋشىلىق دەپ سانالۋعا ءتيىس. دەمەك ونداي ارەكەتكە جول بەرگەندەر ءتيىستى جازاسىن الادى. مەن بۇل تۋرالى ۇنەمى ايتىپ ءجۇرمىن. ال كاسىپكەرلەر مەن ينۆەستورلار ءوز جۇمىسىن ادال جۇرگىزىپ, زاڭدى ساقتاپ, سالىق تولەۋدەن جالتارماۋى كەرەك», دەدى پرەزيدەنت.
