فوتو: اقوردا ءباسپاسوز قىزمەتى
«اگروونەركاسىپ كەشەنىن تىكەلەي سۋبسيديالاۋ تاسىلىنەن ارزان نەسيە بەرۋ تاسىلىنە بىرتىندەپ كوشۋ – اسا ماڭىزدى مىندەت. بولىنگەن قاراجاتتىڭ ءبارى ءتيىمدى جۇمسالۋعا ءتيىس. الايدا شىندىققا جاناسپايتىن اقپارات بەرۋ, باسقاشا ايتقاندا, مالىمەتتەردى بۇرمالاۋ اۋىل شارۋاشىلىعىنداعى شىنايى احۋالدى باعالاۋعا كەدەرگى كەلتىرىپ وتىر», دەدى پرەزيدەنت.
مەملەكەت باسشىسىنىڭ ايتۋىنشا, ارنايى كوميسسيا 2 ميلليون ءىرى قارا جانە 3 ميلليوننان استام ۋاق مال ساندا بار, ساناتتا جوق ەكەنىن انىقتادى. ەگىن شارۋاشىلىعى سالاسىندا دا وسىنداي جايتتار بار ەكەنى بەلگىلى بولدى. قاسىم-جومارت كەمەل ۇلى اتاپ وتكەندەي, مۇنىڭ ءبارى – مەملەكەتتەن سۋبسيديا الۋ ءۇشىن جاسالعان كوزبوياۋشىلىق. ونداي قىلمىستىق ارەكەتتەرگە توسقاۋىل قويۋ قاجەت. ال مۇنداي ىسپەن اينالىسقان ادامداردى جاۋاپكەرشىلىككە تارتۋ كەرەك.
«جەر – اۋىل شارۋاشىلىعى سالاسىنا ينۆەستيتسيا تارتۋدىڭ باستى كەپىلى. جەر تەلىمدەرىن قايتارۋ جونىندەگى ارنايى كوميسسيا اكىمدىكتەردىڭ اۋىل شارۋاشىلىعى القاپتارىن كونكۋرس وتكىزبەي-اق بەرۋ تۋرالى ەكى مىڭنان استام زاڭسىز شەشىم قابىلداعانىن انىقتادى. بۇل ماسەلە قاتىستى ەكىۇشتى ۇستانىم بولماۋى قاجەت. زاڭسىز الىنىپ, پايدالانىلماي جاتقان جەر وڭتايلاندىرىلعان ءراسىم بويىنشا مەملەكەتكە قايتارىلۋعا ءتيىس. ال جەردى پايدالانۋشى وعان ينۆەستيتسيا سالىپ, ادال ەڭبەك ەتىپ جاتسا, جۇمىسقا بوگەت جاساماۋ كەرەك. سونداي-اق ونىڭ اۋىلدى كوركەيتىپ, تۇرعىندارعا تۇراقتى جۇمىس بەرىپ وتىرعانىن دا ەسكەرگەن ءجون», دەپ تۇيىندەدى ەل پرەزيدەنتى.
