بۇل كۇندەرى مەگاپوليستەگى بارلىق مەكتەپتىڭ وقۋشىلارى قوسىلعان «TopIQ.kz» پلاتفورماسىنداعى «جەڭىل پورتفەل» جوباسى ءساتتى جۇزەگە اسقانى تۋرالى قالا اكىمى ەربولات دوساەۆ ءبىلىم قىزمەتكەرلەرىنىڭ تامىز كەڭەسىندە مالىمدەدى.
قالا باسشىسى تسيفرلىق وقۋلىقتاردى ەنگىزۋ جاڭارتىلاتىن اقپاراتقا جىلدام قول جەتكىزىپ, وقۋ ماتەريالىن ءتۇسىنۋدى وڭايلاتاتىن ينتەراكتيۆتى ەلەمەنتتەردى قامتيتىنى ءارى بالانىڭ ارقاسىنداعى اۋىر سومكەنى جەڭىلدەتەتىنىن ايتادى.
سول سياقتى جاڭا وقۋ جىلى قارساڭىندا قالاداعى بالاباقشا پەداگوگتەرى مەن اتا-انالاردى ادىستەمەلىك قولداۋ ءۇشىن «AlmatyKids.kz» دامىتۋشى تسيفرلىق كونتەنتى جاسالىپ, وعان بارلىق بالاباقشا قوسىلعانىن ايتا كەتۋ كەرەك.
الماتى قالاسىنىڭ اكىمى ەربولات دوساەۆ 2024-2025 وقۋ جىلىنىڭ قارساڭىندا «Digital Kazakhstan: جاڭا زامانداعى ءبىلىم بەرۋ» تاقىرىبىندا وتكەن پەداگوگتەردىڭ قالالىق تامىز سامميتىندە بارلىق مەكتەپتىڭ وقۋشىلارى مەن مۇعالىمدەرى 6 مىڭنان استام ادەبي تۋىندىعا ەلەكتروندى جانە اۋديو فورماتتا قول جەتكىزگەنىن اتاپ ءوتتى.
شاھار باسشىسى تسيفرلىق شەشىمدەر بالالارعا ارنالعان ءبىلىم مازمۇنىن ايتارلىقتاي دامىتاتىنىن, وعان قوسا باسقا دا ىلكىمدى جوبالار جۇزەگە اساتىنىن مالىمدەدى.
سونىمەن قاتار الماتى مۇعالىمدەرى ءۇشىن جاساندى ينتەللەكت سالاسىندا ۆەب-ازىرلەۋشىلەردى دايارلاۋ باعدارلاماسى ىسكە قوسىلماق.
تاراتا بايانداعاندا, «الماتى مەكتەپتەرى» باعدارلاماسى شەڭبەرىندە قالادا وقۋشىلاردىڭ فۋنكتسيونالدىق ساۋاتتىلىعىن, تسيفرلىق قۇزىرەتتىلىگى مەن داعدىسىن قالىپتاستىرۋعا باعىتتالعان سەرتيفيكاتتالعان باعدارلاما بويىنشا 70 مۇعالىمنىڭ بىلىكتىلىگىن ارتتىرۋ جالعاسىپ جاتىر. وقىتۋ «Cambridge International Assessment Education» ماقۇلداعان وقۋ ماتەريالدارىنىڭ ءتورت رەسمي الەمدىك باسپاگەرىنىڭ ءبىرى «Marshall Cavendish» باعدارلاماسى بويىنشا جۇرگىزىلەدى.
«بيىلعى وقۋ جىلىنىڭ باسىنان باستاپ, الماتى قالاسىنداعى مەملەكەتتىك مەكتەپتەردىڭ مۇعالىمدەرىنە جاساندى ينتەللەكت سالاسىندا ۆەب-ازىرلەۋشىلەردى دايارلاۋدىڭ 12 اپتالىق ارنايى باعدارلاماسىن ىسكە قوسۋدى جوسپارلاپ وتىرمىز. ءاربىر مەكتەپ كومانداسى گەنەراتيۆتى جاساندى ينتەللەكت مۇمكىندىگىن پايدالانا وتىرىپ, ءوزىنىڭ ۆەب-قوسىمشاسىن جاساپ, ىسكە قوسادى», دەدى شاھار باسشىسى.
ءداستۇرلى تامىز سامميتىندە ەربولات دوساەۆ تسيفرلىق وقىتۋ مەن اقپاراتتىق تەحنولوگيالاردىڭ ماڭىزدى اسپەكتىلەرىن قامتيتىن IT پاندەرى بويىنشا 100 مەكتەپتىڭ مۇعالىمدەرىن وقىتۋ باعدارلاماسى ىسكە قوسىلسا, بۇل مۇعالىمدەرگە يننوۆاتسيالاردى وقۋ ۇدەرىسىنە ءتيىمدى ەنگىزۋگە مۇمكىندىك بەرەتىنىنە توقتالدى.
بىلتىر الماتىنىڭ 6 مىڭعا جۋىق مۇعالىمى ەلىمىزدى ايتپاعاندا, شەتەلدەردە دە تاعىلىمدامادان وتكەنىن ايتۋ ءلازىم. اتاپ ايتقاندا, الماتىنىڭ ءبىلىم سالاسىنا ءتيىمدى شەتەلدىك يننوۆاتسيالىق تاجىريبەنى ەنگىزۋ ءۇشىن بىلتىر 207 مەكتەپ, بالاباقشا باسشىسى مەن ورىنباسارلارى, ءبىلىم جۇيەسىنىڭ پەداگوگتەرى ۇلىبريتانيا, شۆەتسيا, فينليانديا, ەستونيا, سينگاپۋر, جاپونيا, رەسەي ەلدەرىندە تاجىريبە بايىتىپ, ەل ىشىندە 5 700-دەن استام تاعىلىمدامادان ءوتتى. ناتيجەسىندە, ياعني شەتەلدىك يننوۆاتسيالىق تاجىريبە نەگىزىندە الماتى پەداگوگتەرى مەكتەپتەردە 117 باعدارلاما مەن جوبا, بالاباقشالارعا 35 جوبا ازىرلەپ وتىر.
سوڭعى مالىمەتتەرگە سايكەس, الماتىدا مەكتەپتەردى پاندىك كابينەتتەرمەن جابدىقتاۋ دەڭگەيى 85%-عا جەتكەن.
بيىل الماتىدا مەكتەپتەرگە ينتەراكتيۆتى كونتەنتى بار 168 جاڭا موديفيكاتسيا كابينەتى ساتىپ الىندى.
شاھار باسشىسى قالاداعى مەكتەپتەردىڭ ينفراقۇرىلىمىنا باسا نازار اۋدارىلاتىنىنا توقتالا كەلە: «بيىل مەكتەپتەرگە پراكتيكالىق جانە تەوريالىق ەسەپتەردى شەشۋگە ينتەراكتيۆتى مازمۇنى بار 168 جاڭا موديفيكاتسيا كابينەتى (فيزيكا, حيميا, بيولوگيا, روبوتتەحنيكا, STEM) ساتىپ الىندى. بۇل مەكتەپتەردى زاماناۋي پاندىك كابينەتتەرمەن جابدىقتاۋدىڭ 85% دەڭگەيىنە قول جەتكىزۋگە مۇمكىندىك بەردى», دەدى.
الماتىدا 168 جاڭا كابينەتتىڭ ەنگىزىلۋى – مەكتەپتەردى زاماناۋي پاندىك كابينەتتەرمەن جابدىقتاۋ كورسەتكىشىن وتكەن جىلمەن سالىستىرعاندا 16%-عا ءوسىرىپ وتىر.
سونىمەن قاتار, ۇلتتىق بانكتىڭ ۇلتتىق تولەم كورپوراتسياسىمەن بىرلەسىپ №201 مەكتەپ-گيمنازياسىندا «تسيفرلىق تەڭگە» پلاتفورماسىندا باستاۋىش سىنىپ وقۋشىلارىن تەگىن تاماقتاندىرۋعا ارنالعان «تسيفرلىق ۆاۋچەرلەر» باعدارلاماسى ءساتتى جۇزەگە اسىپ كەلەدى. اتالعان باعدارلاما بويىنشا بۇگىندە 50 مىڭعا جۋىق ترانزاكتسيا جۇرگىزىلگەن.
الماتى قالاسىنىڭ اكىمى الداعى ۋاقىتتا بۇل جوبانى قالانىڭ باسقا مەكتەپتەرىنە دە ەنگىزۋ جوسپارلانىپ جاتقانىن جەتكىزدى.
الماتى
