پسيحولوگيالىق-پەداگوگيكالىق قولداۋ كابينەتى – ارنايى ءبىلىم بەرۋ ۇيىمى. وندا كەز كەلگەن ەرەكشە بالا مەن ونىڭ وتباسى دەفەكتولوگ, پسيحولوگ, لوگوپەد, تيفلوپەداگوگ, سۋردوپەداگوگ, فيزيوتەراپەۆت, وزگە دە بىلىكتى مامانداردىڭ كومەگىن الا الادى. نەگىزگى ماقسات – ەرەكشە بالا ءوسىرىپ وتىرعان وتباسىلارعا جاقىن جەردەن تۇزەۋ كابينەتتەرىن قۇرۋ. پاۆلودار وبلىستىق پسيحولوگيالىق-پەداگوگيكالىق قولداۋ قىزمەتىنىڭ قۇرىلىمىنا 13 كابينەت كىرەدى. ەندى ولاردىڭ بىرىندە ەرتە قولداۋ قىزمەتى جۇمىس ىستەي باستادى.
اتاپ وتەرلىگى, بۇل قىزمەت «دارا» قورىنىڭ باستاماسىمەن, «شەۆرون» كومپانياسىنىڭ دەمەۋشىلىگىمەن اشىلىپ وتىر. مۇنداي ورتالىق ەلىمىز بويىنشا ءۇشىنشى بولىپ پاۆلودار قالاسىندا قۇرىلعان.
«دارا» قورى وكىلدەرىنىڭ ايتۋىنشا, بالالاردىڭ بويىنداعى اۋىتقۋشىلىق تاۋەكەلدەرىنىڭ قالىپتاسۋىن تومەندەتۋگە باعىتتالعان جۇمىستار – ەلىمىزدەگى جاڭا باعىت. قاناتقاقتى جوبا بيىلعى كوكتەمدە ىسكە قوسىلىپ, بۇعان دەيىن ەلىمىزدىڭ ەكى ايماعىندا ەرتە قولداۋ قىزمەتتەرى جۇمىسىن باستاپ كەتكەن ەدى. العاشقىسى وسكەمەندە, ەكىنشىسى اتىراۋدا, ەندى, مىنە, پاۆلوداردا اشىلىپ وتىر. سونداي-اق ءتورتىنشىسى ەكىباستۇز قالاسىندا دا ءوز قىزمەتىن ۇسىنا باستادى.
بۇعان دەيىن پسيحولوگيالىق-پەداگوگيكالىق قولداۋ كابينەتىنە جوندەۋ جۇرگىزىلىپ, قاجەتتى جابدىقتار مەن ويىنشىقتار, بالالارمەن جۇمىس ىستەۋگە ارنالعان ماتەريالدار ساتىپ الىنعان. ال جەرگىلىكتى پسيحولوگتەر قوسىمشا وقىتىلعان.
– بالانىڭ تۋعان ساتىنەن ءۇش جاسىنا دەيىنگى شاعى – ەڭ ماڭىزدى كەزەڭ. بۇل ۋاقىتتا ونىڭ بويىندا قورشاعان ورتامەن ءوزارا ىنتىماقتاسۋدىڭ بارلىق قاجەتتى ماشىقتارى قالىپتاسا باستايدى. بۇل دەگەنىمىز – سويلەۋ, ءجۇرۋ, ەرەسەكتەردى ءتۇسىنۋ, وزگە دە ماشىقتار. بۇلار ارقىلى بالا ءوزىن قورشاعان الەمدى تانىپ, ادامدارمەن ارالاسا باستايدى. ەگەر وسى كەزەڭدەگى دامۋ ۇردىسىندە اتا-اناسى بالانىڭ بويىنان قانداي دا ءبىر اۋىتقۋشىلىقتى بايقاسا, دارىگەرگە نەمەسە ءبىزدىڭ ەرتە قولداۋ قىزمەتىنە حابارلاسا الادى, – دەيدى پاۆلودار اۋداندىق پسيحولوگيالىق-پەداگوگيكالىق تۇزەتۋ كابينەتىنىڭ باسشىسى ايجان وسپانوۆا.
مامانداردىڭ سوزىنە سۇيەنسەك, بالالاردىڭ دامۋىنداعى اۋىتقۋشىلىقتار ءسال عانا بايقالۋى مۇمكىن. ورتالىقتاعى ارنايى وقىتىلعان ماماندار جاعدايدى تالداپ, اتا-اناعا ءتيىستى نۇسقاۋلىقتار بەرە الادى. بالا دامۋىنداعى اۋىتقۋشىلىقتىڭ الدىن العىسى كەلەتىن اتا-انا ونداي نۇسقاۋلىقتى ۇيدە دە ورىنداي الادى ەكەن. ەگەر جاعداي الاڭداتارلىقتاي بولسا, ماسەلەن, بالا ەرەسەكتەردىڭ وعان قاراتا ايتىلعان سوزدەرىن انىق تۇسىنبەسە, اتا-اناسى ونى بىردەن ەرتە قولداۋ قىزمەتىنىڭ تەراپياسىنا اپارعانى ابزال. مۇندا ونىمەن قاجەتىنشە دەفەكتولوگ, پسيحولوگ, لوگوپەد نەمەسە ەمدىك دەنە تاربيەسى مامانى شۇعىلدانادى.
ورتالىققا پسيحولوگيالىق-مەديتسينالىق-پەداگوگيكالىق كەڭەستەن وتكەن بالالار دا كەلە الادى. ول ءۇشىن دارىگەردىڭ جولداماسى بولسا جەتكىلىكتى.
– ءبىزدىڭ ەرتە قولداۋ قىزمەتىنىڭ ءىس-ارەكەتى بالالى وتباسىلارعا باعىتتالعان. مۇندا ەڭبەك ەتەتىن قىزمەتكەرلەر بالامەن جۇمىس ىستەپ قانا قويماي, اتا-اناسىنا ماڭىزدى كەڭەس بەرەدى. سول ارقىلى بالا بويىندا تۋىنداۋى مۇمكىن اۋىتقۋشىلىقتىڭ قالاي الدىن الۋعا بولاتىنىن ۇيرەتەدى. ناتيجەسىندە, ءسابيدىڭ دامۋىنا تەرىس اسەر ەتكەن شەكتەۋلەر بىرتىندەپ جويىلىپ, بالانى ورتاعا بەيىمدەۋگە جانە ءارى قاراي مەكتەپالدى ءبىلىم بەرۋ ۇيىمدارىنا دايىنداۋعا اتا-اناسىنا كومەكتەسەدى. ياعني ورتالىقتاعى ماماندار بالالاردىڭ ماشىقتارىن قالىپتاستىرۋعا جۇمىلدىرىلادى. جەتكىنشەك وزگە قاتارلاستارىنا قاراعاندا موتوريكالىق ماشىقتاردى تىم باياۋ باعىندىرسا, سويلەۋ ءتىلىنىڭ دامۋى كەشەۋىلدەسە, ۇنەمى اگرەسسيا تانىتىپ, جىلاۋدى ۇدەتسە, ۇيقىسى ناشار بولىپ, تابەتى جوعالا باستاسا, ءبىزدىڭ ورتالىققا اكەلگەنى دۇرىس. نەمەسە اتا-انالارى الدەنەگە الاڭداپ, بالاسىنىڭ دامۋىنداعى ەرەكشەلىكتەردى تانىپ بىلگىسى كەلسە دە ورتالىققا جۇگىنە الادى, – دەيدى «دامۋ» قورىنىڭ مەنەدجەرى ايگۇل تابەرگەنوۆا.
زاڭعار اۋىلىنىڭ تۇرعىنى سامال توقتاعۇلوۆا – ەرتە قولداۋ قىزمەتىنە العاشقى بولىپ كەلگەندەردىڭ ءبىرى. ءۇش جاسار ۇلى باتىرحان گيپەربەلسەندى بولۋىنا, سويلەۋ تىلىندە ماسەلە تۋىنداۋىنا بايلانىستى نەۆروپاتولوگ ماماننىڭ كەڭەسىمەن وسىندا جىبەرىلىپتى.
– ءبىز بۇل ورتالىققا ەكى ايدان اسا ۋاقىت كەلىپ ءجۇرمىز. ناتيجەسى جاقسى. سەبەبى بالامىز گيپەربەلسەندى, ءبىر ورىندا بايىز تاۋىپ وتىرا المايدى جانە سويلەۋىندە كىدىرىس بار. سوندىقتان وسىندا كەلدىك. قازىر ايتقانىمىزدى تىڭدايدى, ءسوزىمىزدى قايتالايدى. بالالارمەن ويناپ, قارىم-قاتىناس قۇرا باستادى. ورتالىققا كەلگەنىمىزگە قۋانىشتىمىز. مۇندا پسيحولوگپەن, دەفەكتولوگپەن جۇمىس ىستەدىك. ناقتى وزگەرىس بايقالىپ جاتىر, – دەيدى انا.
مەكەمەدە بالالارعا بارلىق قولايلى جاعداي قاراستىرىلعان. پاندۋس پەن ءتۇرلى-ءتۇستى دىبىس بەرگىشتەر, ۇستاعىش تۇتقالار بار, كىرەبەرىس ەسىگى كەڭ. عيمارات زامانعا ساي ارنايى جابدىقتارمەن, ادىستەمەلىك ماتەريالدارمەن, ادەبيەتتەرمەن قامتىلىپ, مونتەسورري كابينەتى, ەمدىك دەنە تاربيەسى زالى جابدىقتالعان.
«دارا» قورىنىڭ وكىلدەرى كەلەشەكتە مۇنداي قىزمەت كورسەتۋ ورتالىقتارىن ەلىمىزدىڭ بارلىق وڭىرىندە اشۋدى جوسپارلاپ وتىر.
پاۆلودار وبلىسى
