سوت جۇيەسى ءۇشىن كونستيتۋتسيا كۇنى ەرەكشە ماڭىزدى. سەبەبى سۋديالار كونستيتۋتسيالىق قۇندىلىقتاردى, ازاماتتاردىڭ قۇقىقتارى مەن زاڭدى مۇددەلەرىن قورعاۋدى ىسكە اسىرادى. قازىرگى تاڭدا ادىلەتتى قازاقستان قۇرۋ ءۇشىن زاڭنىڭ ۇستەمدىگىن, ادىلەتتىلىك قاعيداتىن قامتاماسىز ەتۋ باستى مىندەت جانە سولاي بولىپ قالا بەرەدى.
مەملەكەت باسشىسى قاسىم-جومارت توقاەۆتىڭ باستاماسىمەن سوت جۇيەسىن رەفورمالاۋ جانە تسيفرلاندىرۋ بويىنشا بىرقاتار زاڭنامالىق ءارى پراكتيكالىق شارا قابىلدانىپ جاتىر.
جوعارعى سوت باسشىلىعىمەن اكىمشىلىك ادىلەت سالاسىن, يۋۆەنالدى سوتتاردىڭ سوتتىلىعىن كەڭەيتۋ, كاسساتسيالىق ساتىداعى سوتتى ءوز الدىنا دەربەس شىعارۋ, ازاماتتاردىڭ سوت تورەلىگىنە قول جەتكىزۋىن جەڭىلدەتۋ جانە سۋديالارعا جۇكتەمەنى تەڭەستىرۋ ءۇشىن قالالارداعى ءبىرىنشى ساتىداعى سوتتاردىڭ بىرىكتىرىپ, بولاشاق سۋديالاردى دايارلاۋ باعىتى بويىنشا دا ناقتى قادامدار جاسالىپ جاتىر. وسى جانە باسقا دا جاڭاشىلدىقتىڭ بارلىعى سوت جۇيەسىنىڭ باستى مىندەتىن شەشۋ, ياعني سوت تورەلىگىن جۇزەگە اسىرۋدىڭ جوعارى ساپاسىن قامتاماسىز ەتۋ بولماق.
بيىل قازان ايىندا مەملەكەت باسشىسىنىڭ قاتىسۋىمەن قازاقستان سۋديالارىنىڭ IX سەزىنىڭ ءوتۋى جوسپارلانىپ وتىر. اتالعان كەزدەسۋدە كەيىنگى ءتورت جىلدا اتقارىلعان جۇمىستىڭ ەسەبى تىڭدالىپ, سوت جۇيەسىنىڭ الدىنا قويىلاتىن ماقساتتار ايقىندالادى.
سوت سالاسىندا قىزمەت جاساپ, سوت تورەلىگى اكادەمياسىن ءتامامداپ, جوعارعى سوتتىڭ جانە جوعارى سوت كەڭەسىنىڭ جاس مامانداردى قولداۋىمەن, پرەزيدەنتتىڭ سەنىم بىلدىرۋىمەن العاش رەت استانا قالاسى بويىنشا ەڭ جاس سۋديا بولىپ تاعايىندالدىم. سوندىقتان بيىلعى كونستيتۋتسيا كۇنى مەرەكەسىنىڭ مەنىڭ ومىرىمدە الاتىن ورنى ەرەكشە.
وتاندىق سوت جۇيەسىنىڭ الدىندا كەلەلى ماقساتتار تۇر. بۇل – سوتقا دەگەن كوپشىلىكتىڭ سەنىمىن ارتتىرۋ. وسى ورايدا وتانداستارىمىزدى ايتۋلى مەرەكەمەن قۇتتىقتاي وتىرىپ, زاڭ ۇستەمدىگىن جۇزەگە اسىرۋداعى قىزمەتتە تابىس تىلەيمىن.
راحىمجان دۇيسەنباي,
استانا قالاسى مامانداندىرىلعان اۋدانارالىق تەرگەۋ سوتىنىڭ سۋدياسى
