ەلىمىزدىڭ نەگىزگى زاڭىنا وزەكتى وزگەرىستەر ەنگىزىلگەن 2022 جىلعى كونستيتۋتسيالىق رەفورمانىڭ ماڭىزى ەرەكشە. بۇل رەفورما مەملەكەتتىك ينستيتۋتتاردى جاڭعىرتىپ, پارلامەنتتىڭ ءرولىن كۇشەيتىپ قانا قويعان جوق, سونىمەن قاتار جەرگىلىكتى ءوزىن-ءوزى باسقارۋدى دامىتۋعا, جاڭا ساياسي مادەنيەتتى قالىپتاستىرۋعا, ازاماتتىق قوعامدى نىعايتۋعا باعىتتالدى. بۇل قايتا قۇرۋلار ەلىمىزدىڭ ساياسي ومىرىنە وڭ اسەرىن تيگىزىپ, دەموكراتيا مەن قۇقىقتىق ءتارتىپتى نىعايتۋعا ۇمتىلىسىن كورسەتتى.
رەفورما اياسىنداعى ماڭىزدى قادام ومبۋدسمەن ينستيتۋتىنىڭ كونستيتۋتسيالىق مارتەبەسىن نىعايتۋ بولدى. بۇل ينستيتۋت العاش رەت 2017 جىلعى رەفورما كەزىندە كونستيتۋتسيادا بەكىتىلىپ, قازاقستان رەسپۋبليكاسىنداعى ادام قۇقىقتارى جونىندەگى ۋاكىلدى پرەزيدەنتتىڭ ۇسىنۋىمەن بەس جىل مەرزىمگە پارلامەنت سەناتى سايلاۋدى كوزدەدى. دەگەنمەن 2022 جىلعى رەفورما ادام قۇقىقتارى جونىندەگى ۋاكىل ينستيتۋتىنىڭ مارتەبەسىن ايتارلىقتاي ارتتىردى.
ەندى ومبۋدسمەننىڭ قۇقىقتىق مارتەبەسى كونستيتۋتسيانىڭ جەكە 83-1-بابىندا بەكىتىلگەن, ونىڭ تاۋەلسىزدىگى مەن مەملەكەتتىك ورگاندار مەن لاۋازىمدى تۇلعالاردىڭ الدىندا ەسەپ بەرمەۋى ايقىندالعان. ادام قۇقىقتارى جونىندەگى ۋاكىلدىڭ باس پروكۋرورمەن بىرگە ازاماتتاردىڭ قۇقىقتارى مەن مۇددەلەرىن قورعاۋ ءۇشىن كونستيتۋتسيالىق سوتقا تىكەلەي جۇگىنۋ قۇقىعى – ماڭىزدى جاڭالىق. بۇل شەشىم ەلىمىزدە ادام قۇقىقتارىن قورعاۋ ينستيتۋتىن نىعايتۋعا بايىپتى كوزقاراستى كورسەتەدى.
زاڭ سونداي-اق ادام قۇقىقتارى جونىندەگى ۋاكىلدىڭ قىزمەتىن ۇيىمداستىرۋدى ايقىندايدى. بۇل وسى مەكەمە جۇمىسىنىڭ ناقتى ەرەجەلەرى مەن قاعيداتتارىن بەلگىلەۋگە, ونىڭ حالىقارالىق ستاندارتتار مەن تاجىريبەلەرگە سايكەستىگىنە كەپىلدىك بەرەدى.
جۇرگىزىلگەن كونستيتۋتسيالىق رەفورمالار قۇقىقتىق مەملەكەتتى دامىتۋدا شەشۋشى ءرول اتقارادى. ولار ادام قۇقىقتارىن قورعاۋ جۇيەسىن نىعايتۋعا كومەكتەسىپ قانا قويماي, ازاماتتاردىڭ قوعامدىق ومىرگە بەلسەندى قاتىسۋىنا جاعداي جاسايدى, بۇل ءوز كەزەگىندە ولاردىڭ قۇقىقتارى مەن بوستاندىقتارىن قورعاۋ ستاندارتتارىن ارتتىرادى. اتالعان وزگەرىستەر ەلىمىزدىڭ پروگرەسسيۆتى دامۋعا دەگەن ۇمتىلىسىن ايقىندايدى جانە ونىڭ ادام قۇقىقتارى مەن سوت تورەلىگى سالاسىنداعى جوعارى حالىقارالىق ستاندارتتارعا ساي بولۋىن كورسەتەدى.
ارتۋر لاستاەۆ,
قازاقستان رەسپۋبليكاسىنداعى ادام قۇقىقتارى جونىندەگى ۋاكىل
