اسەم قانداي قۇرمەتكە دە لايىق

قانسىراعان قارىنداسىمىزدىڭ ەل بولىپ ەلەۋگە تۇراتىن ەرلىگى –  قۇتقارۋشىلار اپاتقا ۇشىراعان ۇشاقتى تاۋىپ العانشا بايلانىستى ۇزبەي, باعىت بەرگەندىگىندە 20 قاڭتار كۇنى «شاتىركول» كەنىشىنىڭ اۋماعىندا قايعىلى وقيعا بولدى. «وليمپ ەير» جشس ۇشاعى بالقاش – «شاتىركول» كەنىشى باعىتىمەن ۇشىپ كەلە جاتقان. ونىڭ بورتىندا  جەتى ادام بولدى, ۇشەۋى ەكيپاج مۇشەلەرى. قارلى دالاعا قۇلاپ, ءۇيىندى تەمىرگە اينالعان اۋە كولىگىنەن اسەم شاياحمەتوۆا عانا امان قالدى. «امان قالدى» دەۋ, ايتۋعا عانا وڭاي. ال اسەم سول ساتتە بىرنەشە جەردەن سىنعان اياعىنىڭ اۋىرعانىنا قاراماستان ءبىر مەتر­گە جۋىق قاسات قاردىڭ استىنان شىعىپ, قازا تاپقان ۇشقىشتىڭ ۇيالى تەلەفونىمەن قۇتقارۋ قىزمەتىنە حابارلاسىپ, ورىن العان اۋە اپاتى جونىندە جەدەل اقپارات بەرگەن. بۇل دا ايتۋعا وڭاي. ويتكەنى, قاتتى سوققىدان زارداپ شەگىپ, سانسىز جاراقاتتاردىڭ سالدارىنان قانسىراعان قىزدىڭ اۋەلى قىزىلوردا وبلىسىنىڭ توتەنشە جاعدايلار جونىندەگى دەپارتامەنتىنە, ودان كەيىن جامبىل وبلىستىق توتەنشە جاعدايلار جونىندەگى دەپارتامەنتكە حابارلاسۋى ەردىڭ ەرىنىڭ عانا قولىنان كەلەتىن توزىمدىلىك. بۇل دا ايتۋعا وڭاي. جانى ءسىرى اسەمنىڭ ەل بوپ ەلەۋگە تۇراتىن ەرلىگى – قۇتقارۋشىلار اپاتقا ۇشىراعان ۇشاقتى قاشان تاۋىپ العانشا ۇيالى تەلەفون ارقىلى بايلانىسىن ۇزبەي, باعىت-باعدار بەرىپ وتىرۋىندا بولىپ تۇر. ويتكەنى, اسەم بايلانىستى ۇزسە, قويۋلانىپ كەلە جاتقان كەشكى قاراڭعىلىق ىزعارلى دالادا بولعان اپاتتى  قۇتقارۋشىلار نازارىنان بۇركەپ قالار ەدى. جەتەۋدىڭ ىشىنەن جالعىز ءوزى امان قالعان اسەم ءۇشىن ءارى قاراي ايتۋدىڭ ءوزى قورقىنىشتى... بۇگىندە اسەمنىڭ جاعدايى جاقسارىپ كەلەدى. ول ءا دەگەندە, ياعني وقيعا بولعان جەردەن شۋ اۋرۋحاناسىنا جەتكىزىلگەن كەزدە دارىگەر-حيرۋرگتەرمەن تىلدەسىپ: «اياعىمدى كەسپەڭىزدەرشى», دەپ ءوتىنىپتى. بويجەتكەن تىلەگى, ارينە, تۇسىنىكتى. بۇگىندە بىلىكتى دارىگەر-حيرۋرگتەر اۋە اپاتىنان امان قالعان قىز, قۇداي قالاسا, ءبىر جىلدان كەيىن اياعىنان تىك تۇرىپ كەتەدى دەپ وتىر. اسەم – ادام بالاسىنىڭ باسىنا قانداي قيىندىق تۋسا دا ءۇمىت ۇزبەۋ كەرەكتىگىن بۇگىنگى جاستارعا ءوز ىسىمەن ۇلگى رەتىندە كورسەتە ءبىلدى. ول ءوزىنىڭ قايسارلىعى ارقىلى كەشەگى ءاليا, مانشۇك اپكەلەرىنىڭ ەرلىگىن قايتالاي الاتىن سىڭلىلەرى قازاق ەلىندە بۇگىنگى بەيبىت زاماندا دا بار ەكەنىن پاش ەتتى. ارينە, قايسار قىز بۇل ءۇشىن ەشقانداي قۇرمەت ىزدەپ, ەشقانداي اتاق سۇرامايدى. بىراق ونىڭ وجەتتىگىن بولاشاق ۇرپاققا تاعىلىمدى تاربيە ەتە ءبىلۋ ءۇشىن ەل ازاماتتارى ەستى تىرلىككە بارىپ, اسەم ۇلگىسىن قالاي قۇرمەتتەپ, قانداي ماراپاتقا ۇسىنسا دا لايىق دەپ ويلايمىز. كوسەمالى ساتتىباي ۇلى, جازۋشى. جامبىل وبلىسى, شۋ اۋدانى, شاتىركول كەنىشى.