ءوزارا قۇقىقتىق كومەككە جول اشىلدى

كەشە باس پروكۋرور اسحات داۋىلباەۆ پەن يتاليا رەسپۋب­ليكا­سىنىڭ توتەنشە جانە وكىلەتتى ەلشىسى ستەفانو راۆانيان قازاق­ستان رەسپۋبليكاسى مەن يتاليا رەسپۋبليكاسى اراسىنداعى قىلمىس­كەرلەردى ۇستاپ بەرۋ تۋرالى جانە قىلمىستىق ىستەر بويىنشا ءوزارا قۇقىقتىق كومەك تۋرالى شارتتارعا قول قويدى. ا.داۋىلباەۆ وسى ماڭىز­دى وقيعانىڭ ەۋروپالىق قاۋىم­داستىقپەن قۇقىقتىق قاتىناستىڭ ۇدەمەلى دامۋىنىڭ جانە قازاق­ستان­نىڭ قۇقىقتىق جۇيەسىنە سەنىمنىڭ كورىنىسى ەكەنىن ايتتى. يتاليا قىلمىستىق-قۇقىقتىق سالاداعى مەملەكەتارالىق شارتتاردىڭ تولىق جيناعىن جاساسقان العاشقى ەۋروپالىق ەلدەردىڭ ءبىرى بولىپ تابىلادى. 2013 جىلدىڭ قاراشاسىندا ەكى ەل اراسىندا سوتتالعان ادامداردى تاپسىرۋ تۋرالى كەلىسىمگە قول قويىلدى جانە قازاقستان ونى وتكەن جىلدىڭ كۇزىندە راتيفيكاتسيالادى. شارتتار كۇشىنە ەنگەن سوڭ ەكى ەلدە دە ءوزارا قۇقىقتىق كومەك كورسەتۋ, ازاماتتاردىڭ زاڭدى قۇقىقتارى مەن مۇددەلەرىن قورعاۋعا قۇقىقتىق نەگىزدەر پايدا بولادى. تاراپتار اتاپ وتكەندەي, شارتتارعا قول قويۋ قىلمىسقا قارسى كۇرەس سالاسىنداعى ارىپتەستىكتى نىعايتۋ, اتالعان باعىتتاعى قاداعالاۋ جانە قۇقىق قورعاۋ ورگاندارى جۇمىستارىنىڭ تيىمدىلىگىن ارتتىرۋ جولىنداعى ماڭىزدى قادامداردىڭ ءبىرى بولدى, دەپ حابارلادى باس پروكۋراتۋرانىڭ ءباسپاسوز قىزمەتى.