تامىزدىڭ تامىلجىعان دەمالىس كۇندەرىنىڭ بىرىندە قور قۇرامىنداعى كومپانيالاردىڭ جاستار كەڭەستەرىنىڭ ەرىكتىلەرى «بۋراباي» ۇلتتىق پاركىندە ەكو-پلوگگينگ وتكىزۋگە اتتاندى. مۇنداعى ماقسات – جەرلەستەرىمىزدىڭ ەڭ سۇيىكتى دەمالىس ورنىن تازالاۋ. كۇن سايىن جاعالاۋدان 10 توننادان اسا تۇرمىستىق قالدىق شىعارىلادى. ەگەر قورشاعان ورتاعا قالدىرىلعان قالدىق تۇرلەرىنىڭ قانشا ۋاقىتتا ىدىراپ جويىلاتىنىن ەسەپتەر بولساق, وندا ءوز ۇرپاعىمىزعا قانداي «مۇرا» قالدىرىپ جاتقانىمىزدى ويلاپ, ەرىكسىز قىنجىلاسىڭ.
مىنە, سوندىقتان «سامۇرىق-قازىنا» اق-نىڭ جاستار كەڭەستەرى ەكو-پلوگگينگ وتكىزەتىن ورىندى مۇقيات تاڭدادى. اقىلداسا كەلە, ءىس-شارا ۇيىمداستىرۋشىلارى – قورعا قاراستى الەۋمەتتىك ءوزارا ىقپالداستىق جانە كوممۋنيكاتسيا ورتالىعىنىڭ قىزمەتكەرلەرى تازالىق جۇمىستارىن بۋراباي كولىنىڭ بويىندا جۇرگىزۋگە شەشىم قابىلدادى. بەس اۆتوبۋسقا جايعاسقان 120 ادام دەمالىس ورنىنا جەتىسىمەن تازالىق جاساقتارىنا ءبولىنىپ, جۇمىسقا بەلسەندى دە كوڭىلدى كىرىسىپ كەتتى. ەكى كۇن ىشىندە ەرىكتى جاستار اۋماقتى تۇرمىستىق قالدىقتاردان تازارتتى. جۇمىس ءۇش باعىتتا جۇرگىزىلدى: ابىلاي حان الاڭقايىنان كوكشەتاۋداعى شولۋ الاڭىنا دەيىنگى, بولەكتاۋ تاۋىنىڭ ەتەگىنەن بولەكتاۋ تاۋىنىڭ شولۋ الاڭىنا دەيىنگى, ورمان شارۋاشىلىعى شەكاراسىنان ايناكول كولىنە دەيىنگى, كولدىڭ جاعالاۋ ايماعىنىڭ بويىمەن ءانشى ارالعا دەيىنگى ايماقتار. وسىلايشا مادەني مۇرا نىساندارى, تاريح پەن ساۋلەت ەسكەرتكىشتەرى, قوعامدىق ورىندار مەن مادەني مەكەمەلەردىڭ اۋماقتارى قوقىستان كوز اشىپ, ءسانى كىردى.
«بۇل – اۋماقتى تازارتىپ, اينالانىڭ تىنىسىن اشۋعا ارنالعان ءىس-شارا عانا ەمەس, سونىمەن قاتار ۇجىمنىڭ ىنتىماعىن ارتتىرىپ, ەركىن اڭگىمە-دۇكەن قۇرۋدىڭ تاماشا مۇمكىندىگى. بىزگە اۋا رايى دا قاراستى. ءبارى بەلسەندى جۇمىس ىستەپ, ۋاقىتتى پايدالى ءارى قىزىقتى وتكىزدى. باستىسى, سوزبەن عانا ەمەس, ىسىمىزبەن دە «تازا قازاقستان» اكتسياسىن قولدادىق», دەدى «Samruk-Kazyna Ondeu» جشس اعا مەنەدجەرى, جاستار كەڭەسىنىڭ توراعاسى مەرۋەرت شۋكۋەۆا.
«تازا قازاقستان سەنەن باستالادى» ەكو-پلوگگينگى ەستافەتا تۇرىندە وڭىردەن وڭىرگە تارالادى. كەلەسى كەزەكتە اكتسيا اتىراۋدا وتكىزىلەتىن بولسا, ءارى قاراي باتىستىڭ وزگە وڭىرلەرىندە جالعاسىن تابادى.
