فوتو:تۋريزم جانە سپورت مينيسترلىگى
وتىرىسقا پرەزيدەنت اكىمشىلىگىنىڭ, ۇكىمەت اپپاراتىنىڭ, دەپۋتاتتىق كورپۋستىڭ وكىلدەرى, سالا ارداگەرلەرى, وليمپيادا جۇلدەگەرلەرى, قۇرمەتتى باپكەرلەر, وڭىرلىك باسقارمالاردىڭ, فەدەراتسيالاردىڭ, ۆەدومستۆوعا باعىنىستى ۇيىمداردىڭ باسشىلارى, سونىمەن بىرگە باق وكىلدەرى قاتىسىپ وتىر.
جيىندا مينيستر پاريج وليمپياداسىنىڭ ناتيجەسى كوڭىل كونشىتپەيتىنىن ايتتى. ونىڭ ىشىندە قازاقستان ءۇشىن ءداستۇرلى سانالاتىن سپورت تۇرلەرىنەن كورسەتكىش ناشار دەپ باعالادى.
«ماسەلەن, بوكستان ەرلەر قۇراماسى وليمپيادا الدىندا كەمى 1 التىن, 1 كۇمىس, 1 قولا مەجەسىن قويعان ەدى. ءىس جۇزىندە تولىق قۇرامدا بارعان ەر بوكسشىلارىمىز 1 عانا كۇمىس مەدال ەنشىلەدى», دەدى ەرمەك مارجىقپاەۆ.
سونداي-اق پاريجدەگى وليمپيادا ويىندارىنا 8 ليتسەنزيا يەلەنگەن جەڭىل اتلەتيكا كومانداسى دا لايىقتى ناتيجە كورسەتپەگەنىن تىلگە تيەك ەتتى. كەمىندە 1 كۇمىسپەن ورالۋعا نيەت ەتكەن جەڭىل اتلەتشىلەردىڭ ەڭ ۇزدىك ناتيجەسى 9-ورىن بولعان.
«مىندەتتەمەلەرگە سايكەس ەركىن كۇرەس كومانداسى قولا مەدال الۋعا ۋادە بەرگەن ەدى. الايدا سپورتشىلار شيرەك فينالعا وتە الماي, ءبىرىنشى اينالىمنان شىعىپ قالدى. ءتىپتى مەدال جەڭىپ الۋ جاعىنان ەڭ ءساتسىز دەگەن توكيو وليمپياداسىندا قولا مەدال بولدى. تاريحتا العاش رەت ايەلدەر كۇرەسىنەن سپورتشىلار ويىندارعا قاتىسقان جوق. بۇرىن بىزدە ءداستۇرلى تۇردە جاقسى پوزيتسيالار بولعان», دەدى مينيستر.
ەرمەك مارجىقپاەۆ وڭىرلەردىڭ وليمپيادالىق رەزەرۆتى دايارلاۋ جاعدايىنا دا توقتالدى. پاريج وليمپياداسىنا بىردە-ءبىر سپورتشى جولداما الا الماعان قوستاناي, ۇلىتاۋ جانە ماڭعىستاۋ وبلىستارىن سىنعا الدى.
«ۇلتتىق قۇراماعا 17 ءوڭىردىڭ سپورتشىلارى كىردى. الماتى (17), استانا (14) جانە شىمكەنت (12) وكىلدەرى كوپ جولداماعا يە بولدى. سونداي-اق قاراعاندى سپورت مەكتەبى جۇلدەگەرلەر دايارلاۋ قارقىنىن باسەڭدەتىپ الدى. وليمپيادا تاريحىندا بۇل ءوڭىر قازاقستانعا 2 التىن, 1 كۇمىس, 3 قولا سىيلاعان ەدى. بۇل جولى ءۇمىت ارتقان قاراعاندىلىق سپورتشىلار دا مەدالسىز ورالدى», دەدى مينيستر.
ۆەدومستۆو باسشىسى پاۆلودار وبلىسىنداعى سپورتتىق كورسەتكىشتەر دە ءماز ەمەس ەكەنىن اتاپ ءوتتى. اتالعان ءوڭىر سپورتشىلارى ريو - 2016 وليمپياداسىنا قاتىسۋ ءۇشىن 7 ليتسەنزياعا قول جەتكىزگەن بولسا, توكيودا وتكەن تورتجىلدىقتىڭ باستى باسەكەسىنە 4 جولداما العان. ال پاريجدەگى دوداعا تەك 1 ليتسەنزيا يەلەنگەن.
ەرمەك مارجىقپاەۆ جەرگىلىكتى اتقارۋشى ورگاندار وليمپيادالىق سپورت تۇرلەرىنە باسىمدىق بەرىپ, سالانى دامىتۋ ساياساتىن قايتا قاراۋى قاجەت ەكەنىن ايتتى.
«قازىردەن باستاپ مۇددەلى تاراپتارمەن بىرگە اقپاراتتىق-ءتۇسىندىرۋ جۇمىستارىن جۇرگىزۋ كەرەك. 6 ايدان كەيىن حاربيندە 9-شى قىسقى ازيا ويىندارى وتەدى. ميلان مەن كورتينا-دامپەتستسو قالالارىندا وتەتىن 25-ءشى قىسقى وليمپيادا ويىندارىنا دا از ۋاقىت قالدى. ۇلتتىق قۇرامانىڭ دايىندىعىن كۇشەيتۋ قاجەت», دەدى مينيستر.
