اباي وبلىسىنىڭ كاسىپكەرلەر پالاتاسىنىڭ ۇيىمداستىرۋىمەن ايماقتاعى بيزنەس-قاۋىمداستىق وكىلدەرىنىڭ باسىن قوسىپ وتىرعان بۇل شاراعا قاتىسۋشىلاردىڭ ءونىمىن ءادىل قازىلار القاسى باعالاپ, شەشىم شىعارادى. قازىلار تاراپىنان جانە جوعارى سۇرانىسقا يە بولعان تاۋار وندىرۋشىلەر الداعى ۋاقىتتا مەملەكەتتەن گرانت الىپ, ءوز كاسىبىن كوركەيتۋگە جول اشادى.
ء«بىر اۋىل – ءبىر ءونىم» كورمە-جارمەڭكەسى بيىل ەكىنشى رەت ءوتىپ جاتىر. اتالعان شارانىڭ اياسىن كەڭەيتۋ ارقىلى اۋىل تۇرعىندارىنىڭ كاسىپكەرلىك الەۋەتىن ارتتىرۋ, قاراپايىم ازاماتتاردىڭ ءال-اۋقاتى مەن ءومىر ءسۇرۋ دەڭگەيىن جاقسارتۋ ماقساتىندا جاڭا كاسىپكەرلەر مەن كاسىپورىنداردىڭ سانىن ارتتىرۋعا مۇمكىندىك تۋادى. وسى كورمەگە كەلگەن جانە قازىلار القاسىنىڭ شەشىمىمەن ۇزدىك دەپ تانىلعان جەكە كاسىپكەرلەر بولاشاقتا ءوز ونىمدەرىن ەكسپورتتاۋعا, نارىقتا ءوز ورنىن تابۋعا ءبىزدىڭ تاراپىمىزدان قولداۋ كورەدى. بۇل جوبا ءىسىن جاڭادان باستاعان كاسىپكەرلەردىڭ وسۋىنە ترامپلين رەتىندە قىزمەت ەتەدى. قاتىسۋشىلاردىڭ اراسىندا شاعىن بيزنەس سۋبەكتىلەرى دە, جەكە تۇلعالار دا بار», دەدى سالتاناتتى شارانىڭ اشىلۋ راسىمىندە ءسوز العان اباي وبلىسى كاسىپكەرلەر پالاتاسىنىڭ ديرەكتورى ماقسات انۋاربەك ۇلى.
كورمە قورىتىندىسى بويىنشا 10 كاسىپكەر جارتىلاي فينالعا شىعادى. ولاردىڭ بيزنەس جوبالارى وڭىرلىك برەند كوميتەتىنىڭ وتىرىسىندا قارالىپ, ناتيجەسىندە ۇزدىك ءۇش جوبا رەسپۋبليكالىق جانە حالىقارالىق كورمەلەردە باق سىناپ, بەس ميلليون تەڭگەگە دەيىن مەملەكەتتىك گرانت الۋ مۇمكىندىگىنە يە بولادى. بۇعان قوسا ۇزدىك دەپ تانىلعان جوبا يەگەرلەرى اباي وبلىسىنىڭ كاسىپكەرلەر پالاتاسىنىڭ قولداۋىمەن ماركەتينگ سالاسىنان حابار الىپ, ەلەكتروندى كوممەرتسيا بويىنشا ترەنينگتەر مەن ءونىمدى جاقسارتۋ, تاۋار پايدالانۋشىلارىن تارتاتىن تارتىمدى لوگوتيپ ازىرلەۋ, قاپتاما جاساۋ بويىنشا ءادىس-تاسىلدەردى يگەرىپ شىعادى.
مەملەكەتىك گرانتتان ءۇمىتتى جانداردىڭ ءبىرى «كەرىم» اتاۋىمەن تىركەلگەن جەكە كاسىپكەر ماقسات كوشەرباەۆ وسى كورمەگە اقسۋات اۋدانىنان ارنايى كەلىپتى. اۋىل شارۋاشىلىعى قالدىقتارىنان وتىن دايىندايتىن ونىڭ ءونىمى كورمە قوناقتارىنىڭ قىزىعۋشىلىعىن تۋدىردى. كاسىپكەر سوزىنشە الداعى كۇندە كومىردى الماستىراتىن بۇل وتىندى دايىنداۋ ءۇشىن ارنايى اۆتوماتتاندىرىلعان قالىپتار كەرەك ەكەن. ەگەر مەملەكەتتىك قولداۋ بولسا, جۇمىسشى تارتىپ, پايدالى وتىننىڭ ونىمدىلىگىن ارتتىرعىسى كەلەتىنىن ايتتى.
«بالا كۇنىمنەن بەرى تەمىر ۇستاسى رەتىندە قىزمەت ەتتىم. سوندىقتان مالدىڭ تەزەگى مەن قورا-جايدىڭ اينالاسىنداعى قالدىقتاردى ىسكە جاراتۋ ءۇشىن ارنايى قالىپ ويلاپ تابۋ قيىنعا سوققان جوق. بۇل وي ماعان قوقىس پوليگوندارىنا تاستالاتىن جانە اۋىل-ايماقتا ورتەلىپ جاتاتىن قوقىستاردى كورگەننەن كەيىن كەلگەن ەدى. باستاپقى كەزدەرى ءشوپ-شالام قالدىقتارىنان وسىنداي وتىن جاساۋ كەرەگىن ءتۇسىنىپ ىسكە كىرىسىپ كەتتىم. بىزدە قازىر «تازا قازاقستان» ەكولوگيالىق اكتسياسى ءجۇرىپ جاتىر, قوقىس پوليگونىنداعى زاتتاردى وسىلاي پايداعا جاراتۋدى ويلاساق, وندا كۇن سايىن قىمباتتاپ جاتقان كومىردى الماستىراتىن وسىنداي وتىن كەرەك-اق», دەيدى اۋىلداعى اۋلاسىنان باستالعان كاسىبىن كوپشىلىككە تانىستىرعان جەكە كاسىپكەر ماقسات كوشەرباەۆ.
سونىمەن بىرگە ۇلتتىق تاعام ءداستۇرىن جالعاستىرۋشى رەتىندە ءوز ونىمدەرىن ۇسىنعان جارما اۋدانىنىڭ تۇرعىنى ايگۇل ەرعاليقىزى وسى كورمە-جارمەڭكەگە شۇجىق ونىمدەرىن اكەلگەن. از عانا ۋاقىتتىڭ ىشىندە وزدەرى تۇراتىن قالباتاۋ اۋىلى جۇرتشىلىعىنىڭ سۇرانىسىن تۋدىرعان ونىمدەردى الداعى ۋاقىتتا تسەح اشىپ, كاسىبىن ۇلعايتۋدى ماقسات تۇتىپتى. وسى سەكىلدى ەت ونىمدەرىمەن اينالىساتىن سەمەي قالاسىنىڭ تۇرعىنى مەرۋەرت نۇرجانقىزى دا ەجەلگى ءداستۇر بويىنشا ەتتى ىستاپ, شۇجىقتىڭ ءار ءتۇرىن شىعارىپ كەلەدى. بۇگىندە قولاستىندا ءۇش جۇمىسشى بار ىسكەر ايەل كەلەشەكتە ۇلكەن كاسىپورىن بولىپ قۇرىلۋدى قالايدى. اۋىل كاسىپكەرلەرى مەن ونىمدەرىنىڭ كورمە-جارمەكەسىن ۇيىمداستىرۋشىلار الداعى ۋاقىتتا اتالعان كىشى بيزنەس وكىلدەرىنىڭ وركەن جايارىنا سەنىمدى.
اباي وبلىسى
