سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
ءار مەدالدىڭ ورنى ايرىقشا
مەملەكەت باسشىسى, ەڭ الدىمەن, وليمپيادا چەمپيونى ەلدوس سمەتوۆتىڭ جەڭىسىنە ەرەكشە توقتالدى.
– ول بايراقتى باسەكەنىڭ العاشقى كۇندەرى جاقسىلىق ۇشكەمپىروۆتىڭ داڭقتى جولىن جالعادى. ەل تاريحىندا تۇڭعىش رەت دزيۋدودان وليمپيادانىڭ التىن مەدالىن الدى. ەلدوس باۋىرىم, سەن وليمپياداعا اتتانار الدىندا ماعان جانە بارلىق سپورت جانكۇيەرلەرىنە بار كۇش-جىگەرىمدى جەڭىسكە جەتۋ ءۇشىن جۇمسايمىن دەپ ۋادە بەردىڭ. سوزىڭدە تۇردىڭ. ناعىز جىگىتسىڭ! ءبىز ءبارىمىز سەنى ماقتان تۇتامىز. شىن مانىندە, قاتارىنان ءۇش رەت وليمپيادا جۇلدەگەرى اتانۋ – ناعىز چەمپيوننىڭ قولىنان كەلەتىن ەرلىك. سەنىڭ جەڭىستى جولىڭ سپورتشىلارىمىزعا جىگەر بەردى, بارشا حالقىمىزدى قۋانىشقا بولەدى, – دەدى پرەزيدەنت.
سونىمەن قاتار قاسىم-جومارت توقاەۆ تورتجىلدىقتىڭ دوداسىنان جۇلدەمەن ورالعان وزگە سپورتشىلارعا, باپكەرلەر مەن اتلەتتەردى دايىنداۋعا ۇلەس قوسقان ازاماتتارعا العىس ايتتى.
– ناريمان قۇربانوۆتىڭ كۇمىس جۇلدەسىن تاريحي جەتىستىك دەۋگە بولادى. گيمناستيكا شەبەرلەرى تۇڭعىش رەت وليمپيادا بيىگىن باعىندىرىپ وتىر. دەمەۋ جادىراەۆ پەن نۇربەك ورالباي تاماشا ونەر كورسەتتى. مەرگەندەرىمىز الەكساندرا لە مەن يسلام ساتباەۆ نىسانا كوزدەۋدەن قولا مەدال الدى. بۇل – 28 جىلدان بەرى ەلىمىزدىڭ وسى سپورت تۇرىنەن العان العاشقى جۇلدەسى. بالۋان عۇسمان قىرعىزباەۆ پەن بوكسشى نازىم قىزايباي جۇلدەگەرلەر قاتارىنا قوسىلدى. جالپى, بارلىق مەملەكەت وليمپياداعا ەڭ مىقتى سپورتشىلارىن جىبەرەدى. شىن مانىندە, جۇزدەن جۇيرىك, مىڭنان تۇلپار شىعىپ, الەمدىك باسەكەدە جەڭىسكە جەتۋ وڭاي ەمەس. مۇنداي جاھاندىق دودادا ەل قورجىنىنا تۇسكەن ءار مەدالدىڭ ورنى ايرىقشا. سوندىقتان بۇگىن مەن وليمپيادا جۇلدەسىنە يە بولعان بارشا سپورتشىمىزعا شىنايى ريزاشىلىعىمدى بىلدىرەمىن. جەڭىس جولىندا سپورتشى عانا ەمەس, سول سالانىڭ كوپتەگەن مامانى دا تەر توگەدى. مەن باپكەرلەرگە, سپورتشىلاردى دايىنداۋعا ۇلەس قوسقان باسقا دا كاسىپ يەلەرىنە العىس ايتامىن. ۇلتتىق وليمپيادا كوميتەتىنىڭ باسشىلارى جۇمىسقا جاڭا سەرپىن بەرىپ, حالىقارالىق ىنتىماقتاستىقتى دامىتۋ ءۇشىن ماڭىزدى قادام جاسادى. جاۋاپتى ساتتەردە سپورتشىلارىمىزدىڭ قاسىندا بولىپ, قولداۋ كورسەتتى. ۇلتتىق وليمپيادا كوميتەتى باستاعان ءىستى جالعاستىرىپ, الداعى ۋاقىتتا ناقتى ناتيجەگە جەتەدى دەپ ويلايمىن, – دەدى مەملەكەت باسشىسى.
بالالار سپورتىنا باسا ءمان بەرۋ قاجەت
پرەزيدەنتتىڭ ايتۋىنشا, پاريجدەگى باسەكە وليمپيادالىق سپورت تۇرلەرىن ودان ءارى قولداۋ ماڭىزدى ەكەنىن كورسەتتى. ويتكەنى كەيبىر سپورتشىلارىمىز جەڭىس تۇعىرىنا قولسوزىم جەردەن توقتادى, ۇزدىك وندىقتان كورىندى. بۇل ولاردىڭ شەبەرلىگىن ءارى جەڭىسكە دەگەن ەرىك-جىگەرىن بايقاتادى. ايتسە دە, مەملەكەت باسشىسىنىڭ پىكىرىنشە, كاسىبي سپورتتا شەشىمىن كۇتكەن تۇيتكىلدى ماسەلەلەر دە بارشىلىق.
– مەملەكەت ەڭ جوعارى دەڭگەيدەگى سپورتشىلاردى دايارلاۋعا جەتكىلىكتى مولشەردە قارجى بولەدى. سوندىقتان جۇرتشىلىقتىڭ حالىقارالىق جارىستاردا كەيبىر سپورت تۇرلەرىنەن جۇلدە كۇتۋى – زاڭدىلىق. سالالىق ۆەدومستۆو سپورتتىڭ وليمپيادالىق تۇرلەرىن دامىتۋ ىسىندە كەتكەن جۇيەلى قاتەلىكتەردى ەگجەي-تەگجەي تالداۋعا ءتيىس. كەشەندى رەفورما جاسايتىن ۋاقىت كەلدى. ال ونى جۇزەگە اسىرۋ ءۇشىن قۇزىرەتتى مينيسترلىك, ۇلتتىق وليمپيادا كوميتەتى جانە سپورت فەدەراتسيالارى ۇيلەسىمدى ارەكەت ەتۋى كەرەك. سپورتتا ءادىل باسەكەلەستىك رۋحى سالتانات قۇرۋى قاجەت. جەمقورلىقپەن تاباندى تۇردە كۇرەسىپ, جوعارى ناتيجەگە قول جەتكىزۋگە كەدەرگى كەلتىرەتىن پروتەكتسيونيزم سەكىلدى فاكتورلاردان ىرگەنى اۋلاق سالعان ءجون, – دەدى قاسىم-جومارت توقاەۆ.
بۇدان بولەك, مەملەكەت باسشىسى بۇقارالىق, سونداي-اق بالالار مەن جاسوسپىرىمدەر سپورتىنا باسا ءمان بەرۋ قاجەت ەكەنىن ايتتى.
– بۇل – وتە ماڭىزدى مىندەت. سەبەبى بۇقارالىق سپورتتى دامىتۋ ارقىلى ءبىز كاسىبي سپورتقا جول اشامىز جانە ەڭ باستىسى, ۇلت ساۋلىعىن جاقسارتامىز. سوندىقتان مەملەكەت سپورت ينفراقۇرىلىمىن دامىتۋ ءۇشىن ءتيىستى قاراجات بولۋدە, ياعني بالالاردىڭ جاستايىنان الاڭسىز سپورتپەن شۇعىلدانۋىنا قاجەتتى جاعدايدى جاساپ جاتىر. ەلىمىزدىڭ ايماقتارىندا 20 مىڭنان استام سپورت الاڭى جۇمىس ىستەپ تۇر, 16 مىڭنان اسا ارنايى كەشەن مەن زال بار. وسى نىسانداردىڭ بارلىعى تولىققاندى قىزمەت ەتۋگە ءتيىس جانە سپورتپەن اينالىسامىن دەگەن ءاربىر ادامعا قولجەتىمدى بولۋى كەرەك. بارلىق وبلىس ورتالىعىندا جانە اۋدانداردا فۋتبول, بوكس, كۇرەس, باسكەتبول, ۆولەيبول, ساداق اتۋ, ۇستەل تەننيسى, شاحمات جانە تاعى دا باسقا تانىمال سپورت تۇرلەرىنىڭ سەكتسياسى بولۋعا ءتيىس. بۇل – اكىمدەردىڭ مىندەتى. ال ۇكىمەت سپورت نىساندارىنىڭ جۇمىس تيىمدىلىگىنە ساراپتاما جۇرگىزىپ, وسى ماسەلە بويىنشا ءتيىستى شارالار قابىلداعانى دۇرىس, – دەدى پرەزيدەنت.
قاسىم-جومارت توقاەۆ سپورت رەزەرۆىن ازىرلەۋ ىسىندە بالالار مەن جاسوسپىرىمدەردىڭ سپورت مەكتەپتەرى نەگىزگى ءرول اتقاراتىنىنا نازار اۋدارىپ, ولاردىڭ جۇمىسىن جۇيەلەۋ جونىندە ماسەلە قوزعادى.
– ەلىمىزدە 500-دەن اسا بالالار مەن جاسوسپىرىمدەردىڭ سپورت مەكتەبى بار. بىراق ولاردىڭ قىزمەتىندە تۇيتكىلدى ماسەلەلەر از ەمەس. وسىنداي مەكتەپتەردىڭ باعدارلاماسىنا كىرگەن 162 سپورت ءتۇرىنىڭ تەك 52-ءسى عانا وليمپيادالىق سپورت تۇرىنە جاتادى. سوندىقتان وليمپيادالىق سپورت تۇرلەرىنىڭ رەزەرۆىن تولىقتىراتىن قابىلەتتى بالالار جەتىسپەيدى, سايىپ كەلگەندە سپورتتاعى جوعارى جەتىستىكتەردىڭ ناتيجەسى ناشارلايدى. قارجىنىڭ دۇرىس بولىنبەۋىنەن بيۋدجەت اقشاسىنىڭ باسىم بولىگى «جەلگە ۇشادى», – دەدى پرەزيدەنت.
بۇل رەتتە مەملەكەت باسشىسى سپورت سالاسىنا جوعارى بىلىكتى مامانداردى تارتۋ ءۇشىن بارىنشا قولايلى جاعداي جاساۋ كەرەك ەكەنىن اتاپ ءوتتى.
– سپورتتا «باق شابا ما, باپ شابا ما؟» دەگەن ءسوزدى ءجيى ايتىپ جاتامىز. شىن مانىندە, مىقتى باپكەردەن ءتالىم الۋ – تابىسقا جەتۋدىڭ بىردەن-ءبىر جولى. ناعىز سپورتشىنى بالا كەزىنەن تانىپ, ونىڭ قابىلەتىن ۇشتاپ, بويىنداعى دارىنىن اشاتىن دا – وسى باپكەر. سول سەبەپتى سپورت سالاسىنا جوعارى بىلىكتى مامانداردى تارتۋ ءۇشىن بارىنشا قولايلى جاعداي جاساۋ قاجەت.
وتاندىق اتلەتتەرگە سەنىم ارتقان ءجون
وكىنىشكە قاراي, كوپتەگەن تالانتتى باپكەر ءوز ەلىمىزدەن قولداۋ تاپپاي, شەتەل اسىپ كەتىپ جاتادى. ولار سول جەرگە بارىپ, جاس سپورتشىلاردى تاربيەلەيدى, ياعني باسقا مەملەكەتتىڭ ۇلتتىق قۇراما كوماندالارىن الەمدىك دودالارعا دايىندايدى. مىسالى, وسى وليمپيادا ويىندارىندا تۋنيس ەلىنىڭ تحەكۆوندودان ۇلتتىق قۇراماسى قازاق باپكەرى ەسبول سۇلتانوۆتىڭ جەتەكشىلىگىمەن ەكى مەدال جەڭىپ الدى, ونىڭ بىرەۋى – التىن مەدال. باپكەرلەرگە جان-جاقتى قولداۋ كورسەتۋ شارالارىن قولعا الۋ كەرەك, اسىرەسە ولاردىڭ قوعامداعى الەۋمەتتىك جانە كاسىبي مارتەبەسىن ارتتىرۋ وتە ماڭىزدى. ءبىر سوزبەن, بىزگە مىقتى باپكەرلەر مەكتەبىن جاساقتاۋ قاجەت. جالپى, باپكەرلەر قۇرامىن دايىنداۋ جانە تاڭداۋعا كەلگەندە, ياعني سپورت مەنەدجمەنتى ماسەلەسىندە وزىق حالىقارالىق تاجىريبەگە ارقا سۇيەگەن ءجون, – دەدى قاسىم-جومارت توقاەۆ.
پرەزيدەنت شەتەلدىك سپورتشىلارعا ازاماتتىق بەرىپ, ەل اتىنان دوداعا قوسۋ تاجىريبەسىن دوعارۋ كەرەك ەكەنىن ايتتى.
– ويتكەنى كەز كەلگەن لەگيونەر ۇلتتىق قۇراماعا شاقىرتۋ العىسى كەلەتىن جاس ءارى بولاشاعىنان كوپ ءۇمىت كۇتتىرەتىن اتلەتتەرىمىزدىڭ جولىن كەسەدى. ودان گورى قازىر بىزدە دامۋى كەنجەلەپ تۇرعان سپورت تۇرلەرىنەن مىقتى شەتەلدىك باپكەرلەردى تارتۋ مۇمكىندىگىن قاراستىرعان ءجون. لەگيونەر-سپورتشىلاردىڭ جەتىستىگى بۇگىن مەرەيىڭدى وسىرگەنىمەن, ەرتەڭ ابىرويىڭدى اسقاقتاتپايدى. بۇل جەردە كاسىبي باپكەرگە باسىمدىق بەرگەن ءجون, – دەدى مەملەكەت باسشىسى.
قاسىم-جومارت توقاەۆ وليمپيادا رەزەرۆىن دايىندايتىن مەكتەپ-ينتەرناتتار مەن كوللەدجدەرگە قولداۋ كورسەتۋ كەرەك ەكەنىن ايتتى.
– سپورت مەكتەبىندەگى باپكەرلەردىڭ بىلىكتىلىگىن ارتتىرۋ – وتە ماڭىزدى مىندەت. قازىر ولاردىڭ جارتىسىنا جۋىعىندا ارنايى دارەجە جوق. سوندىقتان كاسىبي تۇرعىدان شىڭداۋ, ياعني جەتىلدىرۋ جۇمىسىنا باسا ءمان بەرۋ قاجەت. ۇكىمەت اكىمدىكتەرمەن بىرگە وسى ماسەلەنى شەشۋ ءۇشىن ناقتى شارالار قابىلداۋعا ءتيىس.
وليمپيادا رەزەرۆىن دايىندايتىن مەكتەپ-ينتەرناتتار مەن كوللەدجدەرگە جان-جاقتى قولداۋ كورسەتۋ كەرەك. مۇنداي وقۋ ورىندارى بارلىق ايماقتا بولۋى قاجەت. الماتىدا جاڭا وليمپيادالىق دايارلىق بازاسى سالىندى. بۇل ءبىزدىڭ سپورتشىلارىمىزدىڭ جوعارى دەڭگەيدە جاتتىعۋىنا زور مۇمكىندىك بەرەدى. قازىر استانادا ۇلتتىق سپورت ۋنيۆەرسيتەتى سالىنىپ جاتىر. وقۋ ورنى سپورتتىق ءبىلىم بەرۋمەن شەكتەلمەيدى. وندا زاماناۋي زەرتتەۋ ورتالىعى اشىلادى. وسىنىڭ ءبارى ەلىمىزدە چەمپيونداردىڭ جاڭا بۋىنىن دايىنداپ شىعارۋعا جول اشاتىنىنا سەنىمدىمىن, – دەدى مەملەكەت باسشىسى.
ءداستۇرلى قۇندىلىققا بەت بۇرۋ ماڭىزدى
پرەزيدەنت جاس سپورتشىلاردى ءتول تانىم-تۇسىنىگىمىزگە ساي تاربيەلەپ, ولاردىڭ بويىنا ءداستۇرلى قۇندىلىقتاردى ءسىڭىرۋ وتە ماڭىزدى دەپ سانايدى.
– ۇلتتىڭ جانى – تازا, ساناسى – ساۋ بولۋعا ءتيىس. سپورتشىلار, ەڭ الدىمەن, سپورتپەن شۇعىلدانۋى كەرەك. تاعى ءبىر مىندەت – سپورت قاۋىمداستىقتارىنىڭ تيىمدىلىگىن ارتتىرۋ. ولاردىڭ كوبى مىقتى سپورتشىلاردى ىرىكتەپ, كاسىبي تۇرعىدان ءوسىرۋدىڭ وڭتايلى جولىن تاپپاي كەلەدى. سونىڭ سالدارىنان ناعىز دارىندى جاستار كوزگە ىلىنبەي, جولى اشىلماي قالادى. سوندىقتان ەل ىشىندەگى ءتۇرلى جارىستا ادىلدىك بولۋىن قامتاماسىز ەتۋ كەرەك. سپورتشىلاردى ىرىكتەۋ جۇمىستارى بارىنشا اشىق جۇرگىزىلۋگە ءتيىس. سونىمەن قاتار سپورتشىلاردى دايارلاۋدىڭ بىرىڭعاي ستاندارتىن ازىرلەپ, زاماناۋي ادىستەمەلەر نەگىزىندە باپكەرلەر مەن تورەشىلەردىڭ بىلىكتىلىگىن ارتتىرۋعا باعىتتالعان شارالار قابىلداۋ قاجەت. سپورتشىلاردى ساپالى مەديتسينالىق قىزمەتپەن قامتاماسىز ەتۋگە فەدەراتسيالار تاراپىنان جەتكىلىكتى كوڭىل بولىنبەي جاتقانىنا ءجيى شاعىم تۇسەدى. بۇكىل الەم سپورت مەديتسيناسى كاسىبي دايارلىقتىڭ اجىراماس بولىگى ەكەنىن مويىنداپ وتىر. بۇل – جوعارى تەحنولوگيالىق سالا. يننوۆاتسياسىز, وزىق عىلىمي ىزدەنىسسىز جانە جوعارى بىلىكتى ماماندارسىز ءىس ونبەيدى. مەملەكەت قاجەت رەسۋرستى ءبولىپ وتىر. دەمەۋشىلەردەن دە قىرۋار قارجى تۇسەدى. فەدەراتسيالار سونى ماقساتقا ساي جۇمساۋعا ءتيىس. رەسپۋبليكالىق فەدەراتسيالاردىڭ قىزمەتىنە ساراپتاما جۇرگىزىپ, قارجىلاندىرۋ تاسىلدەرىن قايتا قاراۋدى تاپسىرامىن, – دەدى قاسىم-جومارت توقاەۆ.
مەملەكەت باسشىسىنىڭ ايتۋىنشا, كەيىنگى بەس جىلدا جوعارى جەتىستىكتەر سپورتىنا شىعىن ەكى ەسە وسكەن, بىراق سوعان لايىق ناتيجە جوق.
– سالالىق مينيسترلىك, ۇلتتىق وليمپيادا كوميتەتى, وڭىرلەردەگى سپورت باسقارمالارى مەن فەدەراتسيالاردىڭ جۇمىسىندا ولقىلىق كوپ ءارى ءوزارا ۇيلەسىمدى جۇمىس جوق دەپ سانايمىن. قازىرگى جاعدايعا قاراعاندا, سپورت فۋنكتسيونەرلەرى سالانى دامىتۋمەن ەمەس, ميللياردتاعان بيۋدجەت قارجىسىن يگەرۋمەن الەك. ولار تۇپكى ناتيجەگە باس اۋىرتپايدى. سپورت سالاسىندا جەمقورلىق فاكتىلەرى ءجيى كەزدەسەدى. بۇل تەك وتاندىق سپورتتىڭ دامۋىنا ەمەس, ەلدىڭ ابىروي-بەدەلىنە نۇقسان كەلتىرەدى. مۇندايعا جول بەرۋگە بولمايدى! – دەدى قاسىم-جومارت توقاەۆ.
بۇل رەتتە پرەزيدەنت بۇگىندە ءار ءوڭىر قانداي سپورتتى قولدايتىنى تۋرالى شەشىمدى ءوز بەتىنشە قابىلدايتىنىن سىنعا الدى. ۇكىمەتكە جاعدايدى باقىلاۋعا الىپ, سپورتقا قاتىستى مەكەمەلەردىڭ بارلىق دەڭگەيىندەگى باسقارۋ ۆەرتيكالىن قالپىنا كەلتىرۋ جونىندە تاپسىرما بەردى. سونىمەن قاتار ەلىمىزدىڭ سپورت قاۋىمداستىعى مەن شەتەلدەردە ۇلتتىق وليمپيادا كوميتەتىنىڭ بەدەلىن كوتەرۋ تۋرالى مىندەت جۇكتەدى.
ۇلتتىق سپورتقا قولداۋ ارتتى
مەملەكەت باسشىسى ۇلتتىق سپورت تۇرلەرىن دامىتۋعا ەرەكشە ءمان بەرىلىپ جاتقانىنا نازار اۋدارىپ, ەلىمىزدە وتەتىن V دۇنيەجۇزىلىك كوشپەلىلەر ويىندارىنىڭ ءمان-ماڭىزىنا توقتالدى.
– بۇل سايىس ارقىلى ءبىز, ەڭ الدىمەن, ءتول وركەنيەتىمىزدىڭ تامىرى تەرەڭ تاريحىن جەر-جاھانعا پاش ەتەمىز. سونداي-اق ءدۇبىرلى دودا ءتۇرلى ەلدىڭ دوستىعىن نىعايتاتىن ماڭىزدى قادام بولماق. كوشپەلىلەر ويىندارى ەكولوگيانى ساقتاۋ, قازاقستاندى جاسىل ەلگە اينالدىرۋ جانە اباتتاندىرۋ تاقىرىبىن كوتەرۋگە جاقسى مۇمكىندىك بەرەدى. وليمپيادا كەزىندە ءتۇبى ءبىر تۇركى جۇرتى ءوزارا تىلەكتەستىك پەن جاناشىرلىقتىڭ شىنايى ۇلگىسىن كورسەتتى. سپورتشىلار دا, جانكۇيەرلەر دە كورشى ەلدەردىڭ ءاربىر جەڭىسىنە شىن جۇرەكتەن قۋاندى. ءبىر-بىرىنە قولداۋ ءبىلدىرىپ, قاجەت بولسا كومەكتەرىن دە اياعان جوق. ءتىپتى بالۋاندارىمىز جەڭىس تۇعىرىنا تۋعان باۋىرلار سياقتى بىرگە كوتەرىلدى. حالىقتار اراسىنداعى رياسىز دوستىق دەگەنىمىز – وسى! بۇل – شىن مانىندە, باعا جەتپەس بايلىق. ءبىز بارلىق سالادا ءبىر-بىرىمىزگە تىلەكتەسپىز. كوشپەلىلەر ويىندارى باۋىرلاس ەلدەردىڭ وسىنداي مىزعىماس بىرلىگىن بەكەمدەي تۇسپەك. سوندىقتان ونى جوعارى دەڭگەيدە ۇيىمداستىرۋىمىز كەرەك, – دەدى پرەزيدەنت.
قاسىم-جومارت توقاەۆ ءسوزىن قورىتىندىلاي كەلە, ءبىز ءۇشىن بۇقارالىق سپورتقا جۇيەلى قولداۋ كورسەتۋ, جان-جاقتى دامىعان, سالاماتتى ۇلت قالىپتاستىرۋ ماڭىزدى ەكەنىن ەسكە سالدى.
– ءبىز وسى ماقساتتا دەنساۋلىق ساقتاۋ, الەۋمەتتىك سالا, ءبىلىم, عىلىم, مادەنيەت جانە سپورت سالالارىندا اۋقىمدى رەفورمالار جۇرگىزىپ جاتىرمىز. سوندىقتان قالايدا مەدال الۋ – ءبىزدىڭ جول ەمەس. بۇعان دەيىن جالعان اتاقتىڭ جەتەگىنە ەرىپ, ءتۇرلى قيتۇرقى ارەكەت جاسالعانى بارىمىزگە ءمالىم. سونىڭ سالدارىنان كوپتەگەن سپورتشى دەنساۋلىعىنان ايىرىلدى. ولار سپورتتان ءبىرجولاتا كەتتى. ەلىمىزدىڭ ابىروي-بەدەلىنە نۇقسان كەلدى. قازاقستانعا ءبىر ساتتىك, الدامشى جەتىستىكتەر كەرەك ەمەس. جۇرتتىڭ ءبىز تۋرالى نە ويلايتىنىنا الاڭداماي, ءتول بولمىس-ءبىتىمىمىزدى ساقتاۋىمىز كەرەك. جان-جاعىمىزعا جالتاقتاماي, العا قاراي باتىل ءارى جۇيەلى قادام باسۋىمىز قاجەت. كەز كەلگەن نارسەگە بولا سالىمىز سۋعا كەتىپ, كۇڭىرەنە بەرگەننەن, كۇيزەلىسكە تۇسكەننەن پايدا جوق. بۇل جونىندە مەن بۇعان دەيىن دە ايتقان ەدىم. ءبىزدىڭ ماقساتىمىز – بارشاعا ايقىن. بۇل – وزىق ەل بولۋ. سوندىقتان ءبىز ءبىر ەل, ءبىر حالىق بولىپ, تەك العا قاراي ءجۇرۋىمىز كەرەك. وليمپيادانىڭ ەڭ باستى قۇندىلىعى – مەدال عانا ەمەس. جاھاندىق باسەكە كەزىندە تۇتاس ەلىمىز ءوزارا تىلەكتەس, نيەتتەس بولدى. ەڭ باستى قۇندىلىق – وسى, – دەدى مەملەكەت باسشىسى.
پاراليمپيادا قاتىسۋشىلارىنا ساتتىلىك تىلەدى
سالتاناتتى جيىندا پرەزيدەنت بۇگىن باستالاتىن پاراليمپيادا ويىندارى تۋرالى دا ويىن ءبىلدىرىپ, ەل سپورتشىلارى وسى جارىستا بۇعان دەيىن دە زور تابىسقا جەتكەنىن اتاپ ءوتتى.
– ولار وسى جولى دا جوعارى دەڭگەيدە ونەر كورسەتىپ, جەڭىس تۇعىرىنان كورىنەدى دەپ سەنەمىن. ساتتىلىك تىلەيمىن! ارينە, وليمپيادا چەمپيونى اتانۋ – ءار سپورتشىنىڭ ارمانى. ول ءۇشىن ۇزاق جىل بويى ۇزدىكسىز دايىندالىپ, تىنىمسىز تەر توگۋ قاجەت. بولاشاقتا دا كوپتەگەن بايراقتى بايگە, ءدۇبىرلى دودا بولادى. سپورتشىلارىمىز ءالى تالاي بەلەسكە شىعادى دەپ سەنەمىن. قاي سالادا بولسىن, العا ماقسات قويىپ, وعان تاباندىلىقپەن, ەڭبەكقورلىقپەن ۇمتىلۋ قاجەت. مەن بۇل تۋرالى ۇنەمى ايتىپ ءجۇرمىن. سىزدەردىڭ بۇگىنگى جەتىستىكتەرىڭىز – ەرتەڭگى جەڭىستەرىمىزدىڭ باستاۋى. قازاق جۇرتى سايىپقىران ورەندەرىن ماقتان تۇتادى. جاس ۇرپاق سپورتشىلارىمىزدان ۇلگى-ونەگە الادى. ولار سىزدەرگە قاراپ بوي تۇزەيدى. سوندىقتان ءاردايىم چەمپيون دەگەن اتقا لايىق بولىڭىزدار, – دەدى مەملەكەت باسشىسى.
پرەزيدەنت پاراليمپيادا ويىندارىنا قاتىساتىن سپورتشىلارىمىزعا ساتتىلىك تىلەپ, پاريج وليمپياداسىندا ەل نامىسىن قورعاعان سپورتشىلار مەن باپكەرلەردى مەملەكەتتىك ناگرادامەن ماراپاتتادى.
سونىمەن قاتار سالتاناتتى جيىندا وليمپيادا چەمپيونى, دزيۋدوشى ەلدوس سمەتوۆ, بايراقتى باسەكەنىڭ قولا جۇلدەگەرلەرى, بوكسشى نازىم قىزايباي مەن مەرگەن الەكساندرا لە ءسوز سويلەپ, جىلى لەبىزدەرىن ءبىلدىردى.
