فوتو: gov.kz
ءىس-شارا اياسىندا قاتىسۋشىلارعا قازاقستاننىڭ اتوم ەنەرگەتيكاسى مەن عىلىم سالاسىنداعى جەتىستىكتەرى, وسى سالاداعى مۇمكىندىكتەرى تانىستىرىلدى. كورمە اتوم سالاسىنا ماماندار دايىندايتىن ەلدەگى جەتەكشى ۋنيۆەرسيتەتتەرىنىڭ عىلىمي جانە كادرلىق الەۋەتىن دە كورسەتتى.
«قازاتومەكسپو – جاي عانا كورمە ەمەس, بۇل ەلىمىزدىڭ دامۋىنداعى ماڭىزدى قادام. ءبىز قازاقستاننىڭ بەيبىت اتومداردى ودان ءارى دامىتۋ ءۇشىن پايدالانا وتىرىپ, اتوم ەنەرگەتيكاسىندا جەتەكشى ورىنعا شىعۋعا دايىن ەكەنىن بۇكىل الەمگە كورسەتەمىز. بۇل ءىس شارا ىنتىماقتاستىق پەن ءبىزدىڭ سالاعا ينۆەستيتسيا سالۋدىڭ جاڭا پەرسپەكتيۆالارىن اشادى», دەدى «قازاقستان اتوم ەلەكتر ستانتسيالارى» جشس باس ديرەكتورى تيمۋر جانتيكين.
كورمەدە قازاقستاندا اتوم ەلەكتر ستانتسياسىن سالۋ بويىنشا الەۋەتتى شەتەلدىك ەكسپونەنتتەر رەتىندە – «قىتاي ۇلتتىق يادرولىق كورپوراتسياسى» (CNNC), «كورەيانىڭ سۋ رەسۋرستارى جانە يادرولىق ەنەرگەتيكا كورپوراتسياسى» (KHNP), «Électricité de France» (EDF), سونداي-اق رەسەيلىك «روساتوم» مەملەكەتتىك كورپوراتسياسى قاتىستى. بۇل كومپانيالار وزدەرىنىڭ يادرولىق تەحنولوگيالارىن, جەتىستىكتەرىن, قازىر اتقارىپ جاتقان جوبالارى مەن جوسپارلارىن جۇرتشىلىققا تانىستىردى. سونىمەن قاتار يادرولىق سالادا جۇمىس ىستەيتىن «Samsung» جانە «Assystem» حالىقارالىق كومپانيالارىنىڭ ستەندتەرىن اتاپ وتكەن ءجون.
ء«بىز كورمەگە قاتىسقانىمىزعا قۋانىشتىمىز. بۇل قازاقستاندىق سەرىكتەستەرگە سوڭعى جەتىستىكتەرىمىزبەن تانىستىرىپ, بولاشاق بىرلەسكەن جوبالاردى تالقىلاۋدىڭ بىرەگەي مۇمكىندىگى. قازاقستاننىڭ اتوم ەنەرگەتيكاسى سالاسىندا وراسان زور الەۋەتى بار جانە ءبىز ونىڭ دامۋىنا ۇلەس قوسۋعا دايىنبىز», دەدى تاياۋ جانە ورتالىق ازيا, تاياۋ شىعىس وڭىرلەرى ءۇشىن جاڭا ەنەرگەتيكالىق قۇرىلىس سالاسىنداعى حالىقارالىق جوبالار جونىندەگى ۆيتسە-پرەزيدەنتى گيوم پۋراۆە.
كورمە قاتىسۋشىلارى يادرولىق تەحنولوگيا سالاسىنداعى سوڭعى ازىرلەمەلەردى, سونىڭ ىشىندە جاڭا بۋىن رەاكتورلىق قوندىرعىلاردى, قاۋىپسىزدىك جانە باقىلاۋ جۇيەلەرىن, راديواكتيۆتى قالدىقتاردى باسقارۋ تەحنولوگيالارىن ۇسىندى. اتوم سالاسى ءۇشىن جوعارى بىلىكتى مامانداردى دايارلاۋ ماسەلەلەرىنە ەرەكشە نازار اۋدارىلدى.
قازاقستان رەسپۋبليكاسىنىڭ ۇلتتىق يادرولىق ورتالىعى اتوم ونەركاسىبىنىڭ ەڭ ءىرى جانە ەڭ زاماناۋي تاجىريبەلىك بازاسى بار ەلىمىزدىڭ فلاگمانىنا اينالدى. ونىڭ قۇرامىنا بىرەگەي زەرتتەۋ يادرولىق رەاكتورلارى – يۆگ1.م جانە يگر, سونداي-اق الەمدە تەڭدەسى جوق قازاقستاندىق تەرمويادرولىق ماتەريالتانۋ توكاماك كتم كىرەدى. سونداي-اق رەاكتوردان تىس ءارتۇرلى ەكسپەريمەنتتەر جۇرگىزۋگە ارنالعان قوندىرعىلار مەن ستەندتەر, مامانداندىرىلعان زەرتحانالار جانە يادرولىق سىناقتاردى باقىلاۋدىڭ حالىقارالىق جۇيەسىنىڭ بولىگى بولىپ تابىلاتىن گەوفيزيكالىق باقىلاۋ ستانتسيالارىنىڭ جەلىسى ۇسىنىلعان.
«كورمەنىڭ تاقىرىبى مەن ۇلتتىق يادرولىق ورتالىقتىڭ قۇزىرەتىن ەسكەرە وتىرىپ, كورمەدە يادرولىق ەنەرگەتيكالىق قاۋىپسىزدىك ماسەلەلەرىن شەشۋگە ەرەكشە كوڭىل بولىنەدى. كاسىپورىننىڭ نەگىزگى قۇزىرەتتەرىنىڭ ءبىرى – پەرسپەكتيۆتى جانە قازىرگى ۋاقىتتا قولدانىلىپ جۇرگەن اتوم ەنەرگەتيكالىق رەاكتورلارىنىڭ قاۋىپسىزدىگىن جاقسارتۋ جانە حالىققا جانە قورشاعان ورتاعا تەرىس اسەر ەتۋ قاۋپىن ازايتۋ بويىنشا جۇمىس. ورتالىق جاپونيانىڭ, فرانتسيانىڭ جانە رەسەيدىڭ جەتەكشى ۇيىمدارىمەن بىرلەسىپ ءىرى عىلىمي جوبالاردى جۇزەگە اسىرۋدا», دەدى قازاقستان رەسپۋبليكاسى ۇلتتىق يادرولىق ورتالىعىنىڭ باسشىسى, فيزيكا-ماتەماتيكا عىلىمدارىنىڭ دوكتورى ەرلان باتىربەكوۆ.
كورمەدە جەتەكشى الەمدىك جانە قازاقستاندىق ساراپشىلار مەن عالىمداردىڭ قاتىسۋىمەن پلەنارلىق وتىرىستار دا بولدى. قاتىسۋشىلار قازاقستاننىڭ اتوم ەنەرگەتيكاسىن دامىتۋ پەرسپەكتيۆالارىن, ونىڭ ىشىندە جاڭا اتوم ەلەكتر ستانتسياسىن سالۋ جانە ەكونوميكانىڭ ءارتۇرلى سالالارىندا اتوم ەنەرگياسىن پايدالانۋدى كەڭەيتۋ ماسەلەلەرىن تالقىلادى. سونداي-اق اتوم ەنەرگەتيكاسىنىڭ قاۋىپسىزدىگى مەن سەنىمدىلىگى ماسەلەلەرى جانە وسى سالاداعى حالىقارالىق ىنتىماقتاستىق باعىتتارى تالقىلاندى.
«قازاتومەكسپو – عالىمدار مەن زەرتتەۋشىلەر ءۇشىن ءوز جەتىستىكتەرىمەن بولىسۋگە جانە بىرلەسكەن جوبالار ءۇشىن جاڭا سەرىكتەستەر تابۋعا تاماشا مۇمكىندىك. يادرولىق فيزيكا ينستيتۋتى اتوم ەنەرگياسىن بەيبىت ماقساتتا پايدالانۋ سالاسىنداعى قازاقستانداعى جالعىز عىلىمي-زەرتتەۋ ۇيىمى بولىپ تابىلادى. بۇل كورمەنىڭ ناتيجەلەرى الەمدىك اتوم عىلىمىنىڭ دامۋىنا زور ۇلەس قوساتىنىنا سەنىمدىمىز», دەدى ەنەرگەتيكا مينيسترلىگى يادرولىق فيزيكا ينستيتۋتىنىڭ باسشىسى سايابەك ساحيەۆ.
KazAtomExpo جاھاندىق اتوم ونەركاسىبىندەگى جارقىن وقيعاعا اينالدى جانە قازاقستاننىڭ وسى سالاداعى سەنىمدى جانە پەرسپەكتيۆالى سەرىكتەس مارتەبەسىن راستادى.
