فوتو: syrboyi.kz
قاداعالاۋ ورگانى باسقا وڭىرلەرگە تۇراقتى تۇرۋ ءۇشىن قونىس اۋدارعان, ەڭبەك قاتىناستارى توقتاتىلعان, باسپاناسىن جەكەشەلەندىرىپ العان جۇزدەن استام ازاماتتىڭ پاتەر الۋ كەزەگىندە ءالى دە بار ەكەنىن انىقتاعان.
«سونىمەن قاتار مۇقتاج ازاماتتاردىڭ تىزىمىندە قايتىس بولعان 11 ازامات كەزەكتە تۇرعان. تالداۋ ناتيجەسىمەن كوممۋنالدىق تۇرعىن ءۇي قورىنان تۇرعىن ۇيگە مۇقتاج ازاماتتاردىڭ كەزەكتەگى تىزىمدەرىن تۇگەندەۋ جۇمىستارى جەرگىلىكتى اتقارۋشى ورگاندار تاراپىنان دۇرىس جۇرگىزىلمەگەنى انىقتالدى. اتالعان فاكتىلەر بويىنشا پروكۋرورلىق قاداعالاۋ اكتىسى ەنگىزىلىپ, زاڭ بۇزۋشىلىقتار جويىلدى», دەلىنگەن حابارلامادا.
انىقتالعانداي, اقتوبە وبلىسىندا 36 مىڭنان استام ادام كەزەكتە تۇر, ونىڭ ىشىندە كوپبالالى وتباسىلار, جەتىم بالالار مەن حالىقتىڭ الەۋمەتتىك وسال توپتارىنا جاتاتىن تۇرعىندار بار.
