اتالعان ءىس-شاراعا الەمنىڭ 170-كە جۋىق كاسىپورنى قاتىستى. ولاردىڭ قاتارىندا «Tesla», «Siasun» سياقتى ءىرى جاھاندىق كومپانيالار دا بار. ولار 600-دەن اسا يننوۆاتسيالىق ءونىمىن تانىستىردى. بۇل تەحنولوگيالار الداعى ۋاقىتتا ونەركاسىپ, مەديتسينا, قۇرىلىس پەن كولىك سالالارىندا قولدانىلادى. 2024 جىلدىڭ شىلدە ايىنداعى ستاتيستيكاعا سۇيەنسەك, قىتايدا روبوتقا قاتىستى 190 000-نان استام ءتيىمدى پاتەنت جاسالعان. بۇل – الەمدەگى جالپى پاتەنتتەردىڭ شامامەن ۇشتەن ەكىسىن قۇرايدى.
مارستاعى مۇحيت
مارستىڭ بەتكى قاباتىنان 20 شاقىرىم تەرەڭدىكتە سۇيىق سۋدىڭ ۇلكەن قويماسى تابىلدى. مۇنى NASA-نىڭ «InSight» عارىش اپپاراتى جيناعان سەيسميكالىق مالىمەتتەر دالەلدەدى.
بۇعان دەيىن مۇندا سۋ تەك مۇز نەمەسە بۋ تۇرىندە عانا بولادى دەپ ەسەپتەلگەن ەدى. جاڭا زەرتتەۋلەر ءۇش ميلليارد جىل بۇرىن مارس بەتىندە ۇلكەن كولدەر, مۇحيتتار مەن وزەندەر بولعانىن راستادى. الايدا ماگنيت ءورىسى بىرتىندەپ جوعالعان كەزدە, پلانەتا بەتىندە سۋ تارتىلا تۇسكەن. «بۇل تەرەڭدىك, ياعني 11-20 شاقىرىم – سۋدىڭ سۇيىق كۇيىندە بولۋى ءۇشىن جەتكىلىكتى. بىراق وعان جەتۋ وڭاي ەمەس», دەيدى زەرتتەۋدىڭ جەتەكشى اۆتورى, كاليفورنيا ۋنيۆەرسيتەتىنىڭ عالىمى ۆاشان رايت.
ەلبرۋس شىڭىندا كۇي تارتقان
استانالىق الىبەك قايىربەك ەۋروپانىڭ ەڭ بيىك نۇكتەسىندە «اداي» كۇيىن ورىندادى.
26 جاستاعى جىگىت ەلبرۋس شىڭىنا ءبىر اپتا كولەمىندە جەتكەن. «دومبىرانى مۇنداي بيىكتىككە كوتەرۋ وڭاي ەمەس. ويتكەنى ول جەڭىل بولعاندىقتان, سىنىپ قالۋى ابدەن مۇمكىن. ايازدان جارىلىپ كەتۋى دە ىقتيمال. سول سەبەپتى ۇلتتىق اسپابىمىزدى كوزدىڭ قاراشىعىنداي ساقتاپ, 5 642 مەتر بيىكتىككە الىپ شىقتىم. وسىلايشا, دومبىرانى الەمگە كورسەتىپ, ونىڭ ناسيحاتىنا مەن دە ۇلەس قوسقىم كەلدى», دەيدى ەلوردالىق الىبەك قايىربەك.
