استانا. 23 قاڭتار. قۇرلىقتىق حوككەي ليگاسىندا وينايتىن استانالىق «بارىس» ءوز ايدىنىندا نوۆوسيبيرسكىنىڭ «ءسيبيرىن» 3:2 ەسەبىمەن جەڭدى. بۇل تۋرالى egemen.kz حابارلادى.
«بارىس» ويىندى بىردەن شابۋىلمەن باستادى. «قازاقستان» سپورت كەشەنىنە جينالعان جانكۇيەرلەر 9-مينۋتتا قاقپاعا العاش ەنگەن شايبانىڭ كۋاسى بولدى. كەزەكتى شابۋىلدىڭ بىرىندە كونستانتين پۋشكارەۆتان پاس العان تالعات جايلاۋوۆ ەسەپ اشىپ, كومانداسىن العا شىعاردى.
ارادا 6 مينۋت وتپەي جاتىپ, ناتيجەلى پاس شىعارعان پۋشكارەۆ ويىن سوڭىنا دەيىن ايدىننان قۋىلدى. تورەشىنىڭ مۇنداي شەشىم قابىلداۋىنا كوستيانىڭ قارسىلاس كوماندا ويىنشىسىنىڭ باسىنا وتە قاۋىپتى سوققى جاساۋى سەبەپ بولدى. وسى جايتتان كەيىن, ەرەجەگە سايكەس ءبىزدىڭ كوماندا 5 مينۋتتىق ايىپ ۋاقىتىن الدى. سونداي-اق, اتالمىش قاقتىعىسقا قاتىسقانى ءۇشىن قوس كوماندادان دا ءبىر ويىنشىدان ەكى مينۋتقا ايدىننان قۋىلدى. سوعان سايكەس, كوماندالار قاقپاشىنى ساناماعاندا 3:4 فورماتىندا ويناۋعا ءماجبۇر بولدى. دالىرەگى, قوناقتار ويىنشىلار سانى جاعىنان باسىمدىققا يە بولعان ەدى. اتالمىش مۇمكىندىكتى ءمۇلت جىبەرمەگەن سىبىرلىكتەر 16-مينۋتتا پاتريكحەرسليدىڭ كومەگىمەن ەسەپتى تەڭەستىرىپ كەتتى.
ەكىنشى كەزەڭدە ويىن تەڭ جاعدايدا ءوربىدى. ەكى تاراپ تا ءبىر مارتەدەن ويىنشىلار سانى بويىنشا باسىمدىققا يە بولعانىمەن, تابلوداعى ەسەپ وزگەرمەدى. تەك, ۇزىلىسكە 3 مينۋت قالعان كەزدە رەسەيلىك كوماندا ساپىنان ستەپان ساننيكوۆ مەرگەندىگىمەن كوزگە ءتۇسىپ, «سيبير» 1:2 ەسەبىمەن العا شىقتى.
سوڭعى شەشۋشى كەزەڭدە اندرەي نازاروۆ باپتايتىن كوماندا ايانىپ قالمادى. كەزدەسۋدىڭ 48-مينۋتىندا تورەشى «سيبير» ساپىنان د.كۋرگيشەۆتى تاياعىن وتە جوعارى كوتەرگەنى ءۇشىن ەكى مينۋتقا ايدىننان قۋدى. وزدەرىنە بەرىلگەن مۇمكىندىكتى ۇتىمدى پايدالانعان «بارىس» حوككەيشىلەرى نيكولاي انتروپوۆتىڭ ارقاسىندا تارازى باسىن تەڭەستىردى. ناتيجەلى شابۋىلعا ۇيىتقى بولعاندار رومان ستارچەنكو مەن كەۆين داللمەن ەكەنىن ايتا كەتەيىك.
ارادا ەكى مينۋت ۋاقىت وتپەي جاتىپ ر.ستارچەنكونىڭ دا «»قانجىعاسى مايلاندى». قورعاۋشى مايك ءلانديننىڭ كوك جولاقتىڭ بويىنان جاساعان سوققىسىن «سيبير» قاقپاشىسى ا.سالاك قايتارعانىمەن, دەر كەزىندە قاجەت جەردەن تابىلعان رومان ەسەپتى ەسەلەپ, كومانداسىنا ماڭىزدى جەڭىس سىيلادى. بۇل روماننىڭ وسى ماۋسىمداعى 19-شايباسى.
نەگىزى اتالمىش ويىن وتە دورەكى ءوتتى. ونى قوس كوماندادان التى ويىنشىدان ەكى مينۋتتىق ايىپ ۋاقىتىمەن جازالانعانىنان كورۋگە بولادى. سونداي-اق, ويىندا سوعىلعان بەس شايبانىڭ ۇشەۋى كوماندالار باسىمدىققا يە بولعان كەزدە جۇزەگە استى.
وسى جەڭىسىنەن كەيىن «بارىس» شىعىس كونفەرەنتسياسىنداعى 6-ورنىن ساقتاپ قالدى. قورجىنىمىزدا ازىرگە 72 ۇپاي بار. كەلەسى ويىندى 28 قاڭتار كۇنى ءوز ايدىنىمىزدا رەسەيلىك «سەۆەرستالعا» قارسى وتكىزەمىز.
ال بىزبەن بىرگە شىعىس كونفەرەنتسياسىندا وينايتىن سىبىرلىكتەرگە بۇل جەڭىلىس ايتارلىقتاي اۋىر ءتيدى دەۋگە نەگىز جوق. سەبەبى, بىزدەن 20 ۇپايى كوپ ولار كونفەرەنتسيانىڭ تۋرنير كەستەسىندە 4-ورىنعا نىق تابان تىرەپ تۇر.
ەلامان قوڭىر.
دەرەك: egemen.kz.
سۋرەت: hcbarys.kz.
