ەرمەك مارجىقپاەۆ: وليمپياداداعى ءاربىر مەدال – جاستارعا جاڭا مۇمكىندىك

– ەرمەك بورانباي ۇلى, سپورتشى­لارىمىزدىڭ پاريج وليمپياداسىندا ەنشىلەگەن جۇلدەلەرى قۇتتى بولسىن! ءدۇبىرلى دوداعا اتتانار كەزدە ۇلتتىق قۇراماعا قانداي مىندەت جۇكتەلدى ءارى سول مىندەت قانشالىقتى ورىندالدى؟

– كوپ راحمەت. الدىمەن قازاق ەلىن پاريج وليمپياداسىندا ۇلتتىق قۇرامامىز ولجالاعان جۇلدەلەرمەن قۇتتىقتايمىن. سەنا بويىندا وتكەن اۋقىمدى سپورتتىق ءىس-شارادا ەنشىمىزگە التىن دا, كۇمىس تە, قولا دا بۇيىردى. بۇل – تۇتاس ەلگە ورتاق قۋانىش, مەرەيلى مار­تەبە دەپ بىلەمىن. سپورت – ەلدى ۇيىستىراتىن, بەرەكە-بىرلىككە شاقىراتىن ەرەكشە سالا. فرانتسيادا بۇعان تاعى ءبىر مارتە كوزىمىز جەتتى. قىز-جىگىتتەرىمىز وتانىنان جىراقتا جۇرسە دە, جانكۇيەر قاۋىمنىڭ قولداۋىن سەزىنىپ, قۋات الدى, رۋحتاندى. بارشا سپورتشىلار مەن جاتتىقتىرۋشىلاردىڭ, جالپى سپورت قوعامداستىعىنىڭ اتىنان قازاق حالقىنا ايرىقشا العىسىمدى بىلدىرەمىن.

مەملەكەت باسشىسىنىڭ وليمپياداعا اتتان­عان سپورتشىلارىمىزعا كورسەت­كەن دەمەۋى ولارعا ەرەكشە دەم بەرىپ, العا جەتەلەدى. ەل پرەزيدەنتى وليم­پياداشىلارعا ۇلكەن سەنىم ارتتى, جۇلدە العان قىز-جىگىتتەردى ارنايى قۇتتىقتاپ, وزگە اتلەتتەردى دە قانات­تاندىرىپ وتىردى.

وزدەرىڭىز بىلەتىندەي, پاريج وليم­پياداسىنا 25 سپورت تۇرىنەن 92 ليتسەنزيا جەڭىپ الدىق. بارلىعى 78 سپورتشى ەل نامىسىن قورعادى. 25 سپورت ءتۇرىنىڭ بەسەۋىنەن جۇلدە بۇيىردى. ۇلتتىق قۇراما 1 التىن, 3 كۇمىس جانە 3 قولا مەدال ولجالادى. جالپىكوماندالىق ەسەپتە 43-ورىنعا تۇراقتادىق. بۇعان دەيىنگى وليمپيادادا يەلەنگەن ورىندى 40 ساتىعا جاقسارتتىق. جۇلدە العان جاھان ەلدەرىنىڭ بەل ورتاسىنا جايعاستىق.

توكيو وليمپياداسىمەن سالىستىر­عاندا ناتيجەمىز جاقسى. ىلگەرىلەۋ بار. قالاي دەسەك تە, بۇل – فاكت. ءتورت جىل بۇرىنعى وليمپيا ويىندارىندا التىن مەن كۇمىس مۇلدە بۇيىرماعان ەدى. وسى جولى سول ءبىر ولقىلىقتىڭ ورنى تولعانداي بولدى. سول سەبەپتى ۇلتتىق قۇرامانىڭ قازىرگى ناتيجەسىن تىم ءتاۋىر دەپ تە, قۇلدىراۋ دەپ تە ايتپايمىن, ورتا دەڭگەيدەگى جاقسى كورسەتكىش دەپ سانايمىن. ءيا, دزيۋدو, گيمناستيكا, گرەك-ريم كۇرەسى, نىسانا كوزدەۋ سەكىلدى جانكۇيەر قاۋىم جۇلدە دامەتە قويماعان سپورت تۇرلەرىنەن مەدال بۇيىردى. بۇل – وتاندىق سپورتتىڭ بولاشاعى بار ەكەنىن كورسەتەتىن ماڭىزدى فاكتور. ءدال قازىر سپورتتىق گيمناستيكا مەن گرەك-ريم كۇرەسىنەن ەنشىلەگەن قوس كۇمىستىڭ سالماعى التىننان دا ارتىق بولىپ تۇر.

– جانكۇيەر قاۋىم بوكسشىلارعا ۇلكەن سەنىم ارتتى. بىراق ەكى بىلعارى قولعاپ شەبەرى عانا جۇلدەگە ىلىكتى. وتاندىق بوكسقا ۇلكەن رەفورما كەرەك دەپ ويلامايسىز با؟

– مويىنداۋ كەرەك, پاريجدە بوكسشىلارىمىز ءساتسىز ونەر كورسەتتى. ولار وسىمەن ەكى وليمپيادادان التىن مەدالسىز ورالىپ وتىر. بۇل ەل بوكسىندا ۇلكەن پروبلەما بار ەكەنىن كورسەتەدى. ءارى مۇنداي قۇلدىراۋ كەشە نەمەسە بۇگىن باستالعان جوق. بۇل – ونداعان جىل بويى جالعاسىپ كەلە جاتقان دۇنيە. ءوزىڭىز ايتقانداي, بوكسقا ۇلكەن رەفورما كەرەك جانە ونى تاپ قازىر باستاۋ ماڭىزدى. جانكۇيەرلەردىڭ دە جانايقايىن سەزىپ, ءتۇسىنىپ وتىرمىز. ويتكەنى وتانداستارىمىز ءۇشىن بوكس ءبىرىنشى ءنومىرلى سپورت سانالادى.

پاريج وليمپياداسىندا بوكسشى­لاردىڭ جەكپە-جەگىن كوردىم. شىنىن ايتۋ كەرەك, سپورتشىلاردىڭ فيزيكالىق دايىندىعىنا كوڭىلىم تولمادى. العاشقى ەكى راۋندتا بەلسەندى بولعانىمەن, ءۇشىنشى كەزەڭدە تىم سىلبىر جۇدىرىقتاس­تى. بۇل تاكتيكالىق دايىندىق­تىڭ, پسيحو­لوگيالىق ازىرلىكتىڭ السىزدىگىن كورسەتەدى.

تورەشىلەر تاراپىنان دا قىسىم جاسالعانداي بولدى. 63,5 كيلودا شارشى الاڭعا شىققان مۇحامەدسابىر بازارباي ۇلى مەن 92 كيلوعا دەيىنگى سالماقتا ونەر كورسەتكەن ايبەك ورالباي جەكپە-جەكتە جەڭىلدى دەگەنگە سەنۋ قيىن. تورەشىلەر ەكى وتانداسىمىزدىڭ جەڭىسىن «ۇرلاپ العانداي» كورىندى. سول سەبەپتى قازاقستاننىڭ ۇلتتىق وليمپيادا كومي­تەتى تورەشىلەردىڭ ۇستىنەن شاعىم ءتۇسىردى. ارينە, جەكپە-جەكتىڭ ناتيجەسىنە ەش­قان­داي اسەرى بولماسا دا, مۇنداي قادام­­نىڭ جاسالعانى ورىندى دەپ سانايمىز.

وسى جولعى وليمپيادا بوكسقا دەگەن «تاۋەلدىلىكتەن» قۇتىلۋ كەرەك ەكەنىن كورسەتتى. ايتپەسە, ءبىز وليمپيا ويىندارىنا بوكسشىلار مەن اۋىر اتلەتتەردىڭ ونەرىمەن عانا باعا بەرۋگە ۇيرەنىپ الدىق. قازىر بوكستىڭ وليمپياداداعى تاعدىرى دا قىل ۇستىندە تۇر. بوكس توڭىرەگىندە ۇنەمى داۋ-داماي ورىن الادى. پاريجدەن كەيىن قازاقستان بوكس فەدەراتسياسى ترانسفورماتسيا جولىنا تۇسكەنىن جۇرتشىلىق كورىپ-ءبىلىپ وتىر. وزگەرىستەر بولىپ جاتىر. فەدەراتسيا باسشىلىعى جاۋاپكەرشىلىكتى ءوز موينىنا الىپ, كەمشىلىكتەرمەن جۇمىس ىستەۋگە كىرىستى. ۇلتتىق وليمپيادا كوميتەتىن باسقارىپ وتىرعان داڭقتى بوكس­شى گەننادي گولوۆكين دە جۇمىستى جاھاندىق دەڭگەيدە جۇيەلەپ, رەتتەۋگە, ۇيلەستىرۋگە ىقپال ەتە الادى. ەگەر كەلەسى وليمپيادالىق تسيكل­دە باعدارلامادان سىزىلىپ قالماسا, ەلىمىزدىڭ بوكستاعى ناتيجەنى جاقسارتۋعا تولىق مۇمكىندىگى بولادى.

– تەننيسشىلەرىمىزدىڭ دە جولىنا ۇمىتپەن قاراعان ەدىك. بىراق قۇرامانىڭ ەكى بىردەي كوشباسشىسى ءدال وليمپيادانىڭ الدىندا جارىس جولىنا شىقپاي قالدى. قالعاندارى العاشقى اينالىمنان ءارى اسپادى. جانكۇيەرلەردىڭ دەنى «ولار مۇنى قاساقانا ىستەدى» دەپ سانايدى. ءسىزدىڭ پىكىرىڭىز قانداي؟

– ولار مۇنداي قادامعا قاساقانا باردى دەگەنگە سەنبەيمىن. ەلەنا رىباكينا دەنساۋلىعىنا بايلانىستى جارىسقا كەلە المادى. يۋليا پۋتينتسەۆا جاراقاتىنا بايلانىستى كورتقا شىقپادى. سپورت بولعان سوڭ, مۇنداي جاعداي بولىپ تۇرادى. وعان تۇسىنىستىكپەن قاراۋ كەرەك. ارينە, پاريج وليمپياداسىنىڭ الدىندا تەننيسشىلەرىمىزدەن جۇلدە كۇتتىك. ولار فرانتسيادا دا قازاق ەلىن قۋانتادى دەپ سەندىك. وكىنىشكە قاراي, ولاي بولمادى.

– پاريج وليمپياداسىندا جەرگى­لىكتى سپورتشىلار تۇعىردان كورىندى. ال قازاقستان ازاماتتىعىن العان شەتەل­دىكتەر سەنىمدى اقتامادى. لەگيو­نەر­لەرگە يەك ارتقان قانشالىقتى دۇرىس؟

– بىرىنشىدەن, سپورتشىلاردىڭ باسقا ءبىر ەلدىڭ ازاماتتىعىن الىپ, بولاشاق ءومىرىن سول مەملەكەتپەن بايلانىستىرىپ, سول ەلدىڭ تۋىنىڭ استىندا ونەر كورسەتۋى – الەمدە قالىپتاسقان تاجىريبە. ال قازاقستان – سول الەمنىڭ ءبىر بولشەگى. سوندىقتان مۇنداي تاجىريبەنىڭ ءبىزدىڭ ەلدە دە قولدانىلۋى – قالىپتى دۇنيە. ەكىنشىدەن, ازاماتتىق العان شەتەلدىك سپورتشىلاردى ءاردايىم سىن ساداعىنا الا بەرۋدىڭ قاجەتى جوق دەپ ويلايمىن. مەن ولاردى اقتاپ العىم كەلىپ وتىرعان جوق. بۇل سپورتتىق قاعيدا تۇرعىسىنان دۇرىس ەمەس. ماسەلەن, ۇلتتىق قۇراماعا ىلىنە الماعان وتانداستارىمىز دا وزگە مەملەكەتتەردىڭ اتىنان سىنعا ءتۇسىپ ءجۇر. شەتەلدەردە جۇمىس ىستەپ جاتقان جاتتىقتىرۋشىلارىمىز دا از ەمەس. بۇل – ولاردىڭ تاڭداۋى جانە وعان قۇرمەتپەن قاراۋىمىز كەرەك. مىسالى, كەشە عانا پاريج وليمپياداسىندا تۋنيس قۇرا­ماسى قازاق مامانى ەسبول سۇلتانوۆتىڭ كومەگىمەن ءوز تاريحىندا تۇڭعىش رەت ءبىر التىن, ءبىر قولا جۇلدە يەلەندى. ءبىز وتانداسىمىزدىڭ ءدال وسىنداي جەتىستىككە سەبەپكەر بولعانىنا قۋانىشتىمىز.

ءيا, ءتۇرلى سەبەپپەن قاتارىمىزدى تولىقتىرىپ جاتاتىن شەتەلدىك سپورتشىلار الەمدىك ارەنالاردا قازاقستاننىڭ تۋىن كوكتە جەلبىرەتە بەرسە ەكەن دەيمىز. بىراق سپورتتا باق پەن بابىڭ قاتار شاپپاسا, تاعى قيىن. شىنىن ايتايىن, پاريجدە باق سىناعان, ءوزىڭىز ايتقانداي, لەگيونەرلەردىڭ ونەرىنە كوڭىلىم تولعان جوق. جەڭىل اتلەتتەر دەيزي دجەپكەمەي مەن نورا دجەرۋتو جۇلدەنىڭ اۋلىنا ماڭايلاي المادى. ەركىن كۇرەس شەبەرى يۋسۋپ باتىرمۋرزاەۆ العاشقى بەلدەسۋىندە-اق جەڭىلدى. تەننيسشىلەر ءبىرىنشى اينالىمنان ارىگە اسپادى. ترياتلونشى ەكاتەرينا شابالينا جارىستى اياقتاي الماي, ورتا جولدا توقتادى. دەمەك فەدەراتسيالار ۇلتتىق قۇرامانى جاساقتاردا تىڭعىلىقتى جۇمىس جۇرگىزۋى كەرەك.

بايقاعان بولساڭىزدار, ءبىز لەگيونەر­لەردى جاپپاي تارتۋ تاجىريبەسىنەن الىس­تاي باستادىق. جەرگىلىكتى سپورتشىلارعا زور سەنىم ارتىلىپ وتىر. بۇل وليمپيا­دالىق سپورت تۇرلەرى بويىنشا ەلىمىزدە مىقتى مەكتەپتەر قالىپتاسا باستاعانىن كورسەتەدى.

– جانكۇيەرلەر التىن جانە جالپى جۇلدە سانى بويىنشا قازاقستان قۇراماسىنىڭ ىرگەمىزدەگى وزبەكستاننان قالىپ قويعانىن سىنعا الىپ جاتىر. بۇعان نە دەيسىز؟

– كەز كەلگەن وتانشىل قازاق سەكىلدى مەنىڭ دە باۋىرلاس ەلدەرگە, كورشىلەس مەملەكەتتەرگە ءبىر بۇيرەگىم بۇرىپ تۇرادى. ولاردىڭ جەتىستىگىنە قۋانىپ, جەڭىلىسىنە كۇيىنەمىز. بوكسشىلارىمىز رينگتە, بالۋاندارىمىز بوزكىلەمدە عانا ءبىر-بىرىنە قارسىلاس. ال ودان تىس جەردە ءبىر-بىرىمەن دوس, سىيلاس, باۋىر. پاريجدە كوپشىلىك وسىعان تاعى ءبىر مارتە كۋا بولدى عوي دەپ ويلايمىن. سەبەبى وليمپيادا جەكپە-جەكتەرىن تاماشالاۋعا كەلگەن وزبەك جانكۇيەرلەرى تۋىستىق تۋىن كوتەرىپ, ءبىزدىڭ سپورتشىلارعا دا قولداۋ كورسەتىپ جاتتى. قىرعىز جانكۇيەرلەرىنىڭ قازاق بالۋاندارىن قالاي قولداعانىن كوزىمىز كوردى. ءبىزدىڭ جانكۇيەرلەر دە باۋىرلاس ەلدەردىڭ سپورتشىلارىنا دەم بەرىپ وتىردى. ءبىز فرانتسياعا وزبەكستان قۇراماسىمەن جارىسۋ ءۇشىن بارعان جوقپىز. جارىسقىمىز كەلسە, ءوز-وزىمىزبەن جارىسايىق. بۇعان دەيىنگى ناتيجەلەردى جاقسارتايىق. جەتىس­تىك پەن كەمشىلىكتى دە وسىعان قاراپ باعا­لاعان ورىندى. ايتپەسە الەۋمەتتىك جەلى­گە قاراساق, پاريجگە قازاقستان مەن وزبەك­ستاننان باسقا ەشبىر مەملەكەت بارماعان سەكىلدى. مىسالى, شۆەيتساريا (48-ورىن), ارگەنتينا (52-ورىن), تۇركيا (64-ورىن), ءۇندىستان (71-ورىن) سەكىلدى ەكونوميكاسى مىقتى, حال­قى كوپ الپاۋىت مەملەكەتتەر جالپىكوماندالىق ەسەپتە بىزدەن كەيىن ورنالاسقان. سونى نەگە ايتپايمىز؟ سولارمەن نەگە سالىستىرمايمىز؟

– دەگەنمەن وزبەكستاننىڭ بوكستان ءبىر ەمەس, بەس التىن مەدال يەلەنۋىنىڭ سىرى نەدە دەپ ويلايسىز؟

– ەستەرىڭىزدە بولسا, 2012 جىلعى لوندون وليمپياداسىندا ءبىزدىڭ قۇراما 3 التىن, 1 كۇمىس جانە 6 قولا جۇلدە ولجالاپ, جالپى ەسەپتە 25-ورىننان كورىندى. ال وزبەكستان ءۇش مەدالمەن 48-ورىنعا تۇراقتادى. اتالعان دودادان كەيىن كورشى مەملەكەت ۇلكەن سپورتتا كەشەندى شارالار قابىلدادى. وزبەك سپورتشىلارىن جەتىستىككە جەتكىزگەن سول شارالاردىڭ بىرقاتارىن اتاپ وتەيىن.

بىرىنشىدەن, ريو وليمپياداسىنان كەيىن وڭتۇستىكتەگى كورشىمىز قۇرامانى دا­يىنداۋ ءۇشىن شەتەلدىك جاتتىقتىرۋشىلار مەن كونسۋلتانتتاردى شاقىرا باستادى. ءبىز بۇل تاجىريبەنى بيىل عانا قولعا الدىق. ءيا, بۇرىن دا بىرەن-ساران شەتەلدىك مامان كەلىپ جۇمىس ىستەگەن. بىراق ول جۇيەلى, جوس­پارلى جۇمىس بولعان جوق.

ەكىنشىدەن, وزبەكستان لوندون وليمپياداسىنان كەيىن عىلىمي توپ قۇردى. بۇل دەگەنىمىز – ۇلتتىق قۇرامانىڭ دايىندىعىنا يننوۆاتسيالىق شەشىمدەردى, عىلىمي-ادىستەمەلىك تەحنولوگيالاردى پايدالانۋ, مەديتسينالىق جۇمىستى جەتىلدىرۋ. ءبىز بۇل جۇمىستى پاريج وليم­پياداسىنىڭ الدىندا عانا باستادىق. وزبەكستاندا سپورت بويىنشا بىرنەشە ۋنيۆەرسيتەت پەن عىلىمي ينستيتۋتتار بار. دزيۋدو اكادەمياسى قۇرىلدى. باحودير جالولوۆتىڭ بوكس مەكتەبى جۇمىس ىستەيدى. ءارى بۇلاردىڭ بارلىعى وزبەكستاننىڭ سپورت مينيسترلىگىنە قارايدى.

ۇشىنشىدەن, قازاقستان سپورتتىڭ 180 ءتۇرىن دامىتىپ وتىر. ونىڭ 59-ى – وليمپيادالىق سپورت ءتۇرى. ال وزبەكستان 17 وليمپيادالىق سپورت تۇرىنە عانا باسىمدىق بەرەدى. قالعانى باسەكەلەستىك ورتادا داميدى. بۇل – الەمدىك تاجىريبە. ءبىز دە وسىعان كەلە جاتىرمىز. زاڭعا ءتيىستى وزگەرىستەر مەن تۇزەتۋلەر ەنگىزىلۋ ۇستىندە.

تورتىنشىدەن, حالىقارالىق فەدەرا­تسيا­لارعا وكىلدىك ەتۋ, حالىقارالىق سپورت­تىق بىرلەستىكتەرگە مەملەكەت وكىلدەرىن قوستىرۋ جۇمىسىن دا وزبەكستان ەرتە باس­تادى. ولاردىڭ بىرقاتار جەتەكشى مامانى بۇگىندە ءتۇرلى حالىقارالىق فەدەراتسيا مەن قاۋىمداستىققا مۇشە بولىپ وتىر. بىزدەگى بۇل باعىتتاعى جۇمىس باسەڭدەۋ. شامامىز كەلگەنشە ءوز ادامدارىمىزدى حالىقارالىق ۇيىمداردىڭ قاتارىنا قوسۋعا ءتيىسپىز. بۇل دا ماڭىزدى فاكتور سانالادى.

– پاريج وليمپياداسىنان نە ءتۇيدىڭىز؟ وتاندىق سپورتتا الدا قانداي وزگەرىستەر بولۋى مۇمكىن؟

– بوكس پەن تەننيس تۋرالى ويىمدى جوعارىدا ايتتىم. دزيۋدوشىلارعا ءدان ريزامىز. ەلدوس سمەتوۆ پاريجگە اتتاناردا ەل سەنىمىن اقتايمىن دەپ ۋادە بەردى. سول سوزىندە تۇردى. عۇسمان قىرعىزباەۆ تا فرانتسياعا تەكتەن-تەك كەلمەگەنىن دالەلدەدى. مەرگەندەرىمىز الەكساندرا لە مەن يسلام ساتپاەۆ تا ءۇمىتتى اقتادى. گيمناست ناريمان قۇربانوۆتىڭ كۇمىسى كۇللى ەلگە قۋانىش سىيلادى. بوكسشىلار نۇربەك ورالباي مەن نازىم قىزايبايعا العىستان باسقا ايتارىمىز جوق. گرەك-ريم كۇرەسىنىڭ وكىلى دەمەۋ جادىراەۆ جانكۇيەرلەردىڭ قۋانىشىن ەسەلەدى.

اشىعىن ايتايىقشى, پاريج وليم­پياداسىندا وتە جوعارى ناتيجەگە قول جەتكىزەمىز دەگەن ءۇمىت ازداۋ بولدى. ويتكەنى 2023 جىلدىڭ قازان ايىندا قىتايدىڭ حانچجوۋ قالاسىندا ازيادا ۇيىمداستىرىلدى. وندا ءبىزدىڭ قۇراما جاقسى ونەر كورسەتە المادى. پاريجگە بارعان سپورتشىلاردىڭ باسىم بولىگى – ءدال وسى ازيادادا باق سىناعاندار. ولاردىڭ دايىندىق دەڭگەيى حانچجوۋداعى دودادا بەلگىلى بولعان. ال 7-8 ايدىڭ ىشىندە جاعدايدى دۇرىستاي قويۋ وتە قيىن ەدى. سوندىقتان شىعار اقش-تىڭ Sports Illustrated دەگەن سايتى قازاقستان قۇراماسى پاريجدەن التىنسىز ورالادى دەپ بولجام جاسادى. بولجام جاساۋشىلاردىڭ دەنى ءبىزدىڭ قۇرامانىڭ شىنايى جاعدايىن بۇكپەسىز باعالاپ, اسا ءبىر جوعارى ناتيجە الارىنا سەنبەدى. سوعان قاراماستان ءبىز التىندى دا, كۇمىس پەن قولانى دا ولجالادىق.

الداعى كۇندەرى وليمپيادا قورىتىن­دىسى بويىنشا القا وتىرىسىن وتكىزەمىز. ءار فەدەراتسيامەن جەكە-جەكە كەزدەسۋلەر ۇيىمداستىرىلادى. ناقتى شەشىمدەر قابىلدانادى. سپورتقا دەگەن كوزقاراستى وزگەرتۋ ماڭىزدى. ايتالىق, مەدالدار كوپ ۇلەستىرىلەتىن ءجۇزۋ مەن جەڭىل اتلەتيكانى جاڭاشا دامىتۋ قاجەت. قازىر بالا­لاردىڭ اتالعان ەكى سپورت تۇرىنە دەگەن قىزىعۋشىلىعى جوعارى. سونى دۇ­رىس ارناعا باعىتتاي تۇسكەنىمىز ابزال. پاريجدە ۇستەل تەننيسىنەن كيريلل گەرا­سي­مەنكو, قۇزعا ورمەلەۋشى ءامىر ماي­مۇراتوۆ, برەيكينگتەن ءامىر زاكىروۆ مۇم­كىن­دىكتەرىنىڭ وتە جوعارى ەكەنىن باي­قاتتى. سوندىقتان وليمپيادالىق سپورت تۇر­لەرىن بارىنشا ءارتاراپتاندىرۋ كەرەك. كۇرەس پەن بوكسقا يەك ارتىپ وتىرا بەرە­تىن ۋاقىت الدەقاشان ءوتتى. باسقا سپورت تۇرلەرىنە دە باسىمدىق بەرىلۋى قاجەت. ماسەلەن, پاريجدە حالىقارالىق باسكەتبول فەدەراتسياسىنىڭ (FIBA) باس حاتشىسى اندرەاس زاگكليسپەن كەزدەستىم. ونىمەن ەلىمىزدە 3ح3 فورماتىنداعى باسكەتبولدى دامىتۋ تۋرالى وي بولىستىك. مەنىڭشە, ءبىزدىڭ ەلگە ءالى دەندەپ ەنە قويماعان ءدال وسىنداي سپورت تۇرلەرىن دە بايقاپ كورگەن دۇرىس سەكىلدى.

پاريج وليمپياداسى حالىقارالىق ۇيىم­دارمەن بايلانىس ورناتۋ تۇرعىسى­نان ءتيىمدى بولدى. «بىرىككەن كۇرەس الەمى» حالىقارالىق فەدەراتسياسىنىڭ پرەزي­دەنتى نەناد لالوۆيچپەن, حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەرمەن, بۇكىلالەمدىك تاەكۆوندو فەدەراتسياسىنىڭ پرەزيدەنتى چو چجونۆونمەن جانە باسقا دا لاۋازىم­دى تۇلعالارمەن كەزدەسىپ, پىكىر الماس­تىق. بىرلەسە جۇمىس ىستەۋ جولدارىن پىسىقتادىق.

قازىر وتاندىق سپورتتا ۇلكەن وزگەرىس ورىن الىپ جاتىر. بۇل وزگەرىس بىلتىرعى ازيادادان كەيىن باستالعان. اتاپ ايتقان­دا, بۇل – بيۋدجەت قاراجاتىن ءتيىمدى پايدالانۋ, سىبايلاس جەمقورلىق تاۋەكەلدەرىن بارىنشا تومەندەتۋ, سپورت فەدەراتسيالارىنا رەفورما جۇرگىزۋ. قولعا الىنعان جۇمىستار الداعى ۋاقىتتا ءوز جەمىسىن بەرەدى دەپ سەنەمىن.

تاعى ءبىر ايتارىم, سپورت – ءبىرىنشى كەزەكتە سايىس. سوندىقتان سپورتشىلارىمىزعا جەڭىستە دە, جەڭىلىستە دە دەمەۋ بولايىق. وليمپيادادا ەنشىلەگەن ءاربىر مەدال – جاس جەتكىنشەكتەر ءۇشىن جاڭا باعدار, جاڭا ستيمۋل. سونىڭ يگىلىگى ۇزىلمەيتىن كۇنگە جەتەيىك.

– اڭگىمەڭىزگە راحمەت.

اڭگىمەلەسكەن –

ورىنبەك وتەمۇرات,

«Egemen Qazaqstan»