مەسسەنجەرلەردە ينفەكتسيالىق اۋرۋحانالار Covid-19 جۇقتىرعان پاتسيەنتتەرگە تولىپ كەتكەنى جايلى حابار تارادى. كوميتەتتىڭ مالىمەتىنشە, بۇل اقپارات شىندىققا جاناسپايدى.
2024 جىلدىڭ باسىنان بەرى ەلدە 1 356 ادام كوروناۆيرۋسقا شالدىققان. وتكەن جىلدىڭ سايكەس كەزەڭىمەن سالىستىرعاندا سىرقاتتانۋ 8 ەسە تومەن.
«بۇگىنگى تاڭدا 6285 ينفەكتسيالىق توسەك-ورىننىڭ 0,1 پايىزىندا عانا Covid-19 جۇقتىرعان ناۋقاستار جاتىر. ءولىم-ءجىتىم تىركەلگەن جوق. كوروناۆيرۋس ينفەكتسياسى بويىنشا ەپيدەميولوگيالىق جاعداي باقىلاۋدا», - دەلىنگەن حابارلامادا.
ۆەدومستو جالعان اقپارات تاراتقانداردىڭ ارەكەتىنە قۇقىقتىق باعا بەرۋ ءۇشىن ماتەريال قۇقىق قورعاۋ ورگاندارىنا جىبەرىلگەنىن ايتادى.
«بارلىق ازاماتتاردى رەسمي اقپارات كوزدەرىندەگى سەنىمدى اقپاراتقا سەنۋگە شاقىرامىز» دەيدى كوميتەتتەن.
