كەدەرگى جاسايتىن ەمەس, قولداۋ كورسەتەتىن كەز

ەلىمىزدە ىشكى تۋريزم سالاسى­نىڭ ءالى دە جولعا قويىلماي كەلە جاتقانى از ايتىلىپ جۇرگەن جوق. سونىڭ اسەرى مە ەكەن, كىم ءبىلسىن, ينفراقۇرىلىمدىق جوبالار قولعا الىنا باستاعانى كوڭىل قۋانتادى. الايدا, جاڭا باستامالارعا ەكولوگيانى العا تارتىپ, قارسىلىق كورسەتەتىندەر دە جوق ەمەس. اسىرەسە, ول «كوك-جايلاۋ» كۋرورتىن سالۋعا قاتىس­تى ماسەلەدە انىق كورىندى. قايبىر كۇنى «كوك-جايلاۋ» كۋرورتىنا قاتىستى وتكەن  جي­نا­لىسقا 200-گە تارتا ادام قاتىسسا, سونىڭ ءبىرازى ءوز­دەرىنىڭ كەلىسپەيتىندىكتەرىن ءبىل­دىر­گەن. ارينە, باستى سەبەپ ەكو­لوگيالىق ماسەلەلەرگە كەلىپ تىرەلەدى. ەلى­مىزدە بىردەن-ءبىر ارزان ەلەكتر قۋاتىن الۋعا بولاتىن اتوم ەلەكتر ستانساسىن سالۋعا قاتىستى ماسە­لەنى تالقىلاعاندا دا وسىنداي قارسىلىقتار ورىن العان بولاتىن. مۇندا دا ماسەلە ەكولوگياعا اپارىپ تىرەل­گەن-ءتىن. مۇنىڭ بارلىعى ەل حالقىنىڭ يگىلىگى ءۇشىن جاسالىپ جاتقاندىعىن ەسكەرسەك, ماسەلەنى تەك ەكولوگيامەن عانا بايلانىستىرىپ قويۋىمىز ورىنسىز, ارينە. ماسەلەن, وڭتۇستىك كورەيا تارابى مەملەكەت قارجىسىنا تاۋ شاڭعىسى بازاسىن سالىپ, ارتىنان ونى جەكەگە بەرۋگە بولاتىنىن مالىمدەگەن-ءتىن. مۇنىڭ ەل حالقى ءۇشىن دە پايدالى جاعى كوپ ەكەنىنە كۇمان جوق. سول سياقتى ەلىمىزدە دەمالىس ورىندارىن كوپتەپ سالىپ, ولاردى باسقارۋدى جەكەگە وتكىزىپ جاتساق, نۇر ۇستىنە نۇر ەمەس پە؟! ولاي بولسا, نەگە ءبىز كۋرورت سالامىز دەگەندەردىڭ الدىن كەس-كەستەۋىمىز كەرەك؟.. سول «كوك-جايلاۋ» كۋرورتىنا ەنى 7 مەتر, ال ۇزىندىعى 6023 مەتردى قۇرايتىن جول سالىنارىن ەسكەرسەك, بۇل دەمالۋشىلار ءۇشىن وتە ىڭعايلى بولاتىنى انىق ەدى عوي. جولدارىنىڭ ساپاسى جونىنەن قازاقستان الەمدە 117-ورىندا ەكەنىن ەسكەرسەك, ارينە, بىزگە زامان تالابىنا جاۋاپ بەرەتىندەي جولدار اۋاداي قاجەت. بىلتىر تاراتىلعان مالىمەتتەرگە قاراعاندا, تۋريزم سالاسىندا جىل سايىن قازاقستاننان وزگە ەلدەردىڭ ەكونوميكاسىنا 400 ميلليون دوللار كەتىپ جاتىر. ال جالپى تۋريزم ۇلەسى الەمدىك ءىجو-ءنىڭ 9,4 پايىزىن قۇراسا, 2012 جىلى وسى سالادان تۇسكەن پايدا 1,075 ميلليارد دوللارعا جەتىپتى. وكىنىشتىسى سول, ەلىمىزدە ءتۋريزمنىڭ ىشكى جالپى ونىمدەگى ۇلەسى 0,3 پايىز عانا بولسا, مەملەكەت قولداۋىمەن ونى 2020 جىلى ءىجو-ءنىڭ 3 پايىزىنا جەتكىزۋ كوزدەلىپ وتىر. نەگىزىنەن, قازاقستان ءۇشىن تۋريستەر تمد ەلدەرىنەن, قىتايدان, تاياۋ شىعىس پەن ءۇندىستاننان كەلەدى دەگەن ءۇمىت باسىم. سونداي-اق, قازاقستان ءوز تاراپىنان ينۆەستيتسيا سالعان ەلدەر ازاماتتارىنا ۆيزالىق جانە ميگراتسيالىق رەجىمدى جەڭىلدەتۋگە كۇش سالعانى ءجون-اق. ساراپشىلار ەكسپو-2017 كورمەسىنە 2 ميلليونعا تارتا ادامنىڭ كەلەتىنىن ايتسا, سونىڭ 300 مىڭىن شەتەلدىكتەر قۇرايدى دەگەن بولجام جاساپ وتىر. قورىتا ايتقاندا, ەلىمىز ءۇشىن ىشكى ءتۋريزمدى دامىتۋ ماڭىزدى مىندەتتەردىڭ بىرىنە اينالۋى ءتيىس. ازاماتتارىمىزدىڭ سالاماتتى ءومىر سالتىن ۇستانۋدا ءتۋريزمنىڭ اتقارار مىندەتى وراسان ەكەنىن ەسكەرسەك, وندا قولدان كەدەرگى جاساۋدى توقتاتاتىن كەز جەتكەنى انىق. اسقار تۇراپباي ۇلى, «ەگەمەن قازاقستان».