قازاقستاندىق وقۋشىلاردىڭ اتا-انالارى چاتتار مەن الەۋمەتتىك جەلىلەردە تاراعان حابارعا الاڭداپ وتىر. 15 قىركۇيەكتەن باستاپ ەلىمىزدە ماسكا تاعۋ رەجيمى ەنگىزىلىپ, وقۋشىلار قاشىقتان وقۋعا جىبەرىلەدى ەكەن. بۇل – جالعان, دەپ مالىمدەدى Stopfake.kz.
سانيتارلىق-ەپيدەميولوگيالىق باقىلاۋ كوميتەتى بۇل اقپاراتقا قاتىستى پىكىر ءبىلدىردى.
«مەسسەندجەرلەردەگى 15 قىركۇيەكتەن باستاپ بالالار قاشىقتان وقۋعا جىبەرىلەدى جانە مەكەمەلەردە ماسكامەن ءجۇرۋ رەجيمى ەنگىزىلەدى دەگەن مالىمەت شىندىققا جاناسپايدى. جىل سايىن ەپيدەميالوگيالىق ماۋسىم كەزەڭىندە پروفيلاكتيكالىق جانە ەپيدەمياعا قارسى ءىس-شارالاردى وتكىزۋدى كوزدەيتىن باس مەملەكەتتىك سانيتاريالىق دارىگەرىنىڭ قاۋلىسى بەكىتىلەدى. قاۋلىعا سايكەس, بيىلعى جىلدىڭ 15 قىركۇيەگىندە تۇماۋعا قارسى ۆاكتسيناتسيا جۇرگىزۋ باستالادى. ماسكا تاعۋ رەجيمى تەك مەديتسينالىق ۇيىمداردىڭ قىزمەتكەرلەرى ءۇشىن ەنگىزىلەدى. قاۋلىمەن تولىعىراق سانيتاريالىق-ەپيدەميولوگيالىق باقىلاۋ كوميتەتىنىڭ سايتىندا تانىسۋعا بولادى. بارلىق ازاماتتى رەسمي اقپارات كوزدەرىندەگى سەنىمدى ماعلۇماتقا عانا سەنۋگە شاقىرامىز», – دەيدى سانيتارلىق-ەپيدەميولوگيالىق باقىلاۋ كوميتەتى.
