سۋرەتتى تۇسىرگەن – ەرلان ومار, «EQ»
الەۋمەتتىك باعدارلاماعا قاتىسىپ, جاقسى تابىس تابۋ ءۇشىن الەۋەتىن ارتتىرۋعا كەلگەندەردىڭ ءبىرى – ايمان ساعىندىقوۆا. جوبا اياسىندا استانالىق تۇرعىن ارنايى ماماننان ۇلتتىق كيىمدەردى تىگۋدىڭ ءادىس-تاسىلدەرىن مەڭگەردى.
– قازاقتىڭ ۇلتتىق كيىمى دەگەندە كوز الدىمىزعا ويۋلى شاپان, زەرلى قامزول, ساپتاما ەتىك كيگەن, ءسانى مەن سىمباتى جاراسقان كىسىنىڭ ءتۇر-سيپاتى ويعا كەلەدى. بۇل ۇيىرمە جۇمىسىندا ءبىز قولونەر تۇرلەرىمەن اينالىسۋ ماقساتىندا شاپان جانە كويلەك تىگۋدىڭ تەحنولوگياسىن ۇيرەندىك. ارينە, ۇلتتىق كيىمدى دايىنداۋ بارىسى بىرنەشە كەزەڭنەن وتەدى. مۇندا جەكە تالعامعا كوبىرەك زەيىن قويىلادى. شەبەرلىك ساعات بارىسىندا ويۋ-ورنەكتى قولمەن كەستەلەۋ جانە كومپيۋتەرمەن ءتۇسىرۋدى كورسەتتى, دەيدى ول.
ينديرا جاداەۆا دا «Joltap» جوباسىنىڭ تۇلەگى. ىسمەر وقىتۋشىنىڭ مۇقيات باقىلاۋىمەن ۇلگىنى قۇراستىرۋ, ماتاعا اۋىستىرۋ, ءپىشۋ جانە تىگۋ سياقتى بىرەگەي بۇيىمدى جاساۋدىڭ قىر-سىرىن ۇيرەندى.
– وقىعانىما وتە ريزامىن. مەن كوپتەگەن جاڭا داعدىلارعا يە بولدىم جانە يننوۆاتسيالار تۋرالى ءبىلدىم, دەدى قاتىسۋشى.
جالپى, جوبانى ىسكە اسىرۋدا كەشەندى جوسپار بىلتىر بەكىتىلگەن. باستامانىڭ ماقساتتى اۋديتورياسى – جۇمىسسىزدار جانە ەڭبەك نارىعىندا باعدارلانباعان NEET ساناتىنداعى جاستار, تاجىريبەسى مەن بىلىكتىلىگى جوق ازاماتتار. سونداي-اق كىرىسىن ارتتىرۋعا مۇددەلى وتانداستارىمىزعا ارنالعان.
باعدارلاما اياسىندا تەگىن قىسقامەرزىمدى كۋرستارعا «بارشاعا مۇمكىندىك» مودۋلدىك پۋنكتتەرىندە جازىلۋعا بولادى. وقىتۋ 8 جۇمىس داعدىسى: تىگىنشى, سانگەر-كونسترۋكتور, بۋحگالتەرلىك ەسەپ نەگىزدەرى, كورپۋستىق جيھاز جاساۋ نەگىزدەرى, ساتۋشى-كاسسير, ەلەكتر گازبەن دانەكەرلەۋشى, باريستا, اياق كيىمدى جوندەۋ جانە 7 تسيفرلىق داعدىلار: SMM, سايتتاردى ازىرلەۋ, بەينەمونتاج, گرافيكالىق ديزاين, موبيلوگرافيا, ماركەتپلەيستەردەگى ساۋدا, تارگەت بويىنشا وتەدى.
