وبلىس اكىمىنىڭ ورىنباسارى جاسۇلان بيسەمبيەۆتىڭ ايتۋىنشا, 2017 جىلدان بەرى مەكتەپ تۇلەكتەرىنە اكىم گرانتى بەرىلىپ كەلەدى. ءبىلىم گرانتى جەرگىلىكتى بيۋدجەت ەسەبىنەن قارجىلاندىرىلادى.
«قازىر اكىم گرانتىمەن اتىراۋلىق 357 ستۋدەنت ەلىمىزدەگى مەديتسينالىق جوعارى وقۋ ورىندارىندا ءبىلىم الىپ ءجۇر. بيىل العاشقى 25 جاس جوعارى وقۋ ورنىن بىتىرەدى. ولار ءبىلىمىن رەزيدەنتۋرادا جالعاستىرمايتىن بولسا, وڭىرگە ورالادى. گرانت يەلەرىنە قويىلاتىن نەگىزگى تالاپ – وقۋ ورنىن اياقتاعاننان كەيىن وڭىردەگى مەملەكەتتىك مەكەمەلەردە كەمىندە 3 جىل جۇمىس ىستەۋ», دەيدى جاسۇلان بيسەمبيەۆ.
ونىڭ ايتۋىنا قاراعاندا, وبلىس اكىمىنىڭ گرانتىن بەرۋدىڭ وزىندىك ءتارتىبى بار. بىرىنشىدەن, بۇل مەملەكەتتىك ءبىلىم گرانتىن يەلەنە الماعان تالاپكەرلەرگە ارنالعان. ەكىنشىدەن, اكىم گرانتىن الۋ ءۇشىن وتكىزىلەتىن كونكۋرسقا مەكتەپ جانە كوللەدج تۇلەكتەرى قاتىستى. ۇشىنشىدەن, اكىم گرانتى كادر تاپشىلىعىنا بايلانىستى سۇرانىس نەگىزىندە بولىنەدى. باستى تالاپ – مامىر-ماۋسىم ايلارىنداعى ۇلتتىق بىرىڭعاي تەستىلەۋ قورىتىندىسىمەن ەرەجەگە سايكەس قۇجاتتاردى تاپسىرۋ.
وبلىستىق ءبىلىم باسقارماسىنىڭ ءباسپاسوز قىزمەتى ءمالىم ەتكەندەي, اكىم گرانتىمەن وقىعان ستۋدەنتتەر جوعارى وقۋ ورنىن بىتىرگەننەن كەيىن جاۋاپتى مەكەمەنىڭ بەرگەن جولداماسىمەن جۇمىسقا ورنالاسا الادى. ال بيىل ءبىلىم گرانتىن ءبولۋ كەزىندە مەديتسينا, پەداگوگيكا, اۋىل شارۋاشىلىعى, ۆەتەريناريا, ورمان رەسۋرستارى جانە ورمان شارۋاشىلىعى, ءدىنتانۋ, تۋريزم باعىتىنداعى ماماندىقتارعا باسىمدىق بەرىلىپ وتىر.
ماسەلەن, پەداگوگيكا, بەينەلەۋ ونەرى, كوركەم ەڭبەك, مۋزىكالىق ءبىلىم, ۆەتەريناريا, دەنە شىنىقتىرۋ, سپورت, تۋريزم جانە سەرۆيستىك قىزمەت ماماندىعىنىڭ گرانتىن يەلەنگەندەرگە ح.دوسمۇحامەدوۆ اتىنداعى اتىراۋ ۋنيۆەرسيتەتىندە وقۋىنا جول اشىلدى. اكىم گرانتىنىڭ باسىم بولىگى ادام جانىنا اراشاشى بولاتىن مەديتسينا سالاسىنىڭ ماماندارىن دايارلاۋعا ءبولىندى. ەندى اتىراۋلىق 84 تۇلەك استانا, الماتى, قاراعاندى, اقتوبە قالالارىنداعى مەديتسينا ۋنيۆەرسيتەتىندە جالپى مەديتسينا ماماندىعىمەن جوعارى ءبىلىم الادى. ال ءدىنتانۋ, تەولوگيا ماماندىعى ءۇشىن بەرىلگەن گرانت يەلەرى نۇر-مۇباراك ەگيپەت يسلام مادەنيەتى ۋنيۆەرسيتەتىنىڭ ستۋدەنتى اتاندى.
اتىراۋ وبلىسى
