اتاپ ايتساق, 20 تامىزدا دۋشانبە قالاسىنىڭ «ۆاتان» كينوتەاترىندا قازاق كينو كۇندەرىنىڭ اشىلۋى رەجيسسەر ر.ابدىراشەۆتىڭ قازاق حاندارىنىڭ ەرلىگى مەن ەلدىگىن باياندايتىن «الماس قىلىش» تاريحي تۋىندىسىمەن باستاۋ الدى.
ال كەلەسى كۇنى ت.سوبيروۆ اتىنداعى كينوتەاتر ساحناسىندا ر.سۇلەيمەنوۆتىڭ كەڭەس كەزىندەگى سىندارلى ساياسات پەن اۋمالى-توكپەلى 1992 جىلعى وقيعانى سۋرەتتەيتىن «نابات وپەراتسياسى» ۇسىنىلدى. سونداي-اق 70-80 جىلدارداعى حالىقتىڭ سۇيىكتى ۆوكالدىق-اسپاپتىق انسامبلدەردىڭ ءبىرى تۋرالى سىر شەرتەتىن ا.ساحاماننىڭ «دوس-مۇقاسان» ءفيلمى دە كورسەتىلدى.
ايتا كەتەيىك, مادەنيەت كۇندەرىنىڭ اياسىندا تاجىكستان استاناسىنىڭ قاق ورتاسىندا, فيرداۋسي ساياباعىندا ابايدىڭ ءبيۋستى اشىلدى. قازاق ويشىلىنىڭ ءمۇسىنى – ەكى ەلدىڭ تامىرى تەرەڭ تاريحي-مادەني بايلانىسىنىڭ نىشانى ەكەنى ءسوزسىز.
قازاقستاننىڭ تاجىكستانداعى مادەنيەت كۇندەرى «كوحي بورباد» مەملەكەتتىك كەشەنى ساحناسىندا وتكەن قازاق-تاجىك ونەرپازدارىنىڭ گالا-كونتسەرتىمەن قورىتىندىلاندى. بۇل كەشتە حالىق ارتىستەرى ايگۇل ۇلكەنباەۆا, ديماش قۇدايبەرگەن, قازاقستاننىڭ ەڭبەك سىڭىرگەن قايراتكەرى ءمادينا سادۋاقاسوۆا, حالىقارالىق كونكۋرستاردىڭ لاۋرەاتتارى پارۆيز نازاروۆ, تەمىرلان بەيسەمباي, نازىم ساعىنتاي جانە «استانا بالەت» تەاترى مەن «Hassak» توبى ونەر كورسەتتى. حالىق اندەرى مەن كۇيلەرى, ابايدىڭ شىعارمالارى ورىندالدى. تاجىكستاننىڭ ونەر جۇلدىزدارى دا ۇلتتىق مادەنيەتىن كورسەتىپ, حالىق شىعارمالارىن ناقىشىنا كەلتىرە شىرقادى. ەكى ەلدىڭ كۇيشىلەرى دومبىرا مەن دۋتاردا كۇي-تارتىس جاساپ, كورەرمەننىڭ رۋحىن ءبىر كوتەرىپ تاستادى.
مەرەكەلىك كەش «استانا سازى» قازاق مەملەكەتتىك فولكلورلىق ءانسامبلىنىڭ سۇيەمەلدەۋىمەن ءوتتى. بۇدان بولەك, «كوحي بورباد» فويەسىندە قازاقستان رەسپۋبليكاسىنىڭ ۇلتتىق مۋزەيىنىڭ قورىنان «قازاق حالقىنىڭ قولدانبالى-ساندىك ونەرى» اتتى كورمە ۇسىنىلدى. كورمەنىڭ نەگىزىن XVIII-XX عاسىرلارداعى قولدانبالى ونەردىڭ بىرەگەي زاتتارى قۇرايدى. وندا كيىز بۇيىمدار, زەرگەرلىك بۇيىمدار مەن اتابزەلدەرى, مۋزىكالىق اسپاپتار قويىلعان.
ارعى-بەرگى تاريحىمەن تامىرلاساتىن كورشىلەس ەلدەردىڭ مادەني-رۋحاني جاقىندىعى ارقاشان جاڭعىرا بەرەتىنى انىق. قوس ەلدىڭ ىرگەسىن, ادەبيەتى مەن مادەنيەتىن, ءتىلى مەن ءدىلىن, ۇلتتىق ونەرىن جالعار مىعىم رۋحاني بايلانىستار الداعى ۋاقىتتا دا جاندانا بەرمەك.
