گابريەل توماس
سپورت پاديشاسى – جەڭىل اتلەتيكا
جەڭىل اتلەتيكانى «سپورت پاديشاسى» دەپ بەكەر اتاماعانى انىق. سپورتتىڭ بۇل تۇرىندە باقانداي 48 جۇلدە جيىنتىعى ساراپقا سالىنادى. وسى جايتتىڭ ءوزى قاي مەملەكەتتىڭ اتلەتتەرى مىقتى بولسا, جالپىكوماندالىق ەسەپتە سولاردىڭ كوش باستايتىنىن اڭعارتسا كەرەك. ءيا, پاريجدە ءدال سولاي بولدى. ايگىلى «ستاد دە فرانس» ستاديونىندا ۇيىمداستىرىلعان الاماندا اقش قۇراماسى ايقىن باسىمدىقپەن جەڭىسكە جەتتى. ولار 34 (14 التىن+11 كۇمىس+9 قولا) جۇلدەگە قول جەتكىزدى. ەڭ كوپ التىندى گابريەل توماس ولجالادى. 27 جاستاعى اتلانتانىڭ ارۋى 200 مەترگە جۇگىرۋدە, 4ح100 بەن 4ح400 مەترلىك ەستافەتادا شاشاسىنا شاڭ جۇقتىرمادى. راي بەندجامين مەن سيدني ماكلافلين-لەۆرون ەكى رەتتەن توپ جاردى. مىنە, امەريكالىقتاردىڭ جەڭىپ العان 14 التىنىنىڭ تەڭ جارتىسى وسى ءۇش جەلاياقتىڭ ەنشىسىندە.
كەنيانىڭ «قارا مارجاندارى» 11 رەت (4+2+5) جەڭىس تۇعىرىنا كوتەرىلدى. بۇل جۇلدەلەردىڭ بارلىعى دا جەلمەن جارىسقان جەلاياقتاردىڭ ەنشىسىندە. 24 جاستاعى بەاتريس چەبەت 5 000 جانە 10 000 مەترلىك قاشىقتىقتا دارا شىقتى. قالعان ەكى التىندى ەممانۋەل ۆانوني (800 مەتر) مەن فەيت كيپەگون (1 500 مەتر) قورجىنعا سالدى. سونداي-اق كاناداعا – 5 (3+1+1), نيدەرلاندقا – 6 (2+1+3), يسپانياعا – 4 (2+1+1), نورۆەگياعا 3 (2+1+0) جۇلدە بۇيىردى. سوڭعى ءتورت كومانداعا قاراعاندا ۇلىبريتانيانىڭ تۋى بيىكتە ءجيى جەلبىرەگەن ەدى. ولار 10 (1+4+5) مەدالعا يەلىك ەتتى. الايدا التىننىڭ ازدىعىنان تۇماندى البيون ەلىنىڭ ورەندەرى جالپى ەسەپتە جەتىنشى ورىندى قاناعات تۇتتى.
امەريكالىق رايان كراۋزەر بالعا لاقتىرۋدان قاتارىنان ءۇشىنشى وليمپياداسىندا قارسىلاس شاق كەلتىرمەدى. نيدەرلاندىق فەمكە بول پاريجدە تولىق مەدالدار جيىنتىعىن جيىپ الدى (4ح1 400 ارالاس ەستافەتا – التىن), (4ح1 400 ەستافەتا – كۇمىس, 200 مەترگە جۇگىرۋ – قولا). سىرىقپەن سەكىرۋشى گرەكيالىق ارمان ديۋپلانتيس (6,25 مەتر) پەن 400 مەترگە كەدەرگىلەر ارقىلى جۇگىرگەن امەريكالىق سيندي ماكلافلين-لەۆرون الەمدىك رەكوردتى (50,37 سەكۋند) جاڭارتتى. جيۋلەن الفرەد (100 مەتر) سەنت-ليۋسياعا, لەتسيلە تەبوگو (200 مەتر) بوتسۆاناعا تورتجىلدىقتىڭ باستى دوداسىنىڭ العاشقى التىنىن سىيلادى.
كەزىندە پاكىستاننىڭ كوگالداعى حوككەيشىلەرى اتالعان جارىستىڭ جەڭىمپازى اتانعانى كوزىقاراقتى وقىرماننىڭ ەسىندە بولار. ال جەكەلەگەن سپورتشىلار اراسىنان تۇڭعىش وليمپيادا چەمپيونى اتانۋ باقىتى نايزا لاقتىرۋشى ارشاد ناديمگە بۇيىردى. 4ح400 مەترلىك ەستافەتادا اقش قۇراماسى مارە سىزىعىن ءبىرىنشى بولىپ قيىپ ءوتتى. جەڭىمپاز كوماندانىڭ ساپىندا 16 جاستاعى كۋينسي ۋيلسون ونەر كورسەتتى. ونىڭ ەسىمى وليمپيادا چەمپيونى اتانعان ەڭ جاس جەڭىل اتلەت رەتىندە سپورت شەجىرەسىنە جازىلدى.
اتالعان جارىستا 43 مەملەكەتتىڭ وكىلدەرى ولجاعا كەنەلدى. وكىنىشكە قاراي, پاريجدە تاراتىلعان 145 مەدالدىڭ بىردە-بىرەۋى قازاقستان سپورتشىلارىنا بۇيىرمادى. كەزىندە جەڭىل اتلەتتەر جارىسىندا ولگا شيشيگينا التىن, دميتري كارپوۆ قولا جانە ولگا رىپاكوۆا تولىق جۇلدە جيىنتىعىن جەڭىپ الىپ, بارشا جانكۇيەردى قۋانتقان ەدى. قازىر جەرلەستەرىمىز نە جۇگىرە, نە سەكىرە, نە تەمىر-تەرسەكتى الىسقا لاقتىرا المايتىنداي دارەجەگە جەتتى. وكىنىشتى-اق!
جۇزۋدە دە اقش الدىنا جان سالمادى
جۇزۋدە 37 مەدال جيىنتىعى ساراپقا سالىنادى. بۇل جارىستا دا اقش-تىڭ اسىعى الشىسىنان ءتۇستى. ولار 28 (8+13+7) جۇلدە ولجالادى. ءتۇرلى ءتاسىل ارقىلى ءتۇرلى قاشىقتىققا جۇزگەن كالەب درەسسەل, كەتل لەدەكي, تورري حاسك, كەيت دۋگلاسس, رەيگان سميت جانە گرەتچەن ۋولش ەكى رەتتەن ءوز ەلدەرىنىڭ ءانۇرانىن شىرقاتتى. جالپى ەسەپتە ەكىنشى ورىندى ەنشىلەگەن اۋستراليانىڭ قورجىنىندا 19 (7+9+3) جۇلدە بار. فرانتسيا (4+1+2), كانادا (3+2+3) جانە ماجارستان (3+1+1) توپ-5 كوماندا قاتارىنا قوسىلدى. اۋستراليانىڭ ارۋى موللي گرەيس و’كاللاگان مەن كانادالىق ساممەر ماكينتوشتىڭ ءۇش مارتە مەرەيى ۇستەم بولسا, قىتايلىق پان چجانلە, ۇلىبريتانيالىق دجەيمس گاي, شۆەتسيالىق سارا فرەدريكا شيوستريوم, اۋستراليالىق اريارن تيتمۋس پەن كەيلي ماككيوۋننىڭ ەكى رەت جۇلدىزى جاندى.
پاريج وليمپياداسىنىڭ باستى قاھارمانى رەتىندە فرانتسيالىق لەون مارشاننىڭ ەسىمى اتالدى. وعان ەشكىمنىڭ دە داۋى جوق. 22 جاستاعى تۋلۋزانىڭ تۋماسى 200 مەترگە باتتەرفلياي مەن براسس جانە 200 بەن 400 مەترگە كەشەندى ادىستەرمەن جۇزۋدە جەڭىمپاز اتانسا, 4ح100 مەترلىك ەستافەتالىق سايىستا ءۇشىنشى ورىندى ەنشىلەدى. بارلىعى – 4 التىن مەن 1 قولا. فرانتسيانىڭ باس شاھارىندا وتكەن بايراقتى باسەكەدە مارشاننىڭ الدىنا ەشكىم تۇسە المادى. بۇعان قوسا لەون 200 مەترگە كەشەندى جۇزۋدە تورتكۇل دۇنيەنىڭ تەڭدەسسىزى مايكل فەلپستىڭ رەكوردىن 0,17 سەكۋندقا جاڭارتتى. ال مەدالدار سانى جاعىنان يۋيفەي چجان بارىنەن وزدى. ءتۇرلى قاشىقتىقتا باق سىناعان 26 جاستاعى قىتاي سپورتشىسى 1 كۇمىس پەن 5 قولانى ەنشىلەدى. بارلىعى – 6 جۇلدە.
2016 جىلى برازيليانىڭ ريو-دە-جانەيرو قالاسىندا وتكەن وليمپيا ويىندارىندا دميتري بالاندين 200 مەترگە براسس ادىسىمەن جۇزۋدە ايدى اسپانعا ءبىر-اق شىعارىپ, ەلىمىزگە باس جۇلدە اپەرگەن ەدى. وعان دەيىن سپورتتىڭ بۇل تۇرىندە بىردە-ءبىر وتانداسىمىزدىڭ باعى جانعان جوق ەدى. پاريجدە ءبىز ادىلبەك مۋسينگە سەنىم ارتتىق. بىراق ءبالانديننىڭ ەرلىگىن قايتالاۋعا قانداسىمىزدىڭ شاما-شارقى جەتپەدى.
وزگە سايىستاردا كىمدەر وزدى؟
وليمپيا ويىندارىندا ۆەلوسپورتتان – 22, كۇرەس تۇرلەرىنەن – 18, بايداركا مەن كانوە ەسۋدەن – 16, نىسانا كوزدەۋ مەن دزيۋدودان – 15, سپورتتىق گيمناستيكا مەن اكادەميالىق ەسۋدەن – 14, بوكستان – 13, سەمسەرلەسۋدەن – 12, اۋىر اتلەتيكا مەن جەلكەندى سپورتتان 10 جۇلدە جيىنتىعى ساراپقا سالىندى. وسى سپورت تۇرلەرىندە تابىستى ونەر كورسەتكەن كوماندالاردىڭ جالپى ەسەپتە جوعارىلاۋىنا جاقسى مۇمكىندىك تۋىندايدى. دامىعان مەملەكەتتەر وسىعان ايرىقشا ءمان بەرەدى.
كەزىندە ۆەلوسپورتتا الەكساندر ۆينوكۋروۆتىڭ داڭقى دۇركىرەدى. ول 2000 جىلى سيدنەيدە كۇمىس السا, 2012 جىلى لوندوندا التىن مەدالدى موينىندا جارقىراتتى. ال ونىڭ ءىزباسارى الەكسەي لۋتسەنكو پاريجدە قالىڭ توپتىڭ اراسىندا قالىپ قويدى. وسى ورايدا ەلىمىزدە «استانا» دەپ اتالاتىن كاسىپقوي ۆەلوكلۋبتىڭ بارىن ەستەرىڭىزگە سالايىق. مەملەكەتتىك بيۋدجەتتەن وعان قىرۋار قاراجات جۇمسالىپ كەلەدى. اتالعان كوماندا مۇشەلەرىنىڭ جالاقىسى وزگە سپورت تۇرلەرى وكىلدەرىنىڭ تۇسىنە دە كىرمەگەن. سول كلۋبتىڭ ساپىندا ونەر كورسەتكەن بىرقاتار لەگيونەر ءار جىلدارى «تۋر دە فرانس» پەن «ۆۋەلتا» سەكىلدى مارتەبەسى جوعارى جارىستاردا توپ جاردى. بىراق ودان قازاقستانعا كەلىپ-كەتەرى جوق. وتاندىق ۆەلوسپورتتى دامىتۋ دۇرىس جولعا قويىلسا, وسىنداي بەيشارا كۇيگە تۇسپەيتىن ەدىك. ال وندا بىزگە «استانا» كلۋبىن قارجىلاندىرۋدىڭ نە كەرەگى بار؟ الدە بۇل تەك اقشانى وڭدى-سولدى شاشۋ ما؟ الداعى ۋاقىتتا ەل سپورتىن باسقارىپ وتىرعان ازاماتتار وسى ماسەلەگە نازار اۋدارسا ەكەن.
ۆەلوسپورتتا فرانتسيا (3+3+3), نيدەرلاند (3+3+1), اۋستراليا (3+2+3), اقش (3+2+1), ۇلىبريتانيا (2+5+4), جاڭا زەلانديا (2+2+1) جانە بەلگيا (2+0+3) قۇرامالارى جاقسى ناتيجە كورسەتتى. جەكەلەگەن ۆەلوشاباندوزدار اراسىندا 27 جاستاعى جاسىل قۇرلىق جۇيرىگى حارري لاۆرەيسەننىڭ شوقتىعى بيىك بولدى. ول ءۇش التىن ولجالادى. بەلگيالىق رەمكو ەۆەنەپۋل مەن نيدەرلاندىق روي ۆان دەن بەرگ ەكى رەتتەن دارالاندى.
ەسكەك ەسۋدەن ناتيجەلەرىمىز جىلدان-جىلعا تومەندەپ بارادى. جەلكەندى سپورت ەلىمىزدە جوقتىڭ قاسى دەۋگە بولادى. سەمسەرلەسۋدە اياق الىسىمىز جامان ەمەس. فرانتسيانىڭ باس شاھارىندا جىگىتتەرىمىز بارىن سالىپ ايقاستى. الايدا سونىڭ ءوزى ۇزدىكتەر قاتارىنان كورىنۋگە جەتكىلىكسىز بولدى. سپورتتىق گيمناستيكادا ىلگەرىلەۋ بار. بۇعان دەيىن الەم كۋبوگىنىڭ كەزەڭدىك سايىستارىندا سان مارتە دارالانعان ناريمان قۇربانوۆ پاريجدە جەرلەستەرىنە مەدالدىڭ سىڭعىرىن ەستىرتتى. نىسانا كوزدەۋدەن ءۇزىلىپ قالعان ءداستۇرىمىزدى الەكساندرا لە مەن يسلام ساتباەۆ جالعادى. ولار قولاعا قول سوزدى. قازاقستاندا اكادەميالىق ەسۋ مەن جەلكەندى سپورتتىڭ دامۋ بارىسى تىم باياۋ.
اۋىر اتلەتتەردىڭ قازىرگى جاي-كۇيى جانعا باتادى. 2005–2016 جىلدار ارالىعىندا ەلىمىز الەمدەگى كوشباسشى كوماندالاردىڭ ءبىرى ءارى بىرەگەيى ەدى. رەسپۋبليكالىق فەدەراتسيانىڭ تىزگىنىن قايرات تۇرلىحانوۆ ۇستاپ, كەڭەسشى باپكەر رەتىندە تۇركيادان ەنۆەر تۇركىلەري شاقىرىلعان تۇستا وتاندىق زىلتەمىرشىلەر تولاعاي تابىسقا قول جەتكىزدى. وليمپيا ويىندارى مەن دۇنيەجۇزىلىك دودالاردا تاۋ كوتەرگەن تولاعايلار ءتۇرلى ءتۇستى مەدالداردى «كۇرەپ» الدى. كەيىننەن باسشىلار تۇرلىحانوۆتى ورنىنان الدى. سوعان نالىعان تۇركىلەري ەلىنە كەتتى. ولاردىڭ ەل سپورتىنا سىڭىرگەن تالاي جىلعى ەرەڭ ەڭبەگى ەسكەرىلمەدى. ەسىمدەرى اتالعان ازاماتتارمەن بىرگە قازاق اۋىر اتلەتيكاسىنىڭ باسىنان باعى ۇشتى. سودان كەيىن-اق جۇلقىنىپ تۇرعان جەرلەستەرىمىز بىرىنەن كەيىن ءبىرى دوپينگپەن ۇستالىپ, ءتۇرلى مەرزىمگە سپورتتان شەتتەتىلدى. سونداي كەلەڭسىزدىكتەر سالدارىنان كەزىندە داڭقى توسكە ورلەگەن قازاقستاننىڭ اۋىر اتلەتتەرى پاريج وليمپيداسىنىڭ بىردە-ءبىر جولداماسىنا يەلىك ەتە المادى.
جوعارىدا اتالعان سپورت تۇرلەرىنەن پاريج وليمپياداسىنىڭ توپ-5 كومانداسى: ەسكەك ەسۋدەن – جاڭا زەلانديا (4+0+0), اۋستراليا (3+1+1), گەرمانيا (2+2+2), قىتاي مەن چەحيا (2+0+0). سەنا جاعالاۋىندا ەسكەكشى ليسا كەررينگتون (جاڭا زەلانديا) ءۇش قاشىقتىقتا الدىنا جان سالمادى. ءسويتىپ, ول وليمپياداداعى التىندار سانىن 8-گە جەتكىزدى. دجەكسيكا فوكس (اۋستراليا), ياكوب شوپف (گەرمانيا) جانە اليشا حوسكين (جاڭا زەلانديا) ەكى مارتە سونداي كورسەتكىشكە قول جەتكىزدى.
نىسانا كوزدەۋدەن – قىتاي (5+2+3), وڭتۇستىك كورەيا (3+3+0), اقش (1+3+1), يتاليا (1+2+1), ۇلىبريتانيا (1+1+0). مەرگەندەردىڭ «مايدانىندا» شەن ليحاو (قىتاي) ەكى رەت تەڭدەسسىز دەپ تانىلدى.
سپورتتىق گيمناستيكادان – اقش (3+1+5), جاپونيا (3+0+1), قىتاي (2+5+2), فيليپپين (2+0+0) جانە برازيليا (1+2+1). ادەمىلىك پەن اسەمدىككە نەگىزدەلگەن بەكزادا ونەردە سيمونا بايلز (اقش) جانە دايكي حاسيموتو مەن سيننوسۋكە وكا (جاپونيا) جاسىنداي جارقىلداپ, باس جۇلدەنىڭ ۇشەۋىن ءوز قورجىندارىنا سالدى.
اكادەميالىق ەسۋدەن – نيدەرلاند (4+3+1), رۋمىنيا (2+3+0), ۇلىبريتانيا (2+2+4), جاڭا زەلانديا (2+2+1), يرلانديا, اقش جانە گەرمانيا (1+0+1).
اۋىر اتلەتيكادان – قىتاي (5+0+0), بولگاريا مەن اقش (1+0+1), يندونەزيا, بولگاريا جانە گرۋزيا (1+0+0). اسا اۋىر سالماقتا سىنعا تۇسكەن گرۋزيالىق زىلتەمىرشى لاشا تالاحادزە ءۇش دۇركىن وليمپيادا چەمپيونى اتانىپ, تۇركيالىق نايم سۋلەيمانوگلۋ مەن حاليل مۋتلۋ, گرەكيالىق پيرروس ديماس پەن اكاكيوس كاكياشۆيليس جانە قىتايلىق ليۋي ءسياوتسزيۋننىڭ كورسەتكىشىن قايتالادى. ەگەر بۇل دۇلەي كۇش يەسىنىڭ جاسى ەندى عانا 30-دان اسقانىن ەسكەرسەك, قاپ تاۋى قابىلانى 2028 جىلى لوس-اندجەلەستە جوعارىدا ەسىمى اتالعان ساڭلاقتاردان وزۋى مۇمكىن.
سەمسەرلەسۋدەن – جاپونيا (2+1+2), اقش (2+1+1), وڭتۇستىك كورەيا (2+1+0), گونكونگ (2+0+0) جانە فرانتسيا (1+4+2). نوياندار سايىسىندا لي كيفەر (اقش) مەن و سان ۋك (وڭتۇستىك كورەيا) ەكى جاتتىعۋ بويىنشا جەڭىسكە جەتتى.
بوكسقا دا, كۇرەسكە دە كوڭىلىمىز تولمادى
بوكس پەن كۇرەس – ەلىمىزدە حالىقتىڭ ەرەكشە قۇرمەتى پەن زور سۇيىسپەنشىلىگىنە بولەنگەن سپورت تۇرلەرى. تاۋەلسىزدىك العان كەزدەن بەرى وليمپيادادا ەڭ كوپ ولجاعا كەنەلگەن – بىلعارى قولعاپ شەبەرلەرى. 1996-2021 جىلدار ارالىعىندا جۋان جۇدىرىقتى جىگىتتەرىمىز 22 جۇلدە (7 التىن, 7 كۇمىس, 8 قولا) الدى. وعان قىزداردىڭ تابىسىن قوسىڭىز. ەڭ ۇزدىك بوكسشىعا تيەسىلى باركەر كۋبوگىن ءۇش مارتە توبەمىزگە كوتەردىك. بىراق كەيىنگى ەكى وليمپياداداعى كورسەتكىشىمىز ەش سىن كوتەرمەيدى. توكيودا قوس قولانى قاناعات تۇتساق, پاريجدە ءبىر كۇمىس پەن ءبىر قولا جەڭىپ الدىق. بوكستىڭ دامۋىنا بارىنشا جاعداي جاسالىپ, ميلليونداعان قارجىنىڭ قۇيىلىپ جاتقانىن ەسكەرسەك, جەرگە كىرىپ كەتەتىندەي ماسقارا جاعداي.
سالىستىرمالى تۇردە الساق, وزبەكستان بەس التىن الىپ, كوماندالىق ەسەپتە جەكە-دارا كوش باستادى. وسىدان سەگىز جىل بۇرىن ريو-دە-جانەيرودا دا ولار الدىنا جان سالماعان ەدى. فرانتسياعا قىرعىزستاننان ءبىر عانا بوكسشى بارىپ, سونىڭ ءوزى فينالعا دەيىن جەتتى.
گرەك-ريم كۇرەسىندە يران مەن جاپونيا قۇرامالارى كەرەمەت ناتيجە كورسەتتى. پارسى ەلى پەحلەۆاندارى 2 التىن, 1 كۇمىس جانە 1 قولانى ولجالادى. كۇنشىعىس ەلىنىڭ ورەندەرى باس جۇلدەنىڭ ەكەۋىن ءوز قورجىنىنا سالدى. ءۇشىنشى ورىندا – كۋبا. بوستاندىق ەلىنىڭ بالۋاندارى 1 التىن مەن 2 قولانى ەنشىلەدى. قىرعىزستاننىڭ ءوزى ءۇش قولا الدى. قازاق ەلى «كلاسسيكتەرىنىڭ» ابىرويىن دەمەۋ جادىراەۆ قۇتقارىپ قالدى. 35 جاستاعى ارداگەر بالۋاننىڭ بۇل كۇمىسىن بارشا جانكۇيەر التىنعا بالادى.
ەركىن كۇرەستە جاپونيا قۇراماسى 2 التىن مەن 1 كۇمىس ولجالاپ, جالپىكوماندالىق ەسەپتە كوش باستادى. ەكىنشى جانە ءۇشىنشى ورىندا – گرۋزيا مەن وزبەكستان. قاپ تاۋى قىراندارىنىڭ 1 التىنى مەن 1 كۇمىسى, «الا تاقيالى» اعايىندارىمىز 1 التىنى مەن 1 قولاسى بار. بەسىنشى ساتىعا بولگاريا مەن باحرەيننىڭ بالۋاندارى جايعاستى. بۇل ەلدىڭ بەتكەۇستارلارى ءبىر-ءبىر رەتتەن جەڭىس تۇعىرىنىڭ ەڭ بيىگىنە كوتەرىلدى. ال قازاقتارعا جالقى جۇلدە دە بۇيىرمادى.
ايەلدەر كۇرەسىندەگى التى التىندى جاپونيا مەن اقش ءوزارا ءبولىستى. كۇنشىعىس ەلىنىڭ سۇلۋلارى ءتورت سالماقتا توپ جارسا, ەكى التىندى امەريكالىقتار يەلەندى. ال قازاقستاننىڭ بىردە-ءبىر بۇرىمدىسى پاريجدە بوي كورسەتكەن جوق. سەبەبى ولاردىڭ بارلىعى دا ىرىكتەۋ سىندارىندا ءسۇرىندى. بۇل جاعداي دا جانىمىزعا باتتى.
دزيۋدوشىلار دوداسىندا جاپونيا (3+2+3), فرانتسيا (2+2+6), ازەربايجان (2+0+0), گرۋزيا (1+2+0) جانە برازيليا (1+1+2) بالۋاندارىنىڭ باعى جاندى, قازاقستان دا كوشتەن قالعان جوق. ەلدوس سمەتوۆتىڭ التىنى مەن عۇسمان قىرعىزباەۆتىڭ قولاسى ارقاسىندا جەتىنشى ورىندى يەلەندىك. وسى جارىستا بويى 204 سم, سالماعى 150 كگ تارتاتىن تەددي رينەر وليمپيادانىڭ بەسىنشى التىنىن موينىندا جارقىراتتى. ونىڭ ۇشەۋىن «قونجىق» جەكەلەگەن سايىستا جەڭىپ السا, ەكەۋىن كوماندالىق باسەكەدە ەنشىلەدى. ودان بولەك, رينەردىڭ تاعى ەكى قولاسى بار.
تاعى كىمدەر وزدى؟
قالعان سپورت تۇرلەرىنە كەلەر بولساق, قىتاي سۋعا سەكىرۋ (8+2+1), ۇستەل تەننيسى (5+1+0), بادمينتون (2+3+0), سينحروندى ءجۇزۋ (2+0+0) جانە تەننيستەن (1+1+0) وتكەن جارىستاردىڭ جالپى كوماندالىق ەسەبىندە الدىنا جان سالمادى. وڭتۇستىك كورەيا ساداق اتۋ (5+1+1) مەن تاەكۆوندودا (2+0+1), ۇلىبريتانيا ءۇشسايىس (1+0+2) پەن باتۋتتا سەكىرۋدە (1+0+0), سەربيا مەن يسپانيا ۆاتەرپولدا (1+0+0), فرانتسيا مەن يسپانيا ۆولەيبولدا (1+0+0), برازيليا مەن شۆەتسيا جاعاجاي ۆولەيبولىندا (1+0+0), دانيا (1+0+1) مەن نورۆەگيا گاندبولدا (1+0+0), اقش پەن جاڭا زەلانديا گولفتا (1+0+0), قىتاي مەن گەرمانيا كوركەم گيمناستيكادا (1+0+0), فرانتسيا مەن جاڭا زەلانديا رەگبيدە (1+0+0), مىسىر مەن ماجارستان قازىرگى بەسسايىستا (1+0+0), يسپانيا مەن اقش فۋتبولدا (1+0+0), كانادا مەن جاپونيا برەيك-دانستا (1+0+0), گەرمانيا ات سپورتىندا (4+1+0), جاپونيا سكەيتبوردينگتە (2+2+0), اقش باسكەتبولدا (2+0+0), نيدەرلاند كوگالداعى حوككەيدە (2+0+0), پولشا قۇزعا ورمەلەۋدە (1+0+1) جانە فرانتسيا سەرفينگتە (1+0+1) ەڭ ۇزدىك ناتيجە كورسەتتى.
