فوتو: ونەركاسىپ قۇرىلىس مينيسترلىگى
تەمىر اۋدانىنىڭ اكىمى سالامات امانباەۆتىڭ ايتۋىنشا, سۋ تاسقىنى كەزىندە شۇبارقۇدىق, قۇمساي, شيتۇبەك جانە ەڭبەكشى اۋىلدارىندا 98 ءۇي سۋ استىندا قالعان. كوميسسيانىڭ قورىتىندىسى بويىنشا 41 ءۇي قالپىنا كەلتىرۋگە جاتادى دەپ ەسەپتەلگەن. بۇل ۇيلەردى جوندەۋگە بيۋدجەتتەن 224,3 ميلليون تەڭگە بولىنگەن. قالعان 57 ءۇي اپاتتىق جاعدايدا دەپ تانىلعان.
ايتا كەتەيىك, باسپاناسىنان ايىرىلعان 36 تۇرعىن ءۇي ءۇشىن بولات وتەمۇراتوۆ قورى, «قامقور – اقتوبە» جانە «Dar charity» قارجىسى ەسەبىنەن دايىن ۇيلەر ساتىپ الىنعان. بۇل ماقساتقا 635 ميلليون تەڭگەدەن استام قارجى جۇمسالعان. قۇمساي اۋىلىندا بۇدان باسقا 21 وتباسى ءۇشىن جاڭا ۇيلەر سالىنىپ, مەردىگەرلەر بۇل جۇمىستى تامىزدىڭ سوڭىنا دەيىن بىتىرۋگە ۋادە بەرىپ وتىر. قازىرگى ۋاقىتتا ۇيلەر ينجەنەرلىك جەلىلەرگە, سۋ, گاز جانە ەلەكتر قىزمەتتەرىن قوسۋ جۇمىستارى ءجۇرىپ جاتىر.
سونىمەن قاتار تەمىر اۋدانىندا 63 وتباسى ماتەريالدىق شىعىندار ءۇشىن 26 ميلليون تەڭگەدەن استام وتەماقى العان. سونداي-اق اۋداندا قىزىلجار ورتا مەكتەبى عيماراتىن قالپىنا كەلتىرۋ, تاسقوپا سەلوسىنا كىرەبەرىس سۋ وتكىزۋ قۇبىرى, جامبىل اۋىلى ماڭىنداعى تەمىر وزەنى ۇستىنە سالىنعان كوپىر جوندەۋ جۇمىستارى قارقىندى ءجۇرىپ جاتىر. وعان قوسا, 2 قورعانىس بوگەت قۇرىلىسى باستالعانى بەلگىلى بولدى.
قر وقم احۋالدىق ورتالىعىنىڭ مالىمەتىنشە, اقتوبە وبلىسىندا سالىنىپ جاتقان 500 جەكە تۇرعىن ءۇيدىڭ 166-سىندا قۇرىلىس جۇمىستارى اياقتالىپ, پايدالانۋعا بەرىلگەن. سونىمەن قاتار زارداپ شەككەن وتباسىلارعا ەكىنشى نارىقتان 495 ءۇي ساتىپ الىنىپ, 3047 ۇيدە جوندەۋ جۇمىستارى اياقتالعان.
