فوتو: history.kz
«تاجىكستان مەن قازاقستان مادەني-گۋمانيتارلىق بايلانىستاردى كەڭەيتۋگە ەرەكشە ءمان بەرەدى. ۇلى گۋمانيستتىڭ ءبيۋستى حالىقتاردى جاقىنداستىرۋعا تاعى ءبىر قادام بولماق. اباي شىعارماشىلىعىنىڭ باس زەرتتەۋشىسى م.اۋەزوۆتىڭ انىقتاماسى بويىنشا شىعىستىڭ كلاسسيكالىق پوەزياسى, ونىڭ ىشىندە تاجىك-پارسى كلاسسيكالىق ادەبيەتى ونىڭ شىعارماشىلىعى مەن 19-20 عاسىر باسىنداعى بۇكىل قازاق ادەبيەتىنىڭ قاينار كوزدەرىنىڭ ءبىرى بولدى», دەيدى تاجىكستان رەسپۋبليكاسىنىڭ مادەنيەت مينيسترلىگى.
بۇدان بۇرىن حابارلانعانداي, 22-23 تامىزدا پرەزيدەنت ەمومالي راحموننىڭ شاقىرۋىمەن قازاقستان پرەزيدەنتى قاسىم-جومارت توقاەۆ تاجىكستان رەسپۋبليكاسىنا مەملەكەتتىك ساپارمەن بارادى.
ەستەرىڭىزگە سالا كەتەيىك, ماسكەۋدە چيستوپرۋدنىي بۋلۆارىندا قازاقستان ەلشىلىگى عيماراتىنان الىس ەمەس جەردە اباي ەسكەرتكىشى ورناتىلعان بولاتىن. ابايدىڭ قولا ەسكەرتكىشى 2006 جىلى اشىلدى. بيىلعى جىل رەسەيدە اباي جىلى بولىپ جاريالاندى. ەسكەرتكىشتىڭ ساۋلەتشىلەرى ۆالەري رومانەنكو مەن تيمۋر سۇلەيمەنوۆ (قازاق ۇلتتىق ۆاليۋتاسى – تەڭگەنىڭ ەسكيزدەرىن جاساۋشى) بولدى. ەسكەرتكىش قولادان قۇيىلىپ, ۇلتتىق ناقىشتارمەن بەزەندىرىلگەن تاس تۇعىرعا وتىرعان اقىننىڭ ءمۇسىنىن بەينەلەيدى جانە «ماڭگىلىك – ولمەس ءسوزدى جاراتۋشى» دەگەن جازۋ بار.
اباي ەسكەرتكىشى 2013 جىلى تاشكەنتتە, سونداي-اق قازاقستان ەلشىلىگىنە قاراما-قارسى جەردە ورناتىلعان. ءمۇسىنشى نۇرلان دالباي, ەسكەرتكىشتىڭ ساۋلەتشىسى راسۋل ساتىبالديەۆ.
2014 جىلى بەيجىڭدە قازاق اقىنىنا ەسكەرتكىش ورناتىلدى. ءمۇسىنشى يۋان سيكۋن بولدى.
سول جىلى ۆەنگريانىڭ بۋداپەشت قالاسىندا اباي قۇنانباەۆقا ەسكەرتكىش اشىلدى. ماجار حالقى ءۇشىن قازاق پەن ماجار حالقىنىڭ تۇركى تامىرىنىڭ جاقىندىعىنا بايلانىستى اباي ەستەلىگى ەرەكشە.
تەگەراندا (2007), باكۋدە (2010), كايردە (2016) جانە فرانتسيانىڭ رەنن قالاسىندا (2016) اباي قۇنانباەۆقا باسقا دا ەسكەرتكىشتەر ورناتىلدى.
بۇكىل الەمدە اباي قۇنانباي ۇلىنىڭ قۇرمەتىنە ارنالعان بيۋستتەر مەن ەسكەرتكىشتەرء الى دە ورناتىلىپ جاتىر. ماسەلەن, ىستانبۇلدا (2021), بەرليندە (2021), پاريجدە (2021) جانە سەۋلدە (2021) اباي الاڭى مەن ەسكەرتكىشى اشىلدى. ال بيىلعى جىلى تبيليسيدە (2022), بىشكەكتە (2022) جانە نيۋ-دەليدە (2022) ەسكەرتكىشتەر ورناتىلدى.
دۇنيەجۇزىلىك ادەبي كەڭىستىك كورنەكتى اقىن-زيالى ابايدىڭ تەرەڭ فيلوسوفيالىق ويلارىمەن, ونىڭ كلاسسيكالىق كوركەم ءماتىنىنىڭ ەستەتيكاسىمەن تولىعۋدى جالعاستىرىپ كەلەدى, ول قاي ۋاقىتتا دا وزەكتى جانە زاماناۋي بولىپ قالا بەرەدى.
