فوتو: اقوردا
مەملەكەت باسشىسى استانا قالاسىنىڭ ەسىل اۋدانىنداعى №103 مەكتەپكە بارىپ, زاماناۋي قۇرىلعىلارمەن جابدىقتالعان وقۋ كابينەتتەرىن ارالاپ كوردى.
پرەزيدەنتكە وقۋ-تاربيە جۇمىستارىنا قولايلى جاعداي جاساۋ جاڭا مەكتەپتەردىڭ باستى ەرەكشەلىگى ەكەنى ايتىلدى. ءبىلىم ورداسىنىڭ اۋماعى مەن عيمارات ىشىندە وقۋشىلاردىڭ قاۋىپسىزدىگى تولىقتاي قامتاماسىز ەتىلگەن. ول ءۇشىن بەينەباقىلاۋ جۇيەسى ورناتىلعان. باستاۋىش جانە جوعارى سىنىپ وقۋشىلارى جەكە-جەكە بلوكتاردا ءبىلىم الادى, ەرەكشە قاجەتتىلىكتەرى بار بالالارعا ءتيىستى جاعداي جاسالعان.
قازىرگى كەزدە مەكتەپتىڭ ىشكى ارلەۋ جۇمىستارى اياقتالىپ قالدى. سونىمەن قاتار جيھازدار مەن قۇرال-جابدىقتار ورناتىلىپ, اباتتاندىرۋ جۇمىستارى جۇرگىزىلىپ جاتىر.
قاسىم-جومارت توقاەۆ استانا قالاسىنىڭ «نۇرا» اۋدانىنداعى №101 مەكتەپتى ارالاپ كوردى. اتالعان ءبىلىم ورداسىندا ەكى اۋىسىمدا 4 مىڭ وقۋشى جاراتىلىستانۋ-ماتەماتيكا جانە قوعامدىق-گۋمانيتارلىق باعىتتار بويىنشا وقيتىن بولادى.
مەملەكەت باسشىسى مەكتەپتىڭ وقۋ جانە شىعارماشىلىق كابينەتتەرىن, سونداي-اق سپورت جانە اكت زالدارىن ارالادى.
پرەزيدەنتكە جاڭا مەكتەپتىڭ مۇمكىندىكتەرى, اتاپ ايتقاندا, وقۋشىلاردىڭ شىعارماشىلىق داعدىلارىن دامىتۋ, تسيفرلىق تەحنولوگيالاردى زەرتتەۋ, جاساندى ينتەللەكتىنى قولدانۋ, «وقۋعا قۇشتار مەكتەپ» جوباسىن جۇزەگە اسىرۋ, وقۋ باعدارلاماسى مەن روبوتتى تەحنيكانى ۇيلەستىرۋ باعىتتارى جايىندا مالىمەت بەرىلدى.
استانا قالاسىنىڭ اكىمى جەڭىس قاسىمبەك ەلوردانىڭ ورتا ءبىلىم بەرۋ سالاسىن دامىتۋ تۋرالى باياندادى. سونداي-اق ول «جايلى مەكتەپ» ۇلتتىق جوباسى اياسىندا قالادا 24 وقۋ وشاعى سالىنىپ جاتقانىن ايتتى.
ال وقۋ-اعارتۋ ءمينيسترى عاني بەيسەمباەۆ جاڭا وقۋ جىلىنا دايىندىق جايىندا ەسەپ بەردى. بۇگىندە رەسپۋبليكا بويىنشا 536 مىڭ وقۋشىعا ارنالعان 302 مەكتەپتىڭ قۇرىلىسى ءجۇرىپ جاتىر. ال 220 مىڭ وقۋشىنى قامتيتىن 280 ءبىلىم بەرۋ مەكەمەسى كۇردەلى جوندەۋدەن وتۋدە. مەملەكەت باسشىسىنىڭ تاپسىرماسىنا سايكەس 1,7 ميلليون بالا تەگىن تاماقپەن قامتىلادى.
