يگى ءىستىڭ باستاماشىسى – اقىن ۇلىقبەك ەسداۋلەتتىڭ ايتۋىنشا, باسىلىمنىڭ ءتۇر-تۇرپاتى وزگەرىپ, حالىقارالىق مارتەبە الىپ, قازاق, تۇرىك, اعىلشىن جانە ورىس تىلدەرىندە جارىق كورىپ وتىر. ياعني «الەم ادەبيەتى» – «Dünya Edebiyatı» – «World literature» – «ميروۆايا ليتەراتۋرا» جۋرنالىنىڭ جاڭالىعى دا, باستى ەرەكشەلىگى دە وسىندا. ناقتىلاپ ايتساق, الەم ادەبيەتىنىڭ ەڭ وزىق ۇلگىلەرى قازاق تىلىنە تارجىمەلەنىپ, ال قازاق ادەبيەتىنىڭ تاڭداۋلى تۋىندىلارى تۇرىك, اعىلشىن جانە ورىس تىلدەرىندە شەتەلدىك وقىرماندارعا ۇسىنىلادى.
ايتا كەتەيىك, ادەبي جۋرنالدىڭ باس ديرەكتورى, رەداكتسيالىق القا توراعاسى – ۇلىقبەك ەسداۋلەت, باس رەداكتورى – ەرجان الاشتۋعان. ءتورت تىلدە جارىق كورگەن جاڭا سانىندا ماقتىمق ۇلى, شارل بودلەر, ولجاس سۇلەيمەنوۆ, حۋستو حورحە پادرون, شاندور پەتەفي, حەمينگۋەي, باسقا دا الەم اۆتورلارىنىڭ شىعارمالارى جاريالاندى.
«بۇل جۋرنالدا بۇگىننەن باستاپ ەكى عالام ۇشىراسىپ-ۇشتاسىپ, ۇلاسىپ-توعىسادى: قازاق ادەبيەتى جانە الەم ادەبيەتى! شالقار تەڭىز بەن ۇلى مۇحيت! بوگدە تىلدەر, بولەك تاريحي داۋىرلەر, وزگە مادەنيەت, وزىنشە ادەبي مەكتەپتەر, مۇلدە ۇقسامايتىن ۇلتتىق ەرەكشەلىك, باسقا دۇنيەتانىم بولعانىمەن, ءبىر-بىرىمەن ۇندەسەتىن پەرنەلەرى دە مول. تەك بىرىنەن بىرىنە كوركەمدىگىن جوعالتپاي, بوياۋىن جۇتاتپاي, دەڭگەيىن تۇسىرمەي, ءمان-ماعىناسىن ساقتاپ, شەبەرلىكپەن اۋدارا ءبىلۋ كەرەك. شىنتۋايتىنا كەلگەندە, قولىڭىزداعى جۋرنال دۇنيە ءجۇزى ادەبيەتتەرىنىڭ اراسىنداعى اسىل ارناعا, بەرىك بايلانىس ارقاۋىنا, ولمەيتىن وتكەلگە, اينىماس التىن كوپىرگە اينالارى انىق. قازاق وقىرمانى دا, الەم وقىرمانى دا ءار ءنومىر سايىن جاڭا ولجاعا كەنەلەتىنى ءسوزسىز», دەيدى ۇلىقبەك ەسداۋلەت.
ايتا كەتەيىك, جۋرنال ءۇش ايدا ەكى رەت (45 كۇندە ءبىر ءنومىر) شىعادى. باسىلىمنىڭ alemadebieti.kz ەلەكتروندى سايتى دا ىسكە قوسىلادى. ادەبيەت ارناسىنا قايتا قوسىلعان باسىلىمنىڭ وقىرمانى كوپ بولسىن دەيمىز.
