قوستاناي. 23 قاڭتار. ل.تولستوي اتىنداعى قوستاناي وبلىستىق امبەباپ كىتاپحانادا قازاق حاندىعىنىڭ 550 جىلدىعىنا ارنالعان «عاسىرلارعا كۋا بولعان مەملەكەت» اتتى كىتاپ كورمەسىنىڭ اشىلۋ سالتاناتى ءوتتى. بۇل تۋرالى egemen.kz ءتىلشىسى حابارلادى.
بيىل ەلىمىز پرەزيدەنت نۇرسۇلتان نازارباەۆتىڭ قولداۋىمەن قازاق حاندىعىنىڭ 550 جىلدىعىن مەرەكەلەيدى. وبلىستىق امبەباپ كىتاپحانا ۇجىمى ۇيىمداستىرعان «عاسىرلارعا كۋا بولعان مەملەكەت» اتتى كىتاپ كورمەسى وسى ايتۋلى مەرەكەگە ارنالدى. ودان وقىرماندار قازاق ەلى تاريحىنان مول ماعلۇمات الا الادى. كىتاپحانا قورىنان الىنعان ەكسپوزيتسيانى تاماشالاۋعا وبلىس وڭىرىندەگى بەلگىلى تاريحشىلار, ستۋدەنتتەر قاۋىمى مەن اۋداندىق, قالالىق كىتاپحانالار ديرەكتورلارى, باق وكىلدەرى شاقىرىلدى.
كورمەگە جالپى سانى 200-دەن اسا كىتاپ قويىلدى. ولار قازاق حاندىعىنىڭ قۇرىلۋى مەن تاۋەلسىز قازاقستاننىڭ بۇگىنگە دەيىنگى تاريحىنان سىر شەرتەدى. كورمەنىڭ اشىلۋىنا قاتىسقاندار ينتەرنەت ارقىلى ەلباسى نۇرسۇلتان نازارباەۆتىڭ رەسپۋبليكالىق جەتەكشى تەلەارنالار جۋرناليستەرىنە بەرگەن سۇحباتىن تىڭداپ, «تاريح تولقىنىندا» كىتابىنىڭ جەلىسىمەن تۇسىرىلگەن 3D فورماتىنداعى «قازاق ەلى» انيماتسيالىق جوباسىن تاماشالادى. قوستاناي مەملەكەتتىك پەداگوگيكالىق ينستيتۋتىنىڭ «قازاقستان تاريحى» كافەدراسىنىڭ اعا وقىتۋشىلارى, تاريح ماگيسترلەرى راۋان بايدالى مەن قۋانىش ابىلمالىكوۆ قازاق حاندىعىنىڭ 550 جىلدىق مەرەيتويىن مەرەكەلەۋدىڭ ءمان-ماڭىزىن تىلگە تيەك ەتتى. قازاق مەملەكەتىنىڭ عاسىرلارعا سوزىلعان ۇزاق تاريحىن بۇگىنگى جاس ۇرپاق ءبىلۋى ءتيىس. مەملەكەتتى قۇرعان, ونىڭ قۇقىقتىق ىرگەسىن قالاعان جانە ۇلى دالامىزدى قورعاعان حاندارىمىز بەن دانالارىمىز, باتىرلارىمىز بۇگىنگى تاۋەلسىز قازاقستاننىڭ رۋحاني دىڭگەگى بولا بەرمەك. جاس ۇرپاقتىڭ پاتريوتتىق تاربيەسىنىڭ دە قاينارى – ۇلتتىق تاريحىمىز. وتكەندى باعالاماي – جارقىن بولاشاق جوق. كورمەنىڭ سالتاناتتى اشىلۋىنا قاتىسقاندار وسىنداي ورتاق ءتۇيىن جاساپ, وبلىستىق كىتاپحانا ۇجىمىنا راحمەت ايتتى.
ءنازيرا جارىمبەتوۆا.
دەرەك, سۋرەت: egemen.kz.
