تاركىلەنگەن ەسىرتكىنىڭ ۇشتەن ەكىسى سينتەتيكا بولىپ وتىر. ناقتىراق ايتقاندا, جىل باسىنان بەرى انىقتالعان 149 ەسىرتكى فاكتىسىنىڭ 97-ءسى سينتەتيكالىق ەسىرتكى ساتۋعا قاتىستى بولسا, 73-ءى وسى ەسىرتكى زاتتارىن ساتۋ فاكتىسى. ماسەلەن, مامىر ايىندا پەتروپاۆل قالاسىندا پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى «BMW» كولىگىنە مىنگەن ءۇش كۇدىكتىنى ۇستادى. كەيىن انىقتالعانىنداي, 23 جاستاعى جۇرگىزۋشى الماتى قالاسىنىڭ تۇرعىنى بولىپ شىقتى. ول پوليتسيا قىزمەتكەرلەرىنىڭ توقتا دەگەن بەلگىسىنە باعىنباي, كولىگىمەن قاشىپ, جاسىرىنۋعا تىرىسقان. سوڭىنان قۋعان كەزدە كولىكتىڭ ىشىندە وتىرعاندار تەرەزەدەن قارا ءتۇستى بارسەتكانى سىرتقا لاقتىرىپ جىبەرگەن. الايدا ءتارتىپ ساقشىلارى تۇيىنشەكتى تاۋىپ العاندا ىشىنەن شامامەن سالماعى 1 كيلو بولاتىن ۇنتاق زات شىققان. ساراپتاما قورىتىندىسىنا سايكەس, بۇل α-PvP دەپ اتالاتىن سينتەتيكالىق ەسىرتكى ەكەنى انىقتالدى.
كۇدىكتىلەردىڭ وزدەرى دە الىسقا ۇزامادى, ولاردىڭ كولىگى «جۇمىسشى» كەنتىنەن شىعا بەرىستەگى اينالما جولدا توقتاتىلدى. سالوندا جۇرگىزۋشىدەن باسقا 35 جاستاعى تاعى ءبىر الماتىلىق جانە استانا قالاسىندا تۇراتىن 24 جاستاعى قىز بولعان. بۇلاردىڭ تۇراعى كوكشەتاۋ قالاسىندا ەكەنى انىقتالعان سوڭ سولتۇستىكقازاقستاندىق جەدەل ۋاكىلدەر ولاردىڭ قالاداعى جالدامالى پاتەرىنەن سينتەتيكالىق ەسىرتكى سالىنعان تۇيىنشەكتەر, ەلەكتروندىق تارازى, بۋىپ-ءتۇيۋ ماتەريالى, 1 كيلو سينتەتيكالىق ەسىرتكى, سونداي-اق 20 گر گاشيش تاركىلەدى.
«تاركىلەنگەن ەسىرتكىنىڭ جالپى سالماعى 1,5 كيلو α-PvP جانە 0,5 كيلو «مەفەدرون» بولعانىن انىقتادىق», دەيدى پد ەسىرتكى قىلمىسىنا قارسى ءىس-قيمىل باسقارماسى باسشىسىنىڭ مىندەتىن اتقارۋشى, پوليتسيا مايورى رۋسلان ۇمبەتوۆ. قازىر كۇدىكتىلەردىڭ ۇستىنەن قىلمىستىق تەرگەۋ جۇرگىزىلىپ جاتىر. ولار 15 جىلعا دەيىن باس بوستاندىعىنان ايىرىلۋى مۇمكىن. ال ۇشتىكتەن تاركىلەنگەن ەسىرتكىنىڭ كولەمى بۇرىن-سوڭدى بولماعان اسا ۇلكەنى بولىپ ەسەپتەلەدى.
ايماقتا ەسىرتكىگە قارسى كۇرەستە ءتۇرلى اكتسيا مەن كونكۋرس, كەزدەسۋلەر وتكىزىلەدى. وسى جىلدىڭ 7 ايىندا ناشاقورلىقتىڭ الدىن الۋ بويىنشا 563 ءىس-شارا ۇيىمداستىرىلىپ, وعان 35 مىڭنان اسا وقۋشى مەن ستۋدەنت, سونداي-اق 6637 اسكەري قىزمەتشى قاتىسقان. بۇل جۇمىستىڭ بارلىعى جاستاردىڭ ەسىرتكىگە قارسى يممۋنيتەتىن قالىپتاستىرۋعا باعىتتالعان. جاسوسپiرiمدەرگە ەسiرتكiنi, اسiرەسە سينتەتيكالىق ەسىرتكىلەردى پايدالانۋدىڭ ورنى تولماس سالدارى تۋرالى ايتىلدى.
«ەسىرتكىنىڭ تارالۋىنا قارسى كۇرەس – پوليتسيا قىزمەتىنىڭ باستى باسىمدىقتارىنىڭ ءبىرى. جەدەل ۋاكىلدەر ەسىرتكىنىڭ زاڭسىز اينالىمىنىڭ جولىن كەسۋگە عانا ەمەس, ەسىرتكى جارناماسىن, تىيىم سالىنعان زاتتاردى ساتاتىن ينتەرنەت دۇكەندەردى, ەسىرتكى كۋرەرلەرىن تارتاتىن رەسۋرستاردى انىقتاۋعا جانە بۇعاتتاۋعا نازار اۋدارادى. قاڭتار ايىنان بەرى وسىنداي 48 رەسۋرس بۇعاتتالدى. ءوڭىرىمىزدىڭ بەلسەندى ازاماتتارى كۇماندى ادامدار تۋرالى اقپاراتتى t.me/sko_narkohelp_bot ەسىرتكى قىلمىسىنا قارسى ءىس-قيمىل باسقارماسىنىڭ Telegram-بوتىنا حابارلايدى. قازىر وبلىس تۇرعىندارىنىڭ پوليتسياعا حابارلاعان ەكى وتكىزۋ فاكتىسى بويىنشا تەكسەرۋ جۇرگىزىلىپ جاتىر», دەيدى رۋسلان ۇمبەتوۆ.
سولتۇستىك قازاقستان وبلىسى
