جوبا اياسىندا زاڭنامانى جەتىلدىرۋ جانە وڭىرلەردى ورنىقتى دامىتۋ جونىندەگى پراكتيكالىق شەشىمدەر مەن ۇسىنىستار توپتاماسى قاراستىرىلدى. ساراپتامالىق زەرتتەۋلەردى تالقىلاۋعا پارلامەنت سەناتىنىڭ توراعاسى ماۋلەن اشىمباەۆ, حالىقارالىق ۇيىمداردىڭ قازاقستانداعى وكىلدىكتەرىنىڭ باسشىلارى جانە زەرتتەۋ ينستيتۋتتارىنىڭ ساراپشىلارى قاتىستى.
ماۋلەن اشىمباەۆ سەناتتىڭ قوعامدىق جوبالىق كەڭسەسى مەن Maqsut Narikbayev University بىرلەسىپ ىسكە اسىرعان اكسەلەراتور بىرەگەي باستاما ەكەنىن جانە ول ەلدىڭ ورنىقتى دامۋىنا قاتىستى جاڭا يدەيالار مەن ناقتى ۇسىنىستار ازىرلەۋدى كوزدەيتىنىن ايتتى. بۇل باعىتتاعى جۇمىستارعا مەملەكەت باسشىسى دا باسا ءمان بەرىپ وتىر.
«پرەزيدەنت قاسىم-جومارت توقاەۆ شىلدەنىڭ اياعىندا قازاقستاننىڭ 2029 جىلعا دەيىنگى ۇلتتىق دامۋ جوسپارىن بەكىتتى. اتالعان قۇجاتتا ايقىندالعان تاسىلدەر نەگىزىنەن ۇلتتىق جانە وڭىرلىك دەڭگەيدە ورنىقتى دامۋ ماقساتتارىنا قول جەتكىزۋدى جەدەلدەتۋگە ارنالعان. بۇل رەتتە اكسەلەراتور ورنىقتى دامۋ ماقساتتارىنا ءتۇرلى باعىتتا قول جەتكىزۋدىڭ ءتيىمدى تەتىگى ەكەنىن اتاپ وتكەن ءجون», دەدى پالاتا سپيكەرى.
كوپشىلىككە تانىستىرىلعان «SDG IMPACT REPORT 2024» جاريا ەسەبى – اكسەلەراتوردىڭ 100 كۇنگە جالعاسقان جۇمىسىنىڭ ناقتى ناتيجەسى. ەسەپتە زاڭنامانى جەتىلدىرۋ بويىنشا ۇسىنىستار جانە اقمولا وبلىسىندا ىسكە اسىرىلعان قاناتقاقتى جوبالار مەن باستامالار جونىندە جوبالىق قۇجاتتاما قامتىلعان. اتاپ ايتقاندا, زەرتتەۋ توپتارى دەنساۋلىق ساقتاۋ, ءبىلىم, ەكونوميكالىق ءوسۋ, قالالاردىڭ تۇراقتى دامۋى جانە تاعى باسقا سالالاردا سىن-قاتەر تۋدىرۋى مۇمكىن جاعدايلاردى تالدادى. جاريالانعان ەسەپ ۇسىنىلعان باستامالاردى ورنىقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيامەن بىرلەسىپ جۇزەگە اسىرۋ بارىسىندا دا ايرىقشا مانگە يە.
سونداي-اق ماۋلەن اشىمباەۆ قوعامدىق ينستيتۋتتارداعى ساراپشىلاردى ورنىقتى دامۋ كۇن ءتارتىبىن ىسكە اسىرۋعا جۇمىلدىرۋ اسا ماڭىزدى ەكەنىن جانە بۇل باستاماعا تالداۋ مەكتەبى مەن ساراپشىلار كلۋبى سياقتى سەنات جانىنداعى جوبالاردىڭ تۇلەكتەرى دە قاتىسقانىن اتاپ ءوتتى.
«الدىمەن ورنىقتى دامۋ ماقساتتارىنىڭ وڭىرلىك دەڭگەيدە ىسكە اسىرىلۋى وتە ماڭىزدى. اكسەلەراتور جۇمىسىنىڭ اياقتالۋىنا قاراماستان, وبلىس اكىمدىگىن جانە كوماندا مۇشەلەرىن جوبالاردىڭ ىسكە اسىرىلۋ تيىمدىلىگىنە جۇيەلى تۇردە مونيتورينگ جۇرگىزىپ تۇرۋعا شاقىرامىن. ءىس-شارانىڭ قورىتىندىسى بويىنشا قاجەت بولعان جاعدايدا ءتيىستى وزگەرىستەر ەنگىزەمىز نەمەسە جاڭا زاڭدار ازىرلەيمىز. مۇنداي جوبا ەلىمىزدىڭ باسقا وڭىرلەرىندە دە كوپتەگەن يدەيا اۋقىمىن كەڭەيتۋگە مۇمكىندىك بەرەدى. سەنات الداعى كەزەڭدە دە سىندارلى باستامالارعا جۇيەلى قولداۋ كورسەتۋگە دايىن», دەپ ماۋلەن اشىمباەۆ جوباعا قاتىسۋشىلارعا, ۆولونتەر-زەرتتەۋشىلەرگە جانە ساراپشىلارعا العىس ءبىلدىردى.
ءىس-شاراعا پرەزيدەنتتىڭ عىلىم جانە يننوۆاتسيا ماسەلەلەرى جونىندەگى كەڭەسشىسى كۇنسۇلۋ زاكاريا, اقمولا وبلىسىنىڭ باسشىلىعى, بۇۇ-نىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري, قازاقستانداعى بۇۇ دامۋ باعدارلاماسىنىڭ تۇراقتى وكىلى كاتارجينا ۆاۆەرنيا, پارلامەنت دەپۋتاتتارى جانە تاعى باسقا ساراپشىلار قاتىستى.
