سۋرەتتەردى تۇسىرگەندەر – ا.دۇيسەنباەۆ, ە.ۇكىباەۆ
ۇلتتىق جوبانىڭ ءبىر وشاعى
قوسشى قالاسىنىڭ جاڭا اۋدانىندا ورنالاسقان مەكتەپ «بولات وتەمۇراتوۆ قورىنىڭ» جەكە ينۆەستيتسياسى ەسەبىنەن سالىنىپ, جەرگىلىكتى ءبىلىم ءبولىمىنىڭ باسقارۋىنا بەرىلگەن.
«جايلى مەكتەپ» ۇلتتىق جوباسىنىڭ ستاندارتتارىنا ساي بوي كوتەرگەن ءبىلىم وشاعىندا قازىرگى كەزدە ەكى اۋىسىممەن 2 700 بالا وقيدى. مەكتەپتە 280 ورىندىق اكت زالى, 360 ورىندىق اسحانا, 2 سپورت زالى, ينفورماتيكا, حيميا, فيزيكا, بيولوگيا, تەحنولوگيا جانە مۋزىكا كابينەتتەرى بار.
مەكتەپ ديرەكتورى ديدار اسقاروۆانىڭ ايتۋىنشا, وقۋشىلار تەك ءبىلىم الىپ قانا قويماي, ء«بىرتۇتاس تاربيە باعدارلاماسى» اياسىندا سپورت سەكتسيالارىنا جانە شاحمات, توعىزقۇمالاق, اسىق اتۋ, بي, حور, فورتەپيانو, دومبىرا سەكىلدى ۇيىرمەلەرگە تەگىن قاتىسا الادى.
مەملەكەت باسشىسى روبوتتەحنيكا, موبيلوگرافيا, اۆتوموبيل جۇرگىزۋدى ۆيرتۋالدى ۇيرەنۋ, شەت ءتىلى كابينەتتەرىن, مەكتەپ كىتاپحاناسىن ارالاپ كورىپ, ۇستازدارمەن جانە وقۋشىلارمەن اڭگىمەلەستى.
– قازاقستاننىڭ وزىق مەملەكەتكە اينالعانىن قالاساق, وسىنداي روبوتتەحنيكا سياقتى باعىتتاردى ۇيرەنۋ كەرەك. بۇل – وتە قاجەت. بالالارىمىز ارقاشان ءبىلىمدى بولسىن, – دەدى قاسىم-جومارت توقاەۆ.
پرەزيدەنت ۇجىمعا ساتتىلىك تىلەپ, مەكتەپكە ءوزىنىڭ «اكە تۋرالى وي-تولعاۋ» كىتابىن جانە قازاقستاندا شىعارىلعان اۆتوبۋستى سىيعا تارتتى.
تۇرعىندار سانى ارتقان
سونىمەن قاتار پرەزيدەنتكە ەلورداعا ىرگەلەس ورنالاسقان قوسشى قالاسىنىڭ ينفراقۇرىلىمدىق دامۋ جوسپارى تانىستىرىلدى.
قوسشى قالاسىنىڭ اكىمى گايدار قاسەنوۆتىڭ ايتۋىنشا, ەلدى مەكەنگە 2021 جىلى وبلىستىق ماڭىزى بار قالا مارتەبەسى بەرىلگەننەن كەيىن تۇرعىندار سانى 110 مىڭ ادامعا جەتكەن.
جالپى, قالانىڭ باس جوسپارى اياسىندا 1,5 ميلليون شارشى مەتر تۇرعىن ءۇي مەن 45 الەۋمەتتىك نىساننىڭ قۇرىلىسى جوسپارلانعان.
كەيىنگى ەكى جىلدا قالادا ءۇش مەكتەپ پايدالانۋعا بەرىلدى. تاعى ءبىر مەكتەپ قۇرىلىسى اياقتالۋعا جاقىن. الداعى ۋاقىتتا «جايلى مەكتەپ» ۇلتتىق جوباسى اياسىندا ءۇش ءبىلىم وشاعىن, سونداي-اق ەكى بالاباقشا سالۋ كوزدەلگەن. دەنساۋلىق ساقتاۋ سالاسىندا ءبىر مەملەكەتتىك ەمحانا, مەملەكەت-جەكەمەنشىك ارىپتەستىك اياسىندا ەكى ەمحانا جۇمىس ىستەيدى.
قالا اكىمى قازىرگى كەزدە جەكەمەنشىك ينۆەستيتسيا ەسەبىنەن جانىندا 1000 كەلۋشىنى قابىلدايتىن ەمحاناسى بار 300 ورىندىق كوپبەيىندى ايماقتىق اۋرۋحانا سالىنىپ جاتقانىن جەتكىزدى. جاڭا اۋرۋحانادا تەراپيا, ونكولوگيا, نەۆرولوگيا جانە پەرزەنتحانا بولىمشەلەرى بولادى. مەديتسينالىق مەكەمە تەك قوسشى حالقىنا ەمەس, جاقىن ماڭداعى اۋدانداردىڭ تۇرعىندارىنا دا قىزمەت كورسەتەدى دەپ جوسپارلانىپ وتىر.
بيىل مامىر ايىندا «Alan» دەنەشىنىقتىرۋ-ساۋىقتىرۋ كەشەنى اشىلدى. كەشەندە بالالارعا جانە ەرەسەكتەرگە ارنالعان باسسەين, جاتتىعۋ جانە سپورت زالدارى بار.
ال قوسشى تۇرعىندارىنىڭ يگىلىگىنە كەلەسى جىلى بەرىلەتىن قوعامدىق مادەني-سپورت ورتالىعىندا ينتەراكتيۆتى ءبىلىم بەرۋ ءبولىمى, سپورت زالى, تەننيس, باسكەتبول, فۋتبول, ۆولەيبول الاڭدارى, كينوتەاتر, كورمە زالى, كىتاپحانا, ءدارىسحانا, امفيتەاتر اشىلادى.
مەملەكەت باسشىسى قوسشى قالاسىندا قۇرىلىس جۇمىستارى قارقىن الا باستاعانىن ەسكەرە وتىرىپ, وبلىس اكىمىنە ەلدى مەكەندەگى ينجەنەرلىك-كوممۋنالدىق ينفراقۇرىلىمدى دامىتۋ جانە گاز قۇبىرىن تارتۋ ماسەلەلەرىنە ايرىقشا ءمان بەرۋدى تاپسىردى.
وتاندىق ونەركاسىپتى دامىتۋ ماڭىزدى
مەملەكەت باسشىسى اقمولا وبلىسىنا جۇمىس ساپارى بارىسىندا قوسشى قالاسىندا بيىل ىسكە قوسىلعان «IL-TOV» جاۋاپكەرشىلىگى شەكتەۋلى سەرىكتەستىگىنىڭ ءوندىرىس الاڭىن ارالاپ كوردى.
كاسىپورىندا قۇس ەتىن تەرەڭ وڭدەپ, تەز دايىنداۋعا بولاتىن ءتۇرلى تاعام شىعارىلادى. شيكىزات وبلىستاعى قۇس فابريكالارىنان جەتكىزىلەدى. جارتىلاي فابريكاتتار ىشكى نارىقتا عانا ساتىلمايدى, سونىمەن قاتار ەۋرازيا ەكونوميكالىق وداعىنا مۇشە ەلدەرگە ەكسپورتتالادى.
«Qazaqstan Investment Corporation» قورى ارقىلى مەملەكەتتىڭ قارجىلاي قولداۋىنا يە بولعان جوبا 85 جەرگىلىكتى تۇرعىندى جۇمىسپەن قامتىپ وتىر.
كاسىپورىن ديرەكتورى ميحايل شەينكمان بۇل وندىرىستىك كەشەننىڭ باستاپقى كەزەڭى ەكەنىن ايتتى. كەلەشەكتە قوسىمشا 10 ميلليارد تەڭگە ينۆەستيتسيا تارتىپ, جىلىنا 10–12 مىڭ توننا ءونىم شىعارۋ ءۇشىن ەكىنشى ءوندىرىس جەلىسىن ىسكە قوسۋ, سونداي-اق مۇزداتىلعان ءبىرىنشى جانە ەكىنشى تاعامدار وندىرەتىن كومبينات سالۋ كوزدەلىپ وتىر.
پرەزيدەنت وتاندىق تاماق ونەركاسىبىن دامىتۋ ماڭىزدى ەكەنىنە توقتالىپ, مۇنداي كاسىپورىندارعا مەملەكەت تاراپىنان جان-جاقتى قولداۋ كورسەتىلەتىنىن اتاپ ءوتتى.
بىرلىگى جاراسقان اۋىل
پرەزيدەنتتىڭ وڭىردەگى جۇمىس ساپارى تسەلينوگراد اۋدانىنداعى «رودينا» اۋىلىندا جالعاستى. مۇندا قاسىم-جومارت توقاەۆ اۋىلداعى مادەنيەت ءۇيىن ارالادى.
جالپى اۋدانى 1563 شارشى مەتردى قۇرايتىن نىساندا حورەگرافيا جانە سپورت زالدارى, دىبىس جازۋ ستۋدياسى مەن ۇيىرمەلەرگە ارنالعان كابينەتتەر بار. مادەنيەت مەكەمەسىنىڭ جانىنان ءتۇرلى شىعارماشىلىق ۇجىم قۇرىلعان. سونىمەن قاتار بىرنەشە سپورت ۇيىرمەسى جۇمىس ىستەيدى. ولارعا 400-دەن استام اۋىل تۇرعىنى قاتىسادى.
پرەزيدەنتكە «رودينا» اگروفيرماسىنىڭ باس ديرەكتورى يۆان ساۋەر سەرىكتەستىكتىڭ اۋىلدا ىسكە اسىرىپ جاتقان الەۋمەتتىك جوبالارىن تانىستىردى. بىلتىر بيزنەستىڭ الەۋمەتتىك جاۋاپكەرشىلىگى اياسىندا كومپانيا رودينا اۋىلىنىڭ يگىلىگىنە 791 ميلليون تەڭگە قارجى بولگەن.
مەملەكەت باسشىسى مادەنيەت ءۇيى ونەرپازدارىنىڭ «دوستىق شۋاعى» كومپوزيتسياسىن تاماشالاپ, اۋىل تۇرعىندارىمەن جۇزدەستى.
– سىزدەرمەن كەزدەسكەنىمە قۋانىشتىمىن. اۋىلعا ارنايى كەلدىم. قۇرمەتتى يۆان اداموۆيچ ساۋەردىڭ شارۋاشىلىعى جايىندا بۇعان دەيىن كوپ ەستىگەن بولاتىنمىن. بىراق مۇندا كەلىپ, اۋىلدىڭ تىنىس-تىرشىلىگىمەن تانىسۋدىڭ رەتى بولماي ءجۇر ەدى. بۇل – وتە ۇلكەن ءارى بارلىق كورسەتكىش بويىنشا ۇزدىك شارۋاشىلىق. بارشاڭىزعا باق-بەرەكە تىلەيمىن, – دەدى قاسىم-جومارت توقاەۆ.
سونىمەن قاتار پرەزيدەنت رودينا اۋىلىنىڭ «ناشا رودينا» سۋپەرماركەتىن, «دوستىق» ساياباعى مەن جالپى ورتا ءبىلىم بەرەتىن مەكتەبىن ارالاپ كوردى.
جۇمىسى جەمىستى اگروفيرما
«رودينا» اگروفيرماسىنىڭ وندىرىستىك نىساندارىمەن تانىسقان مەملەكەت باسشىسى اگروقۇرىلىمنىڭ №1 ساۋىن تسەحى مەن ءسۇت زاۋىتىنا دا باردى. مۇندا «GEA» فيرماسىنىڭ «ەلوچكا» قوندىرعىسى ورناتىلعان. اتالعان قۇرىلعىنىڭ كومەگىمەن ءبىر مەزگىلدە 32 سيىردى قاتار ساۋعا مۇمكىندىك بار.
قاسىم-جومارت توقاەۆقا «رودينا» اگروفيرماسىنىڭ باس ديرەكتورى يۆان ساۋەر سەرىكتەستىكتىڭ ءسۇت باعىتىن دامىتۋ جوسپارى تۋرالى باياندادى. سونىمەن قاتار جاڭا ساۋىن تسەحى سالىنىپ جاتقانىن جەتكىزدى.
بۇدان سوڭ پرەزيدەنت رودينا اۋىلىنداعى ءسۇت زاۋىتىن ارالاپ كوردى. مەملەكەت باسشىسىنا يندۋستريالاندىرۋ باعدارلاماسى اياسىندا ىسكە قوسىلعان نىسانداعى وندىرىستىك پروتسەسس تانىستىرىلدى.
زاماناۋي قوندىرعىلارمەن جابدىقتالعان ءارى وزىق ەۋروپالىق تەحنولوگيامەن جۇمىس ىستەيتىن كاسىپورىن تاۋلىگىنە 50 توننا ءسۇت وندىرەدى. سونىمەن قاتار ءسۇت ونىمدەرىنىڭ بىرنەشە ءتۇرىن شىعارادى. قازىر مۇندا 36 ادام ەڭبەك ەتەدى.
پرەزيدەنت زاۋىت جۇمىسشىلارىمەن اڭگىمەلەسىپ, «رودينا» اگروفيرماسىنىڭ ۇلگىلى شارۋاشىلىق ەكەنىن ايتىپ, جۇيەلى جۇمىستى ودان ءارى جالعاستىرا بەرۋگە شاقىردى.
جالپى, اقمولا وبلىسىندا ءسۇت ونىمدەرىن شىعاراتىن 15 كاسىپورىن بار. سونىمەن قاتار وڭىردە 7 تاۋارلى ءسۇت فەرماسى سالىنىپ جاتىر. وسى باعىتتاعى جوبالاردى قارجىلاندىرۋعا 13,3 ميلليارد تەڭگە بولىنگەن.
