فوتو: ۇكىمەت
مەملەكەت باسشىسىنىڭ تاپسىرماسى بويىنشا ۇكىمەت بيىلعى كوكتەمگى ەگىس جانە ەگىن جيناۋ جۇمىستارىن جۇرگىزۋگە 580 ملرد تەڭگە كولەمىندە رەكوردتىق قاراجات بولگەن. اۋىل شارۋاشىلىعى تەحنيكاسىن ليزينگكە ساتىپ الۋعا باعىتتالعان سوما 5 ەسەگە ۇلعايتىلعان. مەملەكەت تاراپىنان كورسەتىلەتىن قولداۋ شارالارىن كەڭەيتۋ شارۋالارعا ەگىس ناۋقانىن ءساتتى وتكىزۋگە مۇمكىندىك بەردى.
اۋىل شارۋاشىلىعى مينيسترلىگىنىڭ مالىمەتىنشە, قازاقستاندا جاپپاي ەگىن جيناۋ جۇمىستارى تامىزدىڭ ءۇشىنشى ونكۇندىگىندە باستالادى. بۇگىنگى تاڭدا اۋىل شارۋاشىلىعى تەحنيكاسىنىڭ دايىندىعى 98%-دى قۇرايدى. بارلىعى 149 مىڭنان استام تراكتور, 38 مىڭ استىق جينايتىن كومباين جانە 14 مىڭ دەستەلەگىش تارتىلاتىن بولادى.
ۇكىمەت باسشىسى ۆيتسە-پرەمەر سەرىك جۇمانعاريننىڭ باسشىلىعىمەن ءتيىستى مينيسترلىكتەر, اكىمدىكتەر مەن شارۋالار اراسىنداعى جۇمىستى ۇيلەستىرۋ مەن باقىلاۋ ءۇشىن ەگىن جيناۋ ناۋقانىن وتكىزۋ جونىندەگى جەدەل شتاب قۇرۋدى تاپسىرعان.
«ەگىندى ساپالى جيناپ الۋ جانە ساقتاۋ ەلىمىز ءۇشىن ەرەكشە ماڭىزعا يە. تۋىندايتىن بارلىق ماسەلەنى كۇندەلىكتى پىسىقتاۋ قاجەت. بۇل تەك مينيسترلىكتەرگە عانا ەمەس, اكىمدىكتەر مەن فەرمەرلەردىڭ وزدەرىنە دە قاتىستى. اۋىل شارۋاشىلىعى مينيسترلىگىنە وبلىستاردىڭ اكىمدىكتەرىمەن بىرلەسىپ, ەگىن جيناۋ جۇمىستارىن ەرەكشە باقىلاۋدا ۇستاۋدى تاپسىرامىن. ءداندى داقىلداردى ساقتاۋدىڭ ءتيىستى جاعدايىن قامتاماسىز ەتۋ دە ماڭىزدى», دەدى ولجاس بەكتەنوۆ.
سونىمەن قاتار, شارۋالارعا كۇزگى دالا جۇمىستارىن جۇرگىزۋگە 64 مىڭ توننادان استام جەڭىلدىگى بار ديزەل وتىنى جونەلتىلگەن. بەكىتىلگەن كەستەگە سايكەس, وڭىرلەرگە بارلىعى نارىق باعاسىنان تومەن دەڭگەيدە تىركەلگەن باعا بويىنشا شامامەن 355 مىڭ توننا جەتكىزىلەدى. ديزەل وتىنىن جەتكىزۋدى باقىلاۋ جانە اشىقتىعىن قامتاماسىز ەتۋ بويىنشا شارالار قابىلدانعان.
ولجاس بەكتەنوۆ ماسەلەنى تۇراقتى باقىلاۋدا ۇستاۋدى مىندەتتەدى, قاجەتتىلىك تۋىنداعان جاعدايدا – شارۋالارعا استىقتى كەپتىرۋگە ديزەل وتىنىنىڭ قوسىمشا كولەمى بولىنەتىنى اتاپ ءوتىلدى.
جالپى رەسپۋبليكادا استىق ساقتاۋدىڭ جالپى سىيىمدىلىعى 30 ملن توننانى قۇرايدى, بۇل بولجانىپ وتىرعان ەگىن كولەمىن ساقتاۋعا جەتكىلىكتى. سونىمەن قاتار جەكەلەگەن استىق قويمالارىنىڭ جۇكتەمەسى ءالى كۇنگە جوعارى بولىپ وتىر.
پرەمەر-مينيستر ەلەۆاتورلاردى وتكەن جىلعى ەگىن قالدىقتارىنان 10 قىركۇيەككە دەيىن بوساتۋدى تاپسىرعان. وبلىستاردىڭ اكىمدىكتەرى باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ, ەلەۆاتورلار قىزمەتى باعاسىنىڭ نەگىزسىز وسۋىنە جول بەرمەۋى ءتيىس.
وندىرىلگەن اوك ونىمدەرىن, ونىڭ ىشىندە نەگىزگى ەكسپورت نارىقتارىندا وتكىزۋدى قامتاماسىز ەتۋدىڭ ماڭىزى اتاپ ءوتىلدى. ساۋدا جانە ينتەگراتسيا مينيسترلىگى قىتاي, تاياۋ شىعىس, افريكا جانە باسقا دا ەلدەردەگى سەرىكتەستەرمەن وسى باعىتتاعى جۇمىستى جانداندىرۋى كەرەك ەكەنى دە اتالدى.
