سولتۇستىك قازاقستان مەكتەپتەرىنە تۇلعالار ەسىمى بەرىلدى

پەتروپاۆل. 23 قاڭتار. ۇكىمەتتىڭ قاۋلىسىمەن وبلىستىڭ ءۇش ءبىلىم شاڭىراعىنا وسى وڭىردە تۋىپ-وسكەن, الەۋمەتتىك-ەكونوميكالىق, مادەني, رۋحاني دامۋىنا زور ۇلەس قوسقان تانىمال تۇلعالاردىڭ ەسىمدەرى بەرىلدى. بۇل تۋرالى egemen.kz ءتىلشىسى حابارلادى. ەل قاستەرلەيتىن تاۋ تۇلعالى ازاماتتاردىڭ ءبىرى جۇمابەك تاشەنوۆ وبلىستىق اتقارۋ كوميتەتىنىڭ توراعاسى قىزمەتىن اتقارعان كەزەڭدە حالىققا سىڭىرگەن ەڭبەگى ولشەۋسىز. بۇدان بىلاي پەتروپاۆل قالاسىنداعى № 20 قازاق مەكتەبى وسىنداي قازاقتىڭ ءىرى تۇلعاسى, قوعام جانە مەملەكەت قايراتكەرىنىڭ ەسىمىمەن اتالاتىن بولدى. قالالىق كلاسسيكالىق گيمنازيا بەلگىلى جازۋشى, دراماتۋرگ سافۋان شايمەردەنوۆتىڭ اتىن يەلەندى. ەسىل اۋدانى نيكولاەۆكا ورتا مەكتەبىنە بەلگىلى ۇستاز, بىلگىر باسشى, لەنين وردەنىنىڭ يەگەرى اسقار يگىباەۆتىڭ ەسىمى بەرىلدى. ءومىر ەسقالي. دەرەك: egemen.kz. سۋرەت: «قازاقپارات».