جۋىردا «Esentai Gallery» زالىندا زەرگەر ابزال مولدابەكتىڭ كورمەسى ءوتتى. شەبەر كورمەدە ونجىلدىق جۇمىسىن قورىتىندىلاپ, «Alash Jewels» برەندىنىڭ بارلىق ەڭبەكتەرى مەن «قارلىعاش» اتتى جاڭا توپتاماسىن تانىستىردى.
جۇزدەن اسا ديزاين, اشەكەي قويىلعان كورمەنى دايىنداۋعا ءۇش اي ۋاقىت كەتكەن. ال جاڭا توپتامانى جاساۋعا ءبىر جىل ۋاقىت جۇمساپتى. اۆتوردىڭ العاشقى كورمەسىنە فرانتسيا, شۆەيتساريا, رەسەي, ەلىمىزدىڭ بىرنەشە قالاسىنان تۇراقتى تۇتىنۋشىلارى ارنايى كەلگەن.
«الەۋمەتتىك جەلىگە اشەكەيدىڭ سۋرەتىن سالا سالعانمەن, ونىڭ قۇندىلىعى, ارتىندا قانداي وي مەن ەڭبەك جاتقانى كورىنبەي قالادى. سوندىقتان ارنايى كورمە وتكىزىپ, جاقسىلاپ تانىستىرايىن دەپ شەشتىم», دەيدى ابزال جاڭا توپتاماسىنىڭ تۇساۋىن كەسىپ جاتىپ.
«زەرگەرلىككە كاسىپ رەتىندە ءالى كىرىسكەن جوقپىن. قازىر تەك شىعارماشىلىق دامۋ جولىندامىن. وسى ماماندىقتى وقۋىم, جۇمىس ىستەۋىمدى قوسقاندا 15 جىلداي ۋاقىتىم كەتتى. قازاقتىڭ ۇلتتىق ورنەكتەرىن, مادەنيەتىن, سالت-ساناسىن زەرگەرلىك ونەر ارقىلى الەمگە تانىتقىم كەلەدى», دەيدى شەبەر.
ءار اشەكەي-بۇيىمىنان اسەمدىك پەن جوعارى ەستەتيكالىق تالعام, قازاقى ناقىش كورىنەتىن زەرگەردىڭ الداعى شىعارماشىلىق جۇمىستارىنا ساتتىلىك تىلەيمىز. «Alash Jewels» بۇيىمدارىن الەمنىڭ ءار تۇكپىرىنەن تاپسىرىس بەرىپ الاتىن ايدىك برەندكە اينالسا, قازاق مادەنيەتىنىڭ دە قاناتى كەڭگە جايىلارى ءسوزسىز.
