فوتو: اقوردا
مەملەكەت باسشىسىنا ەلوردانىڭ بيىلعى ءبىرىنشى جارتىجىلدىقتاعى الەۋمەتتىك-ەكونوميكالىق جانە ينفراقۇرىلىمدىق دامۋى جونىندە مالىمەت بەرىلدى.
جەڭىس قاسىمبەكتىڭ ايتۋىنشا, قالاداعى بارلىق نەگىزگى ەكونوميكالىق كورسەتكىشتەر بويىنشا وڭ ديناميكا بايقالادى. ينۆەستيتسيا كولەمى 632 ميلليارد تەڭگەدەن استى. بۇل وتكەن جىلدىڭ وسى كەزەڭىمەن سالىستىرعاندا 13,2 پايىزعا ارتىق. وڭدەۋ ونەركاسىبى, مەديتسينا, ءبىلىم, كولىك جانە لوگيستيكا سالالارىنداعى جوبالار بەلسەندى تۇردە جۇزەگە اسىرىلىپ جاتىر.
پرەزيدەنتكە مەكتەپ, قولجەتىمدى باسپانا, مەديتسينالىق ورتالىقتار قۇرىلىسى, اپاتتى جاعدايداعى ەسكى ۇيلەردى بۇزۋ, تۇرعىن ءۇي الاپتارىن دامىتۋ, قالانى اباتتاندىرۋ جانە كوگالداندىرۋ ماسەلەلەرى جونىندە باياندالدى. بيىل 20-دان استام مەكتەپ پەن 4500 ورىندىق 6 ستۋدەنتتىك جاتاقحانا سالىنادى. بۇدان بولەك ەلوردادا 170 اۋلا مەن قوعامدىق ورىن, اتاپ ايتقاندا ساياباقتار, گۇلزارلار, جەلەكجولدار اباتتاندىرىلىپ, 70-كە جۋىق كوشە جوندەلەدى.
استانا اكىمى قۇرىلىسى ۇزاققا سوزىلعان تۇرعىن ءۇي كەشەندەرى بويىنشا اتقارىلىپ جاتقان جۇيەلى جۇمىستار تۋرالى ايتتى. 16 مىڭنان استام ۇلەسكەر-وتباسىنىڭ 15,5 مىڭى باسپانالى بولدى. قالعان ۇلەسكەرلەر پاتەرلەرىنە وسى جىلدىڭ سوڭىنا دەيىن قونىستانادى.
قاسىم-جومارت توقاەۆقا جىلىتۋ ماۋسىمىنا دايىندىق جونىندە باياندالدى. بيىل «تەلمان» گاز جىلۋ ستانتسياسىنىڭ ءبىرىنشى كەزەگىن, «تۇران» گاز جىلۋ ستانتسياسىنىڭ ەكىنشى كەزەگىن, سونداي-اق 3-ءشى جەو-نىڭ كومىرمەن جۇمىس ىستەيتىن بولىگىن ىسكە قوسۋ جوسپارلانىپ وتىر.
كەزدەسۋ سوڭىندا قاسىم-جومارت توقاەۆ ەلوردانى الەۋمەتتىك-ەكونوميكالىق تۇرعىدان دامىتۋ, شاھاردى اباتتاندىرۋ, سونداي-اق V دۇنيەجۇزىلىك كوشپەلىلەر ويىندارىنا دايىندىقتى پىسىقتاۋ جونىندە بىرقاتار مىندەت جۇكتەدى.
