ىنتىماق ىرعاعى
تابالدىرىعىمىزدان اتتاعان جىل ەل بىرلىگىنىڭ, تاتۋلىقتىڭ جىلى بولىپ تۇر. بۇل ىسكە بيىل الماتى شاھارىنىڭ بەلسەندى جاستارى دا ارالاساتىن بولادى. جانە وسى باستاماعا قازاقستانداعى تالاي ۇلتتىڭ قىزىنا جوعارى ءبىلىم بەرگەن قازاق مەملەكەتتىك قىزدار پەداگوگيكالىق ۋنيۆەرسيتەتى دە قوسىلدى. وسىناۋ شارالار قازاقستان حالقى اسسامبلەياسىنىڭ 20 جىلدىعىنا ارنالادى.
70 جىل ىشىندە الماتىداعى قىزدار ۋنيۆەرسيتەتىندە ءبىلىم العان
سونىمەن, قىزدار ۋنيۆەرسيتەتىندە «مەنىڭ قازاقستانىم!» اتاۋىمەن وتكەن اۋقىمدى باسقوسۋدا ءارتۇرلى جوو-دا ءبىلىم الىپ جاتقان تەگى – بولەك, تەڭدىگى – ءبىر, ءتۇرلى ەتنوس وكىلدەرى قازاقستاندىق پاتريوتيزم مودەلىن نىعايتۋ, ۇلتارالىق تاتۋلىق پەن دوستىق قاتىناس, ەتنوسارالىق تولەرانتتىلىق پەن قوعامدىق كەلىسىم تاقىرىبىندا ديدارلاستى.
جاستاردىڭ اۋىزبىرشىلىگىنە باستاعان جيىندى قىزدار پەدۋنيۆەرسيتەتىنىڭ رەكتورى دينار نوكەتاەۆا اشىپ, ەلدىكتىڭ جولى, قازاقستان حالقى اسسامبلەياسىنىڭ تاريحى, تاتۋلىققا قوسقان ۇلەسى جايلى ستۋدەنتتەرگە جان-جاقتى اڭگىمەلەي كەلە:
– ...مەملەكەتتىڭ تىنىس-ءتىرشىلىگى, قايناعان ءومىرىنىڭ كىشكەنتاي كورىنىسى ءبىزدىڭ كيەلى شاڭىراعىمىزدا ءوتىپ جاتىر. ارمان قۋىپ اسەم الماتىعا اياق باسقان قىزدار ارۋلار ورداسىنا تابان تىرەپ, ساپالى ءبىلىم الىپ, بىلىكتى مامان بولىپ شىعىپ جاتقاندارىنا, مىنە, 70 جىلدان استى. قازاقتىڭ عانا ەمەس, قىرعىز, وزبەك اعايىنداردان باستاپ, ۇيعىر, تاجىك, كۇرد, ورىس, ۋكراين, كورەي سەكىلدى 480-نەن اسا وزگە ۇلت وكىلدەرى ءبىلىم الىپ جاتقان تىلەگى ءبىر قىزدارىنا قىزدار ۋنيۆەرسيتەتى ۇلكەن تىرەككە اينالدى, – دەدى.
ودان ءارى ءسوز العان «مەملەكەتتىك تىلگە قۇرمەت» بىرلەستىگىنىڭ ءتورايىمى, قازاقستان حالقى اسسامبلەياسىنىڭ مۇشەسى اسىلى وسمان: «بۇگىن كەلەشەگىمىزدىڭ كەپىلى, الماتىنىڭ بەتكە ۇستار قايماعى – جاستار باس قوسىپ وتىرعان ماڭىزدى كۇن. بۇگىنگى تاڭدا ەلباسىنىڭ قويىپ وتىرعان نەگىزگى ماقساتى دا ەل ءبىرلىگى. ول بىرلىكتىڭ تۇتقاسى دا, ۇيىتقىسى دا, كەلەشەگى دە جاستار دەپ ءۇمىت ارتىپ وتىر, سول سەنىمدى اقتايتىنداي ەلدىڭ مىقتى قايراتكەرى, ەلىن سۇيگەن, جەرىن سۇيگەن ازاماتتارى بولىڭدار. ەل بىرلىگىن اق قارداي اسقاقتاتا بىلىڭدەر, ەلدىڭ ىنتىماعىنا, تاتۋلىعىنا ۇيىتقى بولىڭدار! قىزدار ۋنيۆەرسيتەتىندە وقيتىن كوپتەگەن وزگە ۇلت وكىلدەرىنەن تۇراتىن سىڭلىلەرىمە اپالىق رەتىندە ايتار نازىم «ءتىلدى بىلگەن ادام عانا سول ۇلتتى قۇرمەتتەيدى, سالتىنا, داستۇرىنە بويلايدى», – دەدى.
شارا بارىسىندا قىزدار ۋنيۆەرسيتەتىندە ءبىلىم الىپ جاتقان وزگە ۇلت وكىلدەرى دە تاتۋلىق پەن ىنتىماق تۋرالى ءوز وي-پىكىرلەرىن ءبىلدىرىپ, جۇرەكجاردى تىلەكتەرىن جەتكىزدى. اتاپ وتە كەتەيىك, ارۋلار ورداسىندا قازىرگى تاڭدا 480-نەن اسا وزگە ۇلت وكىلى وقيدى.
جيىن سوڭىندا بەلسەندى جاستار قازاقستان حالقى اسسامبلەياسىنىڭ 20 جىلدىعىنا وراي ارنايى قارار قابىلدادى. وندا: ««ماڭگىلىك ەل» بولۋعا بەت العان قازاق ەلىنىڭ «التىن» جاستارى بولاشاققا ۇلكەن سەنىم بىلدىرە وتىرىپ, ۇلتىنىڭ ءوسىپ-ءوركەندەۋىنە ىقپال ەتەتىن, وركەنيەتتى ەل ازاماتى بولۋعا دايىندالۋدا. سوندىقتان, ءبىز الدىمىزعا ناقتى مىندەتتەر قويا وتىرىپ, مىقتى دا باسەكەگە قابىلەتتى «ماڭگى قازاقستاندى» قۇرۋ ءۇشىن ايانباي تەر توگەمىز, بارلىق جاستىق كۇش-جىگەرىمىزدى ارنايمىز!» دەلىنگەن.
ايناش ەسالي,
«ەگەمەن قازاقستان».
الماتى.
جاراسىمدىلىق
اۆەتيك اميرحانيان,
«ايدانا» جشس ديرەكتورى, «ميرزويان» ارميان ەتنومادەني قوعامدىق بىرلەستىگىنىڭ توراعاسى, قالالىق ءماسليحاتتىڭ دەپۋتاتى.
قازاق ەلىنىڭ ەگەمەندى ەل اتانعانىنا 23 جىلدان استى. وسى ۋاقىت ىشىندە ەلباسى نۇرسۇلتان نازارباەۆتىڭ باستاماسىمەن ەلىمىزدە كوپتەگەن يننوۆاتسيالىق باعدارلامالار جۇزەگە اسىرىلدى. ناتيجەسىندە قازاقستان ەكونوميكاسى دامىعان وركەندى ەلگە اينالدى.
بۇگىندە قازاق ەلىن بۇكىل الەم تانيدى, ونىڭ باسشىسىنىڭ كورەگەندىگىن بارشا جۇرت مويىندايدى. ءوزىم جەكە كاسىپپەن اينالىساتىن بولعاندىقتان, كاسىپكەرلەرگە جاسالىپ جاتقان جەڭىلدىكتەردى ءجيى پايدالانامىن. باسقا ەلدەردە كاسىپكەرلەرگە مۇنداي قولداۋ جاسالمايدى. وزگە مەملەكەتتىڭ كاسىپكەرلەرى بىزگە قىزىعا قارايدى.
ەلباسىنىڭ سارابدال ساياساتىنىڭ ارقاسىندا ءبىزدىڭ ەلىمىزدە بار حالىقتىڭ وكىلى بىردەي جاعدايدا, ىنتىماقتاسا ءومىر سۇرۋدە. ءتۇرلى ۇلت وكىلدەرىنىڭ تاتۋ-ءتاتتى ءومىر ءسۇرۋىنىڭ ارقاسىندا قازاقستاندا ساياسي جاعداي تۇراقتى. مەن وسىنداي دارحان دا باۋىرمال, قوناقجاي ەلدە تۇراتىنىمدى ماقتان تۇتامىن. مەنىڭ جانە بالالارىمنىڭ وتانىنا اينالعان قازاق ەلىنىڭ ەگەمەندىگى ماڭگىلىك بولسىن!
باتىس قازاقستان وبلىسى.
