وسىلايشا, قورا كوشەسىندە الەۋمەتتىك وسال توپتاعى ازاماتتارعا 40 پاتەرلى تۇرعىن ءۇي پايدالانۋعا بەرىلدى. بىلتىر عانا قۇرىلىسى باستالعان كوپقاباتتى ءۇي زامان تالابىنا ساي جابدىقتالعان. جالپى الاڭى 3,4 مىڭ شارشى مەتردى قۇرايدى. وعان جاۋاپتى مەردىگەر – «سەم شوعى قۇرىلىس» جشس. قۇنى 780,6 ملن تەڭگەنى قۇرايتىن باسپانانى الدىمەن ءۇي كەزەگىندە تۇرعان تولىق ەمەس جانە كوپبالالى وتباسىلار, جەتىم بالالار, زەينەتكەرلەر, مۇمكىندىگى شەكتەۋلى ازاماتتار, بيۋدجەتتىك مەكەمە قىزمەتكەرلەرى الدى.
«قالاداعى تۇرعىن ۇيمەن قامتاماسىز ەتۋ ماسەلەسىنە توقتالاتىن بولسام, كەزەكتە تۇرعانداردىڭ سانى جىلدان-جىلعا وزگەرىپ تۇرادى. 2022 جىلى كەزەكتە 964 ادام بولسا, 2023 جىلى – 1 092 ادام, بيىل 1 023 ادام بولدى. 2022 جىلى تۇرعىن ءۇي بەرىلمەدى, 2023 جىلى 192 پاتەر بەرىلدى, ونىڭ ىشىندە 59 پاتەر ساتىپ الىندى. تۇرعىن ءۇي كەزەگىندەگى 1 023 ازاماتتىڭ 449-ءى – الەۋمەتتىك وسال توپتاعىلار, 122-ءسى – جەتىم بالالار, 150-ءى – كوپبالالى وتباسىلار, 302-ءسى بيۋدجەتتىك سالا قىزمەتكەرلەرى سانالادى. قالا بويىنشا بارلىق قارجىلاندىرۋ كوزدەرى ەسەبىنەن 10,8 مىڭ شارشى مەتر تۇرعىن ءۇي قولدانىسقا بەرىلەدى. ونىڭ ىشىندە 6,8 مىڭ شارشى مەترى – بيۋدجەت ەسەبىنەن», دەيدى قالا اكىمى الماس ءادىل.
جاڭا تۇرعىن ۇيدە 15 ءبىر بولمەلى, 5 ەكى بولمەلى, 15 ءۇش بولمەلى جانە 5 ءتورت بولمەلى پاتەر بار. اۋلا اۋماعى اباتتاندىرىلعان. بالالاردىڭ ويىن جانە سپورت الاڭدارى بار. تاعى ءبىر اتاپ وتەرلىگى, كوپبالالى وتباسىلاردىڭ سۇرانىسىنا ساي تۇرعىن ءۇي جوباسىنا ءتورت بولمەلى 5 پاتەر ارنايى ەنگىزىلدى. ءۇيدىڭ بالكوندارىن مەردىگەر كومپانيا ءوز قاراجاتى ەسەبىنەن جاۋىپ بەردى. وسى رەتتە باسپانا قۋانىشىنا بولەنگەندەر اراسىندا قالا تۇرعىنى قانيپا وسانوۆا اسەرىمەن ءبولىستى.
«باسپانالى بولۋ – ءار ازاماتتىڭ ارمانى. ءبىز دە وسى ءساتتى كوپتەن كۇتتىك. مەنىڭ بالام – ءىى توپتاعى مۇگەدەك. بۇگىن, مىنە, ەكى بولمەلى جاڭا پاتەرگە يە بولىپ جاتىرمىز. بۇل – وتباسىمىز ءۇشىن ۇلكەن قۋانىش. وسىنداي مەرەيلى ساتتەرىمىز كوپ بولسىن. بىزگە ءۇي سىيلاعان وبلىس اكىمدىگىنە, وسىنداعى ازاماتتارعا العىسىمدى ايتامىن», دەدى ق.وسانوۆا.
بۇعان قوسا حالىقتىڭ الەۋمەتتىك وسال توپتارىن تۇرعىن ۇيلەرمەن قامتاماسىز ەتۋ ماقساتىندا 50 تۇرعىن ءۇيدى ساتىپ الۋعا 962,8 ملن تەڭگە قاراجات بولىنگەن. تەكەلى قالاسى اكىمدىگى, «Elite strوy ED» جشس جانە «Temir stroy Alatau» جشس اراسىندا جەكە تۇرعىن ۇيلەردىڭ قۇرىلىسى بويىنشا مەموراندۋمعا قول قويىلىپ, 50 جەكە تۇرعىن ءۇي سالۋ كوزدەلگەن. اتالعان تۇرعىن ۇيلەردىڭ قۇرىلىسى 2024 جىلدىڭ سوڭىنا دەيىن اياقتالىپ, پايدالانۋعا بەرىلەدى. سونىمەن قاتار عارىشكەرلەر كوشەسىندە 40 پاتەرلى نەسيەلىك تۇرعىن ءۇيدىڭ جانە ونىڭ ينجەنەرلىك-كوممۋنيكاتسيالىق جەلىلەرىنىڭ قۇرىلىسى جۇرگىزىلىپ جاتىر.
جالپى, جەتىسۋدا 8 اۋدان مەن 2 قالا بويىنشا قولدانىسقا بەرىلەتىن تۇرعىن ۇيلەردىڭ جول كارتاسى دايىندالدى. اتالعان كارتانىڭ شەڭبەرىندە بيىل 349,3 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانعان. سونىڭ ىشىندە وسى جىلدىڭ قاڭتار-ماۋسىم ايلارىندا 115,5 مىڭ شارشى مەتر قولدانىسقا بەرىلگەن. بۇل وتكەن جىلدىڭ سايكەس كەزەڭىمەن سالىستىرعاندا 11,3 پايىزعا ارتىق. جىل سوڭىنا دەيىن قالعان باسپانالاردىڭ قۇرىلىسى اياقتالۋى ءتيىس.
«بۇگىندە تەكەلىدە 40 پاتەرلى جانە 60 پاتەرلى تاعى ەكى كوپقاباتتى ءۇي بوي كوتەرىپ كەلەدى. بۇعان قوسىمشا 60 وتباسىعا ارنالعان 30 جەكە تۇرعىن ءۇيدىڭ قۇرىلىسى ءجۇرىپ جاتىر. تاعى ءبىر 60 پاتەرلى ءبىر ءۇيدىڭ جوبالىق-سمەتالىق قۇجاتتاماسى دايىندالادى», دەيدى ا.ءادىل.
قازىر مونوقالادا تۋريزمگە باعىتتالعان قۇرىلىس نىساندارى قارقىندى ءجۇرىپ تۇر. سوندىقتان جەرگىلىكتى اتىمتاي جومارت ازاماتتار جەرلەستەرىنە ءۇي ساتىپ الىپ بەرىپ, مەملەكەتكە قولداۋ كورسەتىپ جاتىر. وسىعان دەيىن ونداعان وتباسىنىڭ باسپانالى بولۋىنا سەپتەسكەن كاسىپكەرلەردىڭ ەرلىگى ماقتاۋعا تۇرارلىق.
جەتىسۋ وبلىسى
