فوتو: mms-pandus.ru
ماسەلەن, ەڭبەك جانە الەۋمەتتىك قورعاۋ كوميتەتىنىڭ استانا قالاسى بويىنشا دەپارتامەنتى كرەسلو-اربامەن قوزعالاتىن ازاماتتىڭ ءوتىنىشى نەگىزىندە مۇگەدەكتىگى بار ادامدار ءۇشىن قولجەتىمدىلىكتىڭ بولماۋى فاكتىسى بويىنشا كافە-بارعا جوسپاردان تىس تەكسەرۋ جۇرگىزدى. تەكسەرۋ قورىتىندىسى بويىنشا كاسىپكەرلىك سۋبەكتىسى ايىپپۇل تۇرىندە اكىمشىلىك جاۋاپكەرشىلىككە تارتىلدى, سونداي-اق انىقتالعان بۇزۋشىلىقتاردى جويۋ تۋرالى نۇسقاما ەنگىزىلدى.
سونىمەن قاتار وڭىرلەردەگى الەۋمەتتىك ينسپەكتورلار ەرەكشە قاجەتتىلىكتەرى بار ادامداردىڭ قۇقىعىن قامتاماسىز ەتۋ ءۇشىن الەۋمەتتىك ينفراقۇرىلىم نىساندارىنىڭ بەيىمدەلۋ ءىس-شارالارىن جۇرگىزۋدە وڭ ديناميكا بايقالاتىنىن العا تارتىپ وتىر. وسىنداي قولايلى جاعدايعا وسكەمەن قالاسىنداعى ءبىرىنشى توپ مۇگەدەكتىگى بار بالانىڭ اناسى مارجان سۇلتانعازينا ريزاشىلىعىن ءبىلدىردى.
«مۇگەدەكتىگى بار ادامدار ءۇشىن بارلىق قاجەتتى جاعدايلار جاسالىپ جاتىر. كاسىپكەرلەردىڭ قاراماعىنداعى نىسانداردىڭ بارىنشا قولجەتىمدى بولۋىن نازارىندا ۇستاۋى قۋانتادى. بۇل رەتتە مەملەكەتتىك مەكەمەلەر دە شاعىمدار مەن ۇسىنىستاردى ەسكەرە وتىرىپ, عيماراتتاردى جاڭعىرتۋدان وتكىزىپ جاتىر. مىسالى, №1 قالالىق ەمحانادا, «DEVAL» كورەي وڭالتۋ ورتالىعىندا, ء«ۇلبى» قالالىق اۋماقتىق حالىققا الەۋمەتتىك قىزمەت كورسەتۋ ورتالىعىندا مۇگەدەكتىگى بار ادامدار ءۇشىن تولىق جاعداي قاراستىرىلعان. جالپى, وبلىس بويىنشا ينفراقۇرىلىم نىساندارىنىڭ قولجەتىمدىلىگى ماسەلەلەرى شەشىلىپ كەلەدى دەۋگە بولادى», دەدى م.سۇلتانعازينا.
وسى ورايدا بىلتىر 1 شىلدەدە الەۋمەتتىك كودەكس كۇشىنە ەنگەن كەزدەن باستاپ ەلىمىزدە مەملەكەتتىك الەۋمەتتىك قورعاۋ ينسپەكتورلارىنىڭ ينستيتۋتى ەنگىزىلگەنىن اتاپ وتكەن ءجون. ولاردىڭ قۇزىرەتىنە مۇگەدەكتىگى بار ادامداردى الەۋمەتتىك قورعاۋ, ارناۋلى الەۋمەتتىك قىزمەتتەر كورسەتۋ, الەۋمەتتىك قامسىزداندىرۋ سالاسىنداعى زاڭنامانىڭ ساقتالۋىن باقىلاۋدى جۇزەگە اسىرۋ كىرەدى.
