نىسان وسى جىلدىڭ جەلتوقسانىندا تولىعىمەن اياقتالادى. الايدا مامانداردىڭ ايتۋىنشا, كولىكتەرگە قازان ايىنان باستاپ جۇرۋگە رۇقسات بەرىلمەك. كوپىر قۇرىلىسى باستالعاندا-اق شىعىس جۇرتى مالاقايلارىن اسپانعا اتىپ قۋانعان. اسىرەسە ارالدا قالىپ قويعانداي كۇي كەشىپ كەلگەن مارقاكول, كۇرشىم اۋداندارى حالقىنىڭ قۋانىشى الابوتەن. الا جازداي سۋ بەتىندە قالىقتاپ پاروممەن قاتىناساتىن. قىستىڭ كۇنى جاندارىن شۇبەرەككە ءتۇيىپ, مۇزبەن جۇرەتىن. مەزگىلدىڭ ءولارا شاقتارىندا التاي اۋدانىن اينالىپ, وبلىس ورتالىعىنا جەتەر ەدى. قىسقاسى, جولدىڭ ماشاقاتىن ەلۋ جىلدان استام ۋاقىت كورىپ كەلگەن. ەندى ەلىمىزدەگى ەڭ ۇزىن وتكەل – بۇقتىرما كوپىرىمەن قاتىنايتىن كۇن دە الىس ەمەس. ۇزىندىعى 1 316 مەتر بولاتىن كوپىر كۇرشىم مەن سامار اۋداندارىن بايلانىستىرىپ تۇر.
2019 جىلدىڭ 19 قىركۇيەگىندە پرەزيدەنت بۇقتىرما سۋ قويماسىنان وتەتىن كوپىر سالۋ ءۇشىن قاراجات ءبولۋدى تاپسىرعان. كوپ ۇزاماي ءتيىستى قارجى ءبولىنىپ, 2021 جىلدىڭ اقپانىندا نىسان قۇرىلىسى باستالدى.
قۇرىلىس جۇمىستارى باستالعان سوڭ 2022-2023 جىلدارى قۇرىلىس ماتەريالدارى مەن جانار-جاعارماي باعاسى قىمباتتاپ, ماڭىزدى جوباعا تۇزەتۋ ەنگىزىلگەن بولاتىن. ءسويتىپ, ونىڭ قۇنى ەكى ەسە ءوستى.ەكى جولاقتى كوپىردىڭ ەنى – 12,2 مەتر, ال بيىكتىگى – 18 مەتر. تاۋلىگىنە 80 مىڭ كولىككە دەيىن وتەدى. كوپىردىڭ ستراتەگيالىق ماڭىزى زور. ول ايماقتىڭ الەۋمەتتىك-ەكونوميكالىق دامۋىنا ىقپال ەتەدى.
كوپىر قۇرىلىسى كۇرشىم جانە قايتادان قۇرىلعان مارقاكول اۋداندارىنىڭ ەكونوميكاسىنا بارىنشا وڭ اسەرىن تيگىزبەك. ايتا كەتەيىك, كوپىردى سالۋ جۇمىستارىن تولىعىمەن وتاندىق مەردىگەر جۇزەگە اسىرىپ جاتىر. قۇرىلىسقا ەلىمىزدىڭ بىرقاتار وڭىرىنەن ينجەنەرلەر تارتىلعان. ال نەگىزگى جۇمىستار جەرگىلىكتى ماماندارعا جۇكتەلگەن.
«قازاۆتوجول» مەكەمەسى وبلىستىق فيليالى ديرەكتورىنىڭ ورىنباسارى الماس قاسەنوۆتىڭ ايتۋىنشا, ارالىق قۇرىلىستاردى مونتاجداۋ جۇمىستارى تولىعىمەن اياقتالدى. 21 تىرەك ورناتىلدى, ونىڭ ىشىندە 20-سى – نەگىزگى تىرەك. 512 مەترگە دەيىن ەكى قابات اسفالت توسەلگەن. ەندى نىساننىڭ قالعان بولىگىن ارماتۋرالاۋ جانە بەتونداۋ جۇمىستارىنا كەزەك كەلدى.
– كوپىرگە كىرەبەرىس جولدار دا سالىنىپ جاتىر. سامار اۋدانىندا كوپىرگە دەيىنگى جول ۋچاسكەسىنىڭ ۇزىندىعى 17 شاقىرىم 200 مەتر بولادى, ونىڭ 10 شاقىرىمىنا اسفالتتىڭ ءبىرىنشى قاباتى توسەلگەن. كۇرشىم اۋدانىنداعى ۋچاسكەنىڭ ۇزىندىعى – 1 شاقىرىم 300 مەتر, – دەيدى ديرەكتوردىڭ ورىنباسارى الماس قاسەنوۆ.
جۋىردا ستراتەگيالىق ماڭىزعا يە نىساندى پرەمەر-مينيستر ولجاس بەكتەنوۆ تە تەكسەرىپ كەتتى.
– قازىر كوپىردەگى كولىك قوزعالىسىن ىسكە قوسۋ ءۇشىن جۇمىستاردى تەزىرەك اياقتاپ, بۇعان بارلىق كۇشتى جۇمىلدىرۋ كەرەك. كولىك-لوگيستيكا سالاسى ەلىمىزدىڭ ەكونوميكالىق دامۋىنىڭ قوزعاۋشى كۇشتەرىنىڭ بىرىنە اينالۋعا ءتيىس. سوندىقتان ءبىز وسىنداي ينفراقۇرىلىمدىق جوبالاردى جەدەل ىسكە اسىرۋىمىز كەرەك, – دەدى ولجاس بەكتەنوۆ.
قوس جاعالاۋدان باستالعان قۇرىلىستىڭ قارقىنى جوعارى. وسىلايشا, پرەزيدەنتتىڭ تاپسىرماسىمەن باستالعان ءىرى جوبا اياقتالۋعا جاقىن. قۇرىلىس بيىل جەلتوقساندا حالىققا تولىعىمەن قولدانىسقا بەرىلەدى.
شىعىس قازاقستان وبلىسى
