قازاقستان مەن ەۋرووداق تەڭ قۇقىلى ءارى ءوزارا ءتيىمدى ارىپتەستەر

كەشە ءماجىلىس توراعاسى قابيبوللا جاقىپوۆ پەن ورتالىق ازيا ەلدەرىمەن ىنتىماقتاستىق جونىندەگى ەۋروپارلامەنت دەلەگاتسياسىنىڭ باسشىسى يۆەتا گريگۋلە قازاقستاندىق-ەۋروپالىق ءوزارا ءىس-قيمىلدى نىعايتۋ ماسەلەلەرىن تالقىلادى. بۇل – يۆەتا گريگۋلەنىڭ جاڭا قىزمەتىندە قازاقستانعا العاشقى كەلۋى, دەپ حابارلادى ءماجىلىستىڭ ءباسپاسوز قىزمەتى. قابيبوللا جاقىپوۆ اتالعان باعىت ءبىزدىڭ ەلىمىزدىڭ ستراتەگيالىق باسىمدىقتارىنىڭ ءبىرى ەكەنىن العا تارتا كەلىپ, قازاقستان پرەزيدەنتىنىڭ سان قىرلى ساياساتى الەمنىڭ كوپتەگەن ەلدەرىمەن ىنتىماقتاستىق ورناتۋعا ايقىن جول اشاتىنىن اتاپ ءوتتى. يۆەتا گريگۋلە قازاقستاننىڭ الەۋمەتتىك-ەكونوميكالىق دامۋ ۇدەرىسىنە وتە جوعارى باعا بەردى. ونىڭ ايتۋىنشا, ءبىزدىڭ ەلدە ءاربىر ادامنىڭ, جالپى العاندا, بۇكىل قوعامنىڭ ءال-اۋقاتىن كوتەرۋگە اي­رىقشا كوڭىل بولىنگەن. بۇگىنگى كۇنى ەۋرووداق – قازاقستاننىڭ بارلىق سالاداعى ءىرى ارىپتەسىنىڭ ءبىرى. مارتەبەلى مەيماننىڭ اتاپ وتكەنىندەي, ادامدار اراسىندا سەنىمدىلىك قارىم-قاتىناستى ورناتۋ مەن دامىتۋ وتە ماڭىزدى, ول جالپى مەملەكەت تابىسىنىڭ جارقىن كەپىلى. ءماجىلىس سپيكەرى ءوز كەزەگىندە ەلباسى ساياساتىنىڭ ارقاسىندا جىل ساناپ نى­عايىپ كەلە جات­قان قازاقستاندىق قوعام­نىڭ تولە­رانت­تىلىق ۇلگىسىنە كوڭىل ءبولدى. كەزدەسۋ بارىسىندا قازاق­ستان مەن ەۋرووداق اراسىندا ساۋ­دا-ەكونو­مي­كالىق ىنتى­ماق­تاس­تىقتى نىعايتۋ, ين­ۆەس­­تيتسيا­لىق تارتىمدىلىق, تران­زيت­تىك-كو­لىكتىك الەۋەت, سونداي-اق, پارلا­مەنت­ارالىق قارىم-قاتىناس سىندى اۋ­قىمدى ماسەلەلەر اڭگىمەگە ارقاۋ بولدى. قابيبوللا جاقىپوۆ دەلەگاتسيا مۇشەلەرىنە ءماجىلىس قىزمەتى تۋرالى, ەلدىڭ زاڭنامالىق بازاسىن جەتىلدىرۋ جولىندا اتقارىلىپ جاتقان جۇمىستار جايىندا بايانداپ بەردى. پارلامەنتارالىق قارىم-قاتى­ناستى تەرەڭدەتۋ قاجەتتىگىن ايت­قان يۆەتا گريگۋلە ورتالىق ازيا ەلدەرى­مەن ىنتىماقتاستىق جونىندەگى دەلەگا­تسيامەن بايلانىستى كەڭەيتۋ ماقسا­تىندا قازاقستاندىق دەپۋتاتتاردى ەۋروپارلامەنتكە شاقىردى.